I THU NI SE(Thy will be done)- Charlotte Elliot

“Kan Pa, Van ami, I hming zahawm rawh se, I ram lo thleng rawh se. I duhzawng vâna an tih angin leia mi’n ti rawh se (Matthaia 6:10)”...” tiin ni tin zan tin Pathian hnênah kan inhlân fo a. kan thinlung chhungril berah hian a lalna’n hmun kan kian phal tak tak meuh em? tih erawh ngaihtuah fâ tham a ni.Intlansiakna khawvel a chêng, hmasawnnain loh theih loha a pawh kal, rualawt thei tura chhia leh ṭha hriatna pêk kan nih miau avangin, a hmu lian duhtu tan chuan mihring nunah hian engtik lai pawhin harsatna leh lungawi lohna hmuh tur a awm reng a. Harsatna nasa takin a phuar beh lai pawha beiseina mei chhêm alh lui ṭang ṭang tute nunah pawh vanduaina leh lungngaihna tel lovin hlimna leh vanneihna a thleng kumtluan thei bik chuang lo. Chu nun inlumlet chu kan chênna leilungin a ken tel, thilsiam ropui berte tana dah a ni a. (Thuhriltu 3:1-11) tu tan mah pumpelh theih a ni si lo.

Nausen a lo piang chhuak a, nikhua a hriat theih ṭan tirh, a chhia leh ṭha hriatna pawh a la hman thiam mang hma aṭangin rualawh nachang a hriat loh hlauin, tumruhna nena a um tur duhthusam ram kan indin pui a. Chu duhthusam ram tlan thleng thei tur chuan theihtawp tak meuh chhuahin kan intlansiak a, kan tlanna kawnga min daltu thil eng pawh hi duhthusam dintu thinlungah chuan hmelma lian a tling tawh ṭhin. Vanduaina, lunggngaihna, natna leh harsatna chi hrang hrang leh thihna te hi engtik lai paw’n tu nunah pawh thleng thei reng a ni a. A tuartu tan chuan hriatthiam a harsa ṭhin Kan duh loh dan zawk hlira kan khawvel a inher chang hian, harsa hle mah se, hei hi ngaihtuah chian erawh a pawimawh viau…” Kan duhthusam nun chu Pathian remtih zâwng a ni em?” tih hi.Kum 1834 vel daih tawhah khan hmeichhe pakhat taksa chaklohna hrang hrang leh natna benvawnin kum 49 zet a bawhbeh a awm a, chu a taksa lama harsatna chu mihring ngaiha vanduaina nasa tak anih rualin a thlarau lam tan chuan malsawmna kawngkhar a lo ni reng zâwk thung. A natnain a mihring puite tih ang tam tak ti thei lova a delh beh reng lai chuan damna leh thil tam tak tih theihna te, hrisel leh chak taka awm te, khawvel hausakna leh hlawhtlinna zawng zawng ai a a thlan zawk duhthusam pakhat a nei a.  “Harsa taka a damchhung ni a hman lai leh a chatuan in tur a thlen hma zawng a nunah eng pawh lo thleng se, Pathian hmaa, ‘I thu ni se’ ti zel theitu nih hi a ni.”

Ka Pa, vân in ata hlaan,

Lei kawng chhuk chhova ka vah hian,

Min pui la, hei hi hrilh theih nân,

I thu ni se

A nuna hun harsa tak takin bu an khuar lai leh mihring nuna thil harsa ber thihna avanga inṭhenna a paltlang laia a thinlunga thlamuanna pe theitu pawh, engkim tithei Pathian, nunna kawltu hnena “I thu ni se” tih mai chu a ni tih a hre chiang em em a. a nuna thil thleng thei engkim mai chu a nunna, taksa leh thlarau nen lam a petu hnena hlan letin, chu inpekna thinlung chu a nuna a hlut ber leh hloh a hlauh ber a ni zawk ta.

Ni tin tiharh rawh ka rilru,

I ta angin siam la, he thu

Kalhtu tur hi lo awm phal suh,

I thu ni se... (Kristian Hla Bu 422)

He hla mawi leh ril tak phuahtu Pi Charlotte Elliot-i hian Kum 1871, Sept ni 22 khan kum 82 mi niin chatuan ram a lo pan tawh a. a damchhung hian Pathian fakna leh chawimawina hla ropui tak tak 150 vel zet a phuah hman a ni.

Khawvel mihring piang tawh zinga fing ber Lal Solomona khân Pathianin a duh ber a pek tur thu tiama, a hnêna dil tura a tih khan mahni hmasialna zawng zawng dah thain, A khua leh tuite tan ṭha taka ro a rêlsak theih nan finna a dil a, a chungah Pathian a lawm em em a. a dilna chu Solomona beiseina ai a nasa a chhangin, khawvel awm chhung zawnga fing ber nihna a pek tak hial thu Bible-ah kan hmu a. A dil loh hausakna, ropuina leh damreina a la pek belh tel chêu bawk (1 Lalte 3:5-14)

A nihna takah chuan kan mihring finna leh theihnaa sualchhuah tumin duhthusam ropui tak pawh lo din ve eltiang mah ila, mihring thluak leh ngaihtuahna kal ding lai chawl ṭhuap tura thu pe theitu, second khat lek chhûng pawh keimahni leh keimahni kan inpek theih loh, khawvel sumin a lei zawh loh nitin, darkar tin nunna thaw a thlawna min supply char char tu khawngaihna leh zahngaihna tel lo chuan he mihring chakna hian tih theih a nei chuang hleinem. Nunna chelhtuin a thlah ruala a khawvel mangṭha nghal mai tur, he mihring derdep tak hian a damchhung ni leh a thih hnu khawvel thleng pawhin, amah dintu leh engkim ti theitu hmaa tlâwm taka inhlân mai loh chu duhthlan tur dang eng nge a neih chuan?

Lal Solomona nun aṭang hian Pathianin mahni hmasial lova amaha innghat mite a lawmzia leh a duhsakzia kan hmu a, tun thlenga khawvel thiamnain a phak loh Psychology ropui (Thuhriltu) leh Finthuril (Philosophy) zawng zawng bulthum inphumna (Thufingte) bua finna chhiar sen loh min hnutchhiahtu a ni ta rêng a ni. Kan Pi Charlotte Elliot-i ṭawngṭaina hian engtikah mah a dil sual ngaiin a rinawm loh. Tunah chuan amah ngeiin a dam laia,

He ṭawngṭai thu ka dam laia,

Mittui nêna ka lo hman kha,

Lâwmin ka zaipui ang vânan,

I thu ni se.

A lo tih tawh ang khan, nun kawng chhuk chho a paltlang lai pawha mittui nena a pan hrâm hrâm ṭhin “Pa âng chhûngah” thlamuang taka châwlin, hlim taka van hlamawi ropui remtute zingah a tel tawh ngei ang.

-Aremruati Ngente