Kei leh Penglengpunga hi a ziaktupa LP Mawia Hlawndo, Sabereka Khuangkaih chanchinbua Mapuia Hlawndo ti a kan hriat ṭhin lehkhabu pangana a ni a. Kum 2000 chho vela ṭhangthar writer ṭha berte zinga mi, a novel Riakmaw Cabin a chhuah aṭanga kum 10 zet a reh vang vang hnua lehkhabu ṭha zet a rawn khawr pum leh thei hi a lawmawm hle. A bu hming aṭang reng hian a tlangzarhtu Pu Stephen Auhmuna te ṭhianho titi lam a hawi ang a tih rin nghal theih a ni a, chutiang ṭhianho inkah fiamna leh thawnthu ngaihnawm tak tak chu eng emaw zat a tel rualin; chutiang lam hawi ngawt hmuh tuma chhiartute tan chuan rin ṭhelh duai theih tur a ni ve thung ang. He lehkhabu hi phek 247 a chhah a ni a, thuziak (Essay & thawnthu) – 20 a awm a, hla/poetry – 13 zet a bilh tel bawk. Heng thu leh hla chi hrang hrangah hian mihring nun hlimthla ngaihnawm, hlimawm, lunglenthlak leh thuziak ṭhenkhat erawh hnuk tiulh hial theite a rawn dah khawm a. A hlimawm leh ngaihnawm phena a ziaktu, MCS officer ( Kan tunlai dinh...