KA NU HUAN MAWI

Kawlkilah ni tla tur a inphan diar diar a, a thlen phak chin leilung a en riai a, maian leh behlawi hnah an nunna tui thianghlim dawng hlim te chuan ‘khawvel neitu kan ni a lawm’ ti niawm fahran hian inchhuang takin an hnah hring hlap mai chu an rawn dah chhuahpui larh larh a, huan hungna pala rimenhawihi zam dem dem leh a piaha artukkhuan par rawng chi hrang hrang te chu, a chawi vul tur tawk lekin ni zungin a lo kap sêt sêt bawk a.

Thlifimin thing hnah a chhem thle nghial nghial a, phul chunga hnahthel tla ro leng der der te karah, huan sira lui kawr tui luang ri her her pawlh mawi tur tawk lekin, sava te chuan thingzarah tlaitla eng awiin hlamawi an lo rem a. Ral lehlam tlang dumpawl reih, romeiin a bawm chiai chiai laia a liamna kawlkil pan mek nitla turin a mawina famkim a pho chhuah laiin, leilung hian, thinlungin a ngaihthlak nin theih loh hla mawi ngaihnawm a chhuah thin- ka nu huan mawiah khan.

Hmangaihna vanga din huan mawi

Pathian fapa mal neih chhun, Isua krista hmangaihna vang liau liaua vanram ropui kalsan a, khawvel misualte chhandam tura a rawn piang ang deuh khan, chu huan mawi chu ka nuin hmangaihna vang liau liau a , a fanu duatin a duh leh mamawh ei leh in tur a hmuh nana a din a ni. Chu huan hlu tak chu khaw daifemah a awm a, mau a siam pal hmangin uluk taka hung a ni. A chhungah chuan huan neitu nu, ka nu ngei mai khan thlai chi hrang hrang a ching a. Mai leh behlawi, anṭam, hmarchapui, bahkhawr thlengin a ching a. Chung thlai chi te chu hmangaihna nena tuh leh chin an nih leh zel bik vang a ni mahna, tuk tin Angel ten van daifimin an rawn chawm ziah emaw tih mai tur hian hnah hmasa ber atangin an hring duah hlap reng mai a. Chu huan kalpeltu apiang te chuan, ngawi renga pelh mai harsa an ti ṭhin.

Eden huan ang deuhin, chu huan sirah chuan zo tui thianghlim tak a rawn chik chhuak a, huan chhung a thlai hrang hrang te pawi sawi lo leh an mamawh phuhru tur tawk lekin a luang dem dem reng a. Chhuah lam leh tlak lamah zing nichhuak leh tlai nitlain tuk tin leh zing tin, kal kan thiang lo kawng ang maiin a pal tlang ziah bawk. Chu huan mawi chu hmangaihna nena din ni  mai lovin, hmangaihna vang liau liaua din anih avangin, a chhehvel boruakah chuan duhsakna chi tinreng a leng chiai chiai reng bik ni hian a hriat a. Rangkachak leh tangkaraw hmanga din ni lo mah se, lunghlu leh lung man tama cheimawi ni lo mah se, chung zawng zawng belhkhawmin a lei phak loh, thinlung chhungril ber aṭanga chhuak hmangaihna hmanga din a ni miau a ni.

Duhthusam khawvel kawltu

Chu huan mawi chuan tuk tin leh tlai tin khel lo va tlawh ziahtu a nei a. Thlai hnah tui pe tur leh bawlhhlawh thianfai tura kal ziah thin, chu huan mawi din anih chhan hmeichhe naupang duhthusam leh beiseina khawvel zawng zawng inṭanna chu kha huan mawi kha a ni. Vartianah kawlkilah mawi takin ni a lo chhuak a, huan mawi chhunga thlai hnah hrang hrang leh huan sira tui luang thianghlim tak chu a rawn chhun de set set a. Huan sira thing ding thelh sung kar atangin sava te chuan hmeichhe naupang rilru thianghlim tak, anmahni thlahlel em em thintu tan duhsakna hla mawi an rawn hlan a. Intlansiakna leh duhamna rilru tel hlek lo va hmeichhe naupangin a ngaihtuahnain a tlin phak tawka sang ber duhthusam ram a din lai khan, chu huan mawiah chuan vanram tlafual din a ni thin.

Intlansiakna leh innekchepna khawvel nunrawnzia hmu thiam turin, nun zinkawng a la zawh thui lo a. Mi ten an duhthusam ram nei thei tura an hun leh tha mai ni lo, an nunna hial pawh an thap thin dan a la hmu thiam hek lo. An neih zawng zawng tha leh zung, sum leh pai seng rala an um ṭhin, an duhthusam ramah chuan lalthuthleng luahin, chawimawina sang ber hum thet thut mah se, chu hmun an thlen hunah meuh chuan nun thawnthua ni eng chhuah that tir leh turin khua a lo tlai tawh a, an nun chawhnu ruihah lemchangin, chhungril thawpik leh ruak ngawih ngawihin hlim hmel an chhuah thin a ni tih a la hrethiam ve lo, ani chu thinlung takin a nui thin si a. Hlawhtlinna leh hlawhchhamna inkara beiseina dintuin a damchhunga a tawn theih hlimna a tem thin a ni, tih hre lo mah se, chu beiseina khawvelah chu chaihin, hlim takin a lam a, atan chuan khawvel hi siam zawh hlim ang maia thianghlim a la ni si.

Hmasawnna leh takna ramri

Ka nu huan mawi khan takna hrilhfiahna zawng zawng hi a awm kim vek niin ka hre thin. Kha hmunah khan mihring kutkawiha din leh hmehbel chawp thil a awm lo a. Huan chhung leh pawn lama lang thei chin ram luahtute chu, mihringin a thluak bur zawng zawng bun ruak vek leh a kut ke zawng zawng rawp ral raih khawp pawn bei ngial mah se, a din chhuah theih ngai loh tur khuarelin ro a relna hmun a ni miau si. Kha huan neitu ka nu khan a fanu thlai ngainat ber ber ching khawmin, hmangaihna nen nitin a enkawl ṭhin. 

Ka nuin kha huan a din duhna thinlungah khan, tu emaw chawimawi tum anga lang si a, a phena chawimawitu lo mawi ve phet tumna thinlung a tel lo a. a tum ber chu thlai tharlam leh thianghlim tak tak, a fanu rilṭam dawmtu tura thar chhuah kha a ni. Tuk tin leh tlai tin tui thianghlimin a chawm a, berh leh bal hlau hlek lovin bawng ek leh lei tha a ham pherh nawk nawk a, a huan thlai te chawm nan a hmang thin. A tum a hlen theih nana chung bawlhhlawh a khawih bawrh bawrh te chu, siamtu thlirna mitah khian a thianghlim em emin ka ring a ni.

Mahse, intlansiakna khawvelah hian ṭhiah thiang lo hmasawnna leh takna ramri kham a ni a. Hmasawnna khawvela cheng te tan chuan khuarela takna inphum chu hmuhsitawm a ni a, an hmasawnna daltu a ni. Mihringin amah a inchawimawi nan, din sa leilung ṭhiatin, din chawp thlaler ramro hmangin khuarel mawina a khuhbo a. Hmasawnna khawvel thara cheng ten fai taka hlemhletna bawlhhlawh an ban rualin, khuarela takna inphum leh ka nu huan mawi telin, khawvel huan mawi tam tak te chu, leilungah hian an bo zo ta.

Suangtuahna vir tawn

Atak ram atanga suangtuahna lem a din thinna khawvel nuai bosak anih miau avangin, takna rama leilung mawina chaihtu suangtuahna hlimawm chu a letling zawngin a inher let ta. Takna rama hlimthla a dinna leilunga boruak thianghlim tam tak nuai bo a nihna, thlaler ramroah chuan, chhungril hahchawlhna neitu pawh hahchawlhna zawnga kutdawh, mi rethei vakvai mai a ni tawh a. A tak ram atanga din chawp khawvel mitthla ṭhintu khan, dinchawp khawvel atangin takna leilung ngaiin a nun thawnthu a let zawngin a chhiar ta. 

Hlimna huan mawi aṭanga khawvelin mi hlawhtling nihna a pek te khawvel thlir ṭhin tu khan, hlawhtling inti ber ber te nun ruak bengchheng ngaithla chungin, hmasawnna leh intlansiakna khawvel a mi tam tak inpel suau suau te khawvel a ṭangin,  a suangtuahna khawvelah inelna rilru pu hauh lo ram pangpar rawng chi hrang hrang te rimtuina a hip a ngai ta si. Chu lemchanna khawvelah chuan, a tak rama a fan nawn theih tawh loh kha huan mawi khan mihringin a duhthusam ram a din theih zawng zawnga ai a thuk zawk mawina leh hlutna a pai a ni tih a hre nawn leh thin.

-Aremruati Ngente