Ihmaw…

Nikhua a hriat a, ngaihtuahna fim a hman ṭan theih phat ata mihringin a thinlunga zawhna bo thei lo a zawnna nun kawngah hian nangmah ang thoin ka zawhna chhanna hmu loin ka vakvai fo  a. A khawvela thil thleng ngei pawh a hriatfiah thiam loh avang leh, a ngaihtuah tam luat avanga sawi tur haihchhama ngawih chuh leh mai zawk ṭhin he mihring hian leilung che velin a her pui nawk nawk ṭhin nun thawnthu mak tak tak te hrilhfiahna zawng ka pe thei bik lul lo che.

Hmasawnna uma chak taka mihring a tlan lai hian, intlansiakna tual zawla a hloh tak te avang zawka nun hlutna hmu thiam turin mihringin tuarna engzata tam nge a mamawh ka hre lo a. Thinlung taka a nuihna hlutzia hmu thiam turin nun hian mittui far engzat chiah nge a phût ka hrilh thei lo che. Hlimnain khawharna nun hmu thiam lo tura a kuangkuah laia a khawvel humhim tur leh chântu nun dai baw lo turin, mihringin vanneihna engzata tam nge a mamawh ka hriat lohna zat zetin, a, vanduaina khawdur a liam huna nun chhimbal a zam theih nan, nun hian tuarna engzat chiaha tam nge paltlang a mamawh ka hre si lo.   

Remna hlutzia hmuthiam turin khawvel hian indona vawi engzata tam nge a la hmachhawn dawn ka hre lo a. A thinlunga huatna meipui alh mek kara ngaihdamna tuifim luanluhtir turin, huatna chuan vawi engzata tam nge tuamdamna mamawh thinlung a lo nghaisak ṭhin ka hre hek lo. Enteh maw! Chatuan pawha nghing thei lo tur hmel pu khawpa tlang sang leh ropui tak tak inkham ruah mai te hian, tuipui fawn vela kara ding nghet tlat turin engtiang chiaha thukin nge leilungah zung an kaih ka hre lo a.  Tuipui kama ṭiauvut chhiar sen loh te hian an awm hmun nghet luahlum turin vawi engzata tam nge an awm hmun sawn sak an nih hmasak ṭhin ka hre si lo.

Mihringin a zalenna a hman thiam nan vawi engzata tam nge ama siam taninah a inkhung ngai ang a? Amah hliaptu van dumpawl mawina hmu thiam turin vawi engzata tam nge mihring hi a dah chhuah ngai ang? A mihring puite ṭap thawm hre phak turin mihring hian beng engzat fakau nge a mamawh a? Thlanmual lama ruang liam zut zut kara nunna hlutzia a hmuh thiam nan, mihring chuan a beng hriatah vawi engzata tam nge mitthi dar khawn rik a mamawh? A hun kal tawh leh hun lo la kal turte amaha an inthlunzawm dan pawh hmu thiam lo mihring hian chung zawhna zawng zawng chhanna chu pe thei lo che mah se, thlifimin a len bo tawh nun hlimthla thlenga hmaih lo a, a  thinlunga zawhna chhanna lo zawng ṭhintu Bob Dylan chuan heti hian a ti a,

How many times must a man look up,

Before he can see the sky?

And how many ears must one man have

Before he can hear people cry?

Yes, and how many deaths will it take ‘til he knows

That too many people have died?

The answer, my friend, is blowin’ in the wind

The answer is blowin’ in the wind…!

Hnahthel tla ro ang maia thlifimin a len bo tawh nun hlimthlaah chuan amah inhmu mah se, amaha amah lehlam hmu tura nun darthlalang mamawh fo ṭhin mihring hian chung zawhna zozai chhanna chu engtikah mah a pe thei ngai dawn lo che. Hmasawnna khawvel laka zalenna famkim neitu ni mah se, dinchawp leh belchawp thil ten an tih buai phak loh ram pilril a mawi taka lo vul ve mai tura hling leh bawn kara a talchhuahna hliam leh, ruahpuivanawn leh nipui sensain a sawisakna hliam zozai pawh sawi chhhuak lo tura ngawi renga Ram Pangpar a lo vul mai khan, chu chu leilung pianken a ni an ti asin!.

Hetah hian eng nge hlu ber a, he nunah hian eng nge ka tih theih ropui ber, tih ka ngaihtuah chang hian keimah ka inen a, leilung leh i hmaa nun thawnthu ropui chhawpchhuak turin engmah ka nih lohzia ka inhmu nawn leh ṭhin. Mahse, a zawn chawlhna hmu si lo va, intlansiaknain a sawp chauh tawh mihring tan chuan a hloh hlepa chhiarna kawng a awmin ka hre ta. Nun thawnthu lungchhiatthlak leh thimna ruam a paltlang tawh zawng zawng te kha, awmze nei lo turin a nun kawngah chhawpchhuah a nih ka ring lo. Dikna hmanga siamṭhat ngai reng khawvelah hian, diknain buaina a chinfel zawh loh chang a awm a, dikna hriâm chuan a tehfung neitu ngei pawh a ah chang a awm fo si a tiraw? Pawmnaah hian beidawnna nge hriatthiamna hlimthla i hmuh len zawk a? Dikna tehfungin a teh tlin zawh ngai loh tur nunah hian ngilneihnain hlutna engzat chiaha thuk nge neia i lo hriat ve ṭhin.

Tehfung ṭha ber ber i lek chhuah huna khawpuia chhunga huan mawi leh ropui ber ber hel a, ram reh pan leh mai tur Ram Pangpar chuan he hmasawnna leh intlansiakna, mihringin changkanna uma a mihringpui a rah behna nunah hian hahchawlhna a hmu lo a. Mihringin hmasawnna um tura khuarelna takna a thaibona nunah  hlimna a hmu hek lo. Ropuina leh hmingthanna aiin khuarelin a nihna tak tak a lantir theihna hmunah mawina a hmu a. Fing leh ṭha ber nia inhriatna aiin ngilneihna leh pawmnaah chawlhna a hmu zawk ṭhin si a.

Pawmna kut mi pe la,

Hriatthiamnain ka chelh ang che...

-Aremruati Ngente

030621