Lehkhabu ṭha thlanna tehfungah hian Pathian thu lutuk hnawlna, secular lam deuh kher tehfungte hi a awm ve duh riau a. A bikin Fiction/Novel hi mihring nun tarlanna rau rauah essay, article leh poetry te anga eng emaw ngaihtuahna vei zawng va tarlanna ngawt ni lo. Darthlalang anga a hlimthla va thlir theih tura tarlanna a ni tlat a. He genre chhunga sakhuana tarlanna hi a lansarh hma rualin, secular dahlen duhna rilru nena hnawl zingah pawh a langsar duh viau. Ngun taka kan ngaihtuah erawh chuan, mihring nun hlimthla pho chhuahna kawnga sakhua hnawl tawp chu a harsa viau mai thei. Hmasang aṭangin mihring hian sakhua a buaipui tawh a, science thiamnain mihring leh mitin a hmuh phak leh a piah lam thlenga hrilhfiahna eng emawzat a chhawp chhuah hma aṭangin hnam tin mai hian sakhuana hmangin chu zawhna chhanna chu an lo zawng daih tawh a ni. Voltaire-a ngaihdan leh thlirna hrang hrang behchhanin 'Literature-in Sakhua a thlawh khum' tihte hi sawi lar a ni fo a , literature khawvel ...