Ṭhangtharte khawvelah Hlahril (poetry) in ro a rel a, hmana a bu-a an khawr pum ngam loh kha tunah chuan mahni in lumah, duh duh huna keu theih turin an rawn chhawp chhuak ta nak nak mai. Hmasawnna ṭha a va ni em! Lehkhabu, a kawm aṭanga chhiar chakawm tak leh mi hip veng veng thei a awm a, chutiang lehkhabu chu he 'Sêih' hi niin ka hria. A ziaktu a duhawm ang bawkin a chhung thu pawh a duhawm a, a ngainatawm a, zûn a nei tih phat rual a ni lo e.
Hlahril 82 zet a awmna, phek 152 a chhah ni bawk he lehkhabu hi phek khatna keu tawh chuan keu zel chakawm a ni a, a tawp lam aṭanga chhiar pawhin a inhnehrem vek maiin ka hria.
Ka duh zualte hi ka rawlruk ve hrim hrim ang che u- 'Ka awm tawh lo ang' tih te 'Lei Angel' tih te 'I tan' tih te 'Hnahthel tla ro' tih te 'Chhungril Indona' tih te 'Van daifim' leh 'Literature ropui ber' tih te hi chhiar nawn tluk tluk tlak a tling.
Ṭhalaite lunglen zawng, upate tan pawha ngaihnawm tho si a ziak thiam em em a, 'Sêih' ami bik phei hi chuan a huapzauin tu tan pawha inchhiar lunglen veng vengna tham a ni-
'Khawfing chat tur inṭham laiin
Zing savate an zai hunah
Leilung rimawi a rik laiin
Daifim tling khawm karah
Sêih mawi min bân la.
Ṭuahpui leh vau an vul laiin
Hnah hring chawr no karah
Zoram nipui a vul laiin
Thlifim leng vel karah
Sêih mawi min bân la.'
A han ti vawng vawng mai a...Aw!
.
Khuarel mawinain a hneh, ram pangpar anga inchan ṭhin nula hian a thinlung thianghlimna leh mawina chu he lehkhabuah hian a sawr chhuak hneh hle a, a chhiartu tan pawh engkim, hawina lam apiang an mawi thar niin a hriat theih.
'Hnim hring chungah daifim a de sêt sêt a
Pangparin rawng mawi tinreng a chhuah laiin
Leilung hian a mawina famkim a pho chhuak ta emaw ka ti hial ṭhin...'
'Chhun vang laia van dumpawl ruih leh
Chhûm var inthuah tep tep te
Mawina tin reng khuma pangpar vul chîk chêk lai leh
Thlifimin thinghnah a chhem rik seng seng lai te hian
Chutah chuan nangmah ka hmu ṭhin che.'
Ziah vek dawn chuan ziah chhuah duh ka ngah si a, a bu ami kha lo chhiar chhunzawm teh u. A ngaihnawm inti ve ngei ang.
.
Mihringte hian cho phurtu leh fuih a, nawr kaltu kan mamawh reng a, puihna mamawh lo reng reng kan awm si lo. Beidawnni-a min hnem a, min chelh turin Aremruati hi ka thlang ngat mai.
'I damna thlen turin
I nun ruak hnawh khat turin
I hliam tuam dam turin
Theihna ka nei lo a ni mai thei
Mahse, engtik hunah pawh he thinlung hian
'Hriat thiamna'-in a ngaithla ṭhin ang che.'
'I ngawih rengna thuruk kha ngaithla turin ka inpeih a...'
a thlakhlelhawm hliah hliah inti ve lo maw?
'Tlâwm la' tih chânga mi-
'Thinrim lo la
Haw lo la
I hliam kha thlir la
Na leh la
Ṭap leh rawh
Nang chu,
Hmangaihtu ni tura duan i ni a
Hawtu ni tura duan i ni lo
Nang chu,
Tuam damtu tura duan i ni a
Hliamtu ni tura duan i ni lo
Nangmaha nangmah ṭha ber
A lan chhuah theih nan
I tlawm a ngai leh ṭhin.'
Nitina kan mamawh, mahni leh mahni kan inhrilh fo ngai ṭhin hi chiang takin a rawn ziak chhuak kelh asin.
.
A thui lutuk dawn, a hla hnuhnung ber, 'Literature ropui ber' tih hi ka Poetry chhiar tawh zingah chuan a ropui ka tih berte zinga mi a ni. Chang 7 hi Article phek eng emaw zah hen a ni hial ta ve ang.
'Lehkhabu pakhat a awm a
I zawhna zawng zawng chhang theitu
I hriat chak zawng zawng hrilh theitu che
Hriar loh leh hmuh theih loha thuhruk
Lehkhabu ropui a ni'
'Lehkhabu pakhat a awm a
Beidawnna ruama beiseina thar pe tur che leh
Lungngaihna zan thima khawnvar chhitsaktu tur che
I chakna thahrui thuam thara
I thlaphan huna thlamuantu tur che
Eng lehkhabu dang mahin an kawl ve ngai reng reng loh
Nunna thawa thawk khum
Lehkhabu nung a ni.'
Bible awmzia hrilhfiah nan hei baka fiah leh chiang hi a awm tam bik kher lo ang.
Hetiang ziah chhuahna lehkhabu hi a la nei ve lo ni duh miah suh.
Inawm tlei nan lo hmang ve la, I inchhir miah lo ang tih ka tiam che.🥰
(Febry. K. Zonunmawii hi ṭhangthar Poet ṭha ber te zing ami a ni a. A poetry bu 'Chawlhna Thingthiang' chu Mizo Academy Of Letters in Book of the Year, 2020 an thlannaah a ṭha zual 10 thlan chhuah zingah a tel nghe nghe a ni.)
Comments
Post a Comment