Thinrimna

Han ngaihtuah chet chet ila, kan thinrim chhan tam ber hi kan nuna thil lo thleng turah duhdan kan nei a, kan mihringpui ten kan chunga an rilru put tura duh emaw kan chunga an tih tura duh emaw kan neih a, kan duh anga a lo thlen leh si loh vang a ni fo.

Kan nuna thil lo thleng tur apiang lo herh ngil a, duh dan dana lo siamrem turin Pathian kan ni lo a, kan mihringpui ten an tih theih ang bak theihna kan nei si lo. Kan mihringpui keimahni ang tho a, ngaihtuahna leh thluak nei chuan ngaihdan hrang pawh an nei ve thiang ang chu, chuti zawnga thlir chuan mihring nunah hian, han thinrim hluaina tur thil hi a thleng tam viau lo. An thu thua kan awm peih bik loh laia kan duhdana lo awm tir vek tum hi a fuh ber lo.

Kan nuna thil thleng zawng zawng chunglam remruata chhun luh vek mai pawh hi a dik ber lo, kan lungngaihna, kan natna leh, kan beidawnna tam tak hi chu keimahni kan insiamchawp a ni. Kan thlir dan leh kan insiamrem duh dan azira danglam daih thei a ni.

Thinrim thei miah lo mihring nih chu, thil tha ber leh thil dik ber pawh a ni chuang lo, engkim pawmzam a, rilru nem taka hmachhawn vek hian insiamthatna lam kawng a hawi hleih theih loh chang a awm ve fo, harsa ber leh tha ber si chu rilru fima a chhan leh a siamthat dan kawng zawn hram hi a ni. Mihring nuna thil hlu leh mawi ber ber te hi a awlsam ber ber an ni fo si lo a.

Kan mihringpuite nena kan inlaichinnaah hian siamrem a, ngaihtuah a, zir nawn ngai fo thil tam tak a awm a. Mahni inhlamchhiah thak si lo a, midangte nena kan inlaichinna a that zawk nana insiamrem harsa kan tih viau chuan, kan mi uap a na viau mai thei.

Mihring thinchhe deuh, vin reng, thinram em em bula awm nuam kan tih bik loh laiin, chutiang mi ni chung chuan midang min ngaihsak hliau hliau tura beisei tlat emaw, kan bula awm nuam ti viau tura beisei tlat erawh, a fuh ber lo ang.

Tu pawh hian Side A leh B kan nei vek a, kan hlim thei a, kan lungngai thei a, kan tap thei a, kan nui thei a, kan thinchhe thei a, kan zaidam thei bawk...kan duh chuan. "Tumna a awm chuan kawng a awm" kan tih fo hi thinchhiatna leh zaidamna kawngah pawh Vana Pa nunah khan a fiah viau mai.

Lehkhabu fing Bible-in thinrimna/thinurna chungchang a tarlan dan han en ve reng reng teh ang.

Thufingte 14:29

Thinur har mi chu finna nasa tak nei mi a ni a, Mi ti thawt thawt erawh chuan âtna a chawimawi.

Thufingte 15:1

Chhânna nemin thinur a tikiang thin a, Tawng huatthlala erawh chuan thinur a chawk tho thin.

Thufingte 19:19

Thinur tinasa mi chuan hrem a tuar ang, I chhanchhuah pawhin, chhanchhuah leh thin a ngai ang.

Thufingte 29:11

Mi â chuan a thinur thu zawng zawng a sawi chhuak a, Mi fing erawh chuan an thup a, an ngawihpui thin.

Thufingte 29:22

Mi thinurin insualna a chawk chhuak a, Mi thinrimin bawhchhiatna a ngah thin.

Thuhriltu 7:9

I rilruah I thinur hmanhmawh suh, Mi âte tang laiah a cham thin, thinurna hi.

Thinchhiat chu a thlanawm viau ta hauh lo mai a.

-Aremruati Ngente