Mihring kan nihna hlenchhuak tura khawvel eng hmuh theihna kawngka hawnsak kan nih rual chiahin, he hmasawnna khawvel hian intlansiakna min lo chhawpsak nghal a. Bultanna inang lo tak tak, kan theihna leh thiam thil pawh inang lo tak tak mihring ten kan zawn ber leh kan beisei ber erawh a inang vek thung. Mahni hmasialna leh mahni tang hma haina khawvelah hian, ‘Ka tan kawngkhar inhawng a awm em?’ tiin kil tin kan dap kual a, hlawhtlinna, chawlhna, hlimna kawngkhar inhawnna lam nia kan hriat panin, theihtawp chhuahin kan tlan a. Thawhrimna avanga chauhna leh beidawn rum rumnain min buan leh tap tap lai pawhin, tanpuitu leh hnemtu kut a chelh theih nan, hriatthiamna nena, a nun kawng chhuk chho thawnthu ngaihthlaksak a, beiseina khawnvar kawhhmuhtu, a tana thinlung kawngkhar inhawng a awm mial beiseiin, thi thei mihring kawchhunga thi thei lo thlarau hi a rum leh thin.
Harsatnain mihring min han delh beh tak tak hi chuan, rinna hmanga tlang sawn theihna hial khawpa ngaihtuahna thiltithei kawltu nichungin mihring ngaihtuahna hi a tawi tup mai a. Tuk tin zingah ni eng mawi takin lo chhuak fo mah se, zan leh chhun danglamna tem hretu ni chung hian, ngaihtuahna khawvel a thim mup mai chuan zan thim hnawttiautu eng mawina meuh pawhin beiseina khawnvar min chhitsak thei lo fo si anih hi.
Kawng zau taka hawnin a awm!
New York khawpui a hmeichhe pakhat chuan nitin natna khumah bawrhsawmna hrang hrang nen a hun a hmang a, kuttualleichham a nih miau avangin thawkrim apiangte dinchhuahna khawvelah hian a tan beisei tur a tam lo hle. Chuti chung chuan engtik lai pawh hian a hlim em em reng mai a, dam tha leh hrisel taka hun hmang zawk ten a hlim reng theihna thuruk an zawh chuan, “Sari’n Isaaka a nei a,a hlim ang khan Isua ka nei a lawm” tih chu a chhanna a ni.
Lydia Odell Baxter-i chuan buaina khawvela hun hmang chungin, harsatna leh lungngaihnain a chim buai thin mihring ni ve tho chungin, pianphunga a mihringpuite phak lovin, natna leh bawrhsawmnain a chiah piah reng nun hmang chungin a harsatna chu amah delhbettu atan a hmang duh lo a, lungngai leh beidawnga indawmkunna tur tam tak a nei chungin, chung lungngaihna te chuan a nuna ro an rel hmain van lam a en a, minung taksa pu reng chungin atana van kawngkhar inhawng chu a lo han hmu daih tawh bik anih chu.
Kawng zau taka hawnin a awm,
Kawng eng mawi nuam tak mai chu,
Kraws engin chu kawng nuamah chuan,
Lalpa hmangaih a rawn puang,
Khawngaihna kawng hawn lai a ni,
Hmelmate bei hram hram ru,
Bang lovin kraws pu zel rawh u,
Lallukhum tiam sa a ni. (KHB 316)
He leiah hian harsatna tam tak nen hun lo hmang tawh mah se, a hma lamah eng harsatna te nge rawn thlen belh leh dawn tih hre bik lo mah se, atana van kawngkhar inhawng a hmu a, chu chuan beiseina leh chakna a pe a, mi pakhat thinlung kawngkhar hawng tur pawha ‘vanneihna’ leh ‘remchanna’ a mamawh zelna khawvelah hian vanneihna leh remchanna pawh chunglam remtihna lo chuan a thleng thei lo tih hrechiang em emtu Baxter-i chuan atana chatuana chawlh hlenna kawngkhar lo inhawng ngawt mai chu ropui a ti em em a, chu hmunah chuan mi tam zawk an lut thei lo ang tih mawlh a hlauh tawh avangin, a nuna harsatna chhiar turin hun a nei lo a, malsawmna chhiar tur leh midangte hnena sem chhuak turin a tul em em zawk hi a lo ni. Mi tam takin a natna khumah an rawn pan a, amah hnem tur leh thlamuan tur ni lovin, a hnen atanga thlarau pur chaw turin an lo a, a ina lo kal kham te chu, thlarau malsawmna tam tak changin an haw thin reng a ni.
Kawng chu ka tan hawn a ni em?
A chang chuan Pathian hmangaihna hi a ropui lutuk a, awih a har zawk thin. Mahni han inenlet a chhuan tur nei lo, ‘hei hi ka thiltha tih ve’ tih ai a ‘hei hi ka tihsual palh’ tih tur ngah zawk mihring te tan chuan Pathian hmangaihna tawpchin nei lo meuh pawh hi a ropui lutuk a, dawnsawn thiam a har a, kan dawngsawng thiam lo thin reng bawk. Keimahni hriatna leh finaa a innghat lo a, amah ngaichanga a hnung zui zela kal tur kan ni tih inhriatna nen lo phei chuan, mihring leh mihring kan intehna hi hmang dawn ta ngat ila, tling zo tur kan awm dawn si lo.
Mahse, misual tawngtaina ngaithla thintu chuan, kan chaklohna zawng zawng hre vek chunga, kan theih tawk tlemte pawh hnar lo va pawmtu chuan heti hian thu min tiam a, “I thiltihte ka hria a, chakna tlemte chauh i nei a, chutichung pawhin ka thu i pawm a, ka hming pawh i phat lo va, tuma khar theih loh i hmaah kawngka ka hawng e. (Thupuan 3:8)”,
Mi zawng zawng tan kawng hawn a ni,
Chhandamna zawngtute tan,
Mi hausa leh retheite pawh,
Hnam leh chi tinrengte tan.
Chu kawng kan panna kawnga harsatna kan tawh ve tlemte ai chuan, theihna engmah kan nei lo tih inhre reng chunga kan duh loh zawnga thil lo thleng thin te avanga lungngaihna tur ai chuan, khawvel thlemna hrang hrang kara amah kan thlan avanga hrehawm kan tuar ve te ai ngawt chuan, nang leh kei tehlul tana vanram kawngkhar lo inhawng ve ringawt mai chu ngaihtuah tham a va tling em! Kawngkhar mawi chu kan tan hawn a lo ni ve reng alawm maw le!
Aw, khawngaihna a va thuk em!
Kawng chu ka tan hawn a ni e...!
-Aremruati Ngente
Amen
ReplyDelete👍👍
Delete