23rd July

Doctor-in thlan tla hliam hliama a investigation result a en lai chuan ngawi rengin a lo thlir a, a hmel leh a mitmengah chuan thil dik lo a awm a ni tih a hriat theih. A chanchin hriat nghakhlel leh huphurh bawk si, thinphu dep dep a Doctor rawn tawngchhuah hun a nghah lai chuan, Doctor chu muangchanginna rawn dâk chhuak a, aw nêm leh dam dap hian..."Bawihi, i result a tha lo hle mai. I taksaah hian natna dotu a awm tawh lo tluk a ni a. Eng pawh ni se, chhel takin awm la, zaninah i na a lo chhuak leh anih pawhin nachhawkna ei chi a ni tawh lo a. Chhel takin i lo tuar tang tang anga, naktuk atangin investigation kan tan leh dawn nia. Kei chuan theihtawp ka chhuah anga, I awmdan tur erawh chu Pathian thu thu a ni" a rawn ti a. A mitmenga lungngaihna leh beidawnna inzam pawlh chiat chu hmuh hmaih rual a ni lo.

Kawlah ni a liam a, enna petu a liam rualin natna hrik te chuan, "Thim thuneihna hi kan lal ram a ni" ti niawm hrimin beihletna tur ralthuam nei ve lo chu hmeichhe der dep tak taksa chu an rawn beih rawn leh ta, tuartu in chhelna hma chhuana thlanfim luang zawih zawiha a beih lai chuan hlimna ni a  vir zung zung thin sana lah chuan a ban vai a hmanhmawh phah chuang der si lo. A pum puar sa hut hut tuivawt leh puandai nena an deh sak mawlh mawlh lai chuan a khawsik a sang tial tial a, tawngchhuak leh meng thei turin tha a nei ta lo. Kal mai thei dinhmuna ding a ni tih a inhriat avangin a rilrua tawngtai mawlh mawlh chungin a ngaihtuahna chu a tifim lui hram hram a, sana banin zanlai a pelh chuan a na chu a zual zel a, amah awmpuitute inbe ri "...Zanin hi kan daih lo mai thei..." tih chu a ral hriat viai viai a. A mitthlaah chuan mitthi-ah a han inchan a, a nu leh a pa te, a unaute leh a thian tha ten, na ti em ema amah an thlahliam tur chu a han ngaihtuah a, chutih hunah chuan an lungngaihna hnem turin a awm ve tawh dawn si lo. A rilru chuan a tawngtai mawlh mawlh reng a, "Lalpa, ka chhungte tan hian ka dam a ngai a ni, an tan engmah tihsak theih pawh nei lo mah ila, ka thih mai chuan na an ti dawn lutuk asin" tiin, damkhawchhuah ngei tumin a insehruh tang tang bawk.

Zing darthum a lo ri a, a taksa na chuan zual lam a la pan tial tial si, a hmangaih leh a ngaih em em, kalsan a duh ngai loh a chhungte meuh pawh ngaihtuah turin chakna a nei ta lo. A chakna neih chhun zawng zawng sawkhawmin natnain a duhtawka a sawisak mek hmeichhe thlaphang thinlung chuan awrawl tawpin Pathian a au ta..."Lalpa, a na em mai...min lo hruai tawh mai rawh" A thinlungin chu thu a sawi zawh rual chiah chuan Pathian kut lianpui leh thlamuanthlak em em chu amah hruai turin a rawn hnai a, a thlamuanna kut chhungah chuan nula puitling tawh pawh nausen ang chauh a ni. Van lamah a chawi chho riai riai a, a na zawng zawng chu chawp leh chilhin an bo nghal vek a. Khawvela nuam zawng zawngin a tehkhin phak loh chu thlamuanna chu sawi maia fiah chi a ni si lo.


Rawl chhuah thei tawh lo a na tuar rum dat dat rengin, hlim taka nui seih chunga a tha a thlah hnawk rual chuan amah awmpuitute chuan a taksa an han dap a. A lo dai thla tial tial a, a thawk ngaihthlak tur reng reng a awm ta lo. Mangang taka tap chungin an sawi nawk nawk a, rei ngial an insawi hnu chuan a rawn harhchhuak a, a rawn meng diar diar a. A awmna chu natna ram khawvel a ni tih hrilhfiahtu a taksa na te chuan an rawn bawm tan leh ta. A han hawi kual a, amah chawitu kut thlamuanthlak tak kha a bo tawh a, natna khum ngaihawm lo zetah chuan a unau ten mittui parawl kianga an lo dawm reng chu a han en a. Amah beitu natna hrik te chuan a ngai te bawkin rawn bei leh mah se, a thinlungah chuan thlamuantu a awm a, chutah chuan vanram rimawi a lo ri chhuak riai riai a...

A hmangaihna âng chhungah chuan min pawm,

Muanna thu te a âw in min hrilh tawh,

Pathian ngei chuan min ven vangin ka him,

A kutphah ropui  chhungah,

Thil eng pawh lo thleng se ka him a ni,

A kutphah ropui chhungah.