KA NU TINRENG DAMDAWI

"Nu, ka pum a na..." tiin zanlaiah a mu tui lai ka kai tho a. Ka nu chuan a awm ngheng chial a min pawm betin, vana awm Pathian a tih hnenah chuan a ṭawngṭai a. A "Amen" hmain tui takin ka lo mutthilhsan leh daih a. Varṭianah ka lehkha zir ka thiam theih loh avangin ka ṭap a. Ka nu chu a rawn tho a, ka lu chunga kut nghatin a ṭawngṭai a. "Lungngai reng reng suh aw, Pathianin a awmpui che ang a, exam naah ṭha deuhin i chhang dawn a nia" a ti a. Choka lamah pheiin thingpui min lum san a, thlamuang takin ka zir chhunzawm ve mai ṭhin.

Ka khua a sik changte, ka lu a nat chang te, chhun lama ka infiamna a ka intih pemna, ka hliam a nat zual chang pawhin. Eng na pawh nei ila, ka nu chuan a nachhawkna ngai reng bak a hmang ngai lo. Damdawi bur ban lovin a awm ngheng chiala min pawm beh loh leh a kut ngaihawm tak kha ka lu chungah a rawn nghat a. A ṭawngṭai mai thin. A tawpkhawk pawh thleng ila, ka thlamuanpui ber ka nuin, "Pathian chuan engkim a tithei..." a tih rualin, hlauhthawnna leh thlaphanna zawng zawng pawh, a bo nghal duak mai thin. Ka nu ṭawng ri ka hriat theih hmasak ber leh ka chhui hlat theih ber chu, ka tana, a ṭawngṭai ri kha a ni.

Ka nu kha lehkhathiam a ni lo a. Ziak leh chhiar chu a thiam ve. A thil chhiar laiah saptawng thumal khat a lo tel chuan, "Hei hi eng nge a awmzia?" tiin a bul ami te kha min zawt nghal zel mai. Bible erawh a hunawl apiangah a chhiar a. Zan mut dawnah min kuah chial chungin, Bible thawnthu min hrilh thin a. A chang chuan mumang ramah a thawnthu min hrilh te kha ka lo hmuh chhunzawm hial thin. School ka kal ṭan tirh te bak chu, ka zirlai ka thiam loh min hrilh thei ngai meuh lo a. Min ṭawngṭaisak tawp a, "Theihtawp chhuahin zir la, Pathianin a rawn tanpui dawn che tih ring tlat la, Pathianin a rawn pui ang che" tih kha "Ka nu tinreng damdawi" hman dan chu a ni mai. Zirna avangin hmun dangah ka awm bosan a ngai a, ka ngai em em ṭhin a. A bikin ka damloh chang te, harsatna ka tawh chang te, ka exam dawn te hian, amah kuah chunga min ṭawngṭaisakna ri ngaihthlak ka chak ṭhin.

Khawvel hmasawnna tuifawn ang maia inlet but but reng karah, thiamna leh finna sang chak hle mah se, mihring thiamnain a theih chin bak a thlen chang a lo awm a. Exam hall-a khawsik sang vanga ka thlan a tlak bawrh bawrh lai te, nikhaw hre mumal loa dawhkan ka bawh tawp lai te, an nachhawkna sang ber ber min pai chunga Doctor ten an beiseina sang ber nena min thlahliam dawna, "Ka nu tinreng damdawi" min sih hmuh chiah khan, ka nu damdawi nihna tak tak chu ka var pawh chho ta a. Chutah chuan eng dinhmunah pawh hnehtu chakna thuruk a inphum tih ka hmu fiah tial tial bawk.

Amah ka bulah awm thei lo mah se, a bula ka awm chhung zawng khan chu damdawi hman dan chu, a ṭangkaina leh a thiltihtheihna te nen lam min lo zirtir diam tawh avangin a taka hman ṭangkai chiah chu ka hmabak a ni. Chu damdawi chuan natna khum atanga ka thawhhma vat zo a, buh seng thlenga tha thlahlo turin chakna min pe a. Khur zawih zawih chunga dawhsana ka lawnin inrintawkna min pe a. Ka ngaihtuahnaa ka theih ang ang ka thun luh ve te chu min thlitfim sakin, a tawk tein min bun chhuahpui a. Chu damdawi chu ka nu a awm lohna hmuna ka thlamuanna, ka nu aiawhtu a lo ni ta. Lehkha thiam lo, nu mawl mangte emaw ka tih thin ka nu khan, finna zawng zawng kawltu be tura chabi hawn dan min zirtirin, a chabi pawh hmeichhe naupang te tak te ka nih lai khan, min lo pai daih tawh hi a lo ni a. Ka hma lama thil lo thleng tur hre lawk lo a, hlim taka ka nuih lai khan, pen khat lekah thihna kawngkhar ka chhir hawng thei a ni tih hriain, khawi hmunah pawh ngaihngam taka min thlah liam theih nan, ka nu chuan  a tinreng damdawi min lo pai diam tawh hi a lo ni.

Hmasawnna khawvel hian thihnain min lak hran hma hauhin kan hmangaihte leh min hmangaihtute  nen min then hrang fo a. Eng chen nge kan dam ho dawn tih pawh inhre lovin kan damkhawchhuah nan inthlahlel tak chungin keimahni a nun kawng hran zawh turin kan inthlah a tul fo. Kan nuna mi pawimawhte hlutna kan hriat nan an awm loh kher ngai lo mah se; engtik lai pawha min veng rengtu tih kan hriat chian em em Pathian meuh pawh khi lungngaihna leh thlaphanna, innghahna tur dang neih tawh lohna nun ruakin, a hlutna min hmuh fiahtir leh zual fo si. Zan khat chu ka lehkha zir taksa leh rilru chau tawh lam chuan zai ka ngaithla a, Dolly Parton hla pakhat ka lo la ngaihthlak ngai reng reng loh hi ka hmet chhuak nawlh a,   

The bright lights of the city are a pretty site to see,

Perhaps they’re extra pretty to a country girl like me,

Temptation waits at every turn and it won’t let me be,

So mama when you pray tonight,

Say a special prayer for me

I miss your tender good-night kiss of love and understanding

The good-night kisses i get now are cruel and so demanding

So mama when you pray tonight

And while you're on your knees

Mama say a special prayer for me.

Khuarel mawinain a hual vel thingtlang boruak thianghlim kara seilian Dolly Parton-i’n hlawhtlinna tlang sang lawn tura a pan khawpui nun thawpik kar atanga, atana ṭawngṭai tura a nu ngenna hla chuan engtin emaw tak hian min khawih a, ka lung a tilêng a, ka nu ka ngai a ni. Zan reiah chuan khawpui thawm pawh a reh duk tawh a, a khat tawka lirthei tlan ri leh vung vung thin mai lo chu thawm dang hriattur a awm meuh lo. Tukverhah ka dak a, in tin atanga êng rawn de sep sep te chu ka thlir kual a, thlifim a rawn thaw hiau hiau a. Thil tam tak hriat loh ka nei a, thil tam tak hriatthiam loh ka nei ṭhin. Ka nuna thil thleng ngei pawh hriatthiam harsa tih chang ka neih fo laiin, thil pakhat erawh a finfiahna hmuh kher ngai loa chiang taka  hriat ka nei . “Zanin hian ka nu chu a awmna hmunah ka tan a ṭawngṭai ngei ang.” tih hi…! Engtik niah emaw mihring theihnain a dan rual lohin thihna kut vawtin min la man ve ang a. Kir leh tawh ngai reng reng lo tura lak bo ka la ni ve ang. Chutih hunah chuan,

Ka nu min ṭawngṭaisak zarah,

Rammawiah khian ka leng ve ang

-Judson. W. Van de Venter