C.C.COY. No.27 in mihring mihrinna a tarlan dan (Reflection of humanity from C.C.COY. No.27)

-Lalremruati Ngente

Kamkeuna: Encyclopedia Britannica chuan Novel a hrilhfiahnaah, “Mihring chanchin (history)-a thil thleng tak tak ni chiah si lo; mahse, thil awm ngei ni thei si hi a ni e,” (Theory Of Literature, 97)  a ti a. “Literature hi mihring nun hlimthla tarlanna Darthlalang a ni”  (Literature Lamtluang, 7) han tih te nen hian a inhlat lo hle. Mihringin minung anih chhunga a chhungril duhna (desire) tihlawhtling tura a theih tawpa a umna kara mihring nun chhia leh ṭha a pal buak nawk nawkna, chhun leh zan inkara lungngaihna leh hlimna, vanneihna leh vanduaina, nun thim leh eng inkarthlak ten a nun thawnthu an ziahsak laia mihring inlaichinna hlutzia fiah taka a lan theih nana khawharna leh malna kara duhsakna leh ngilneihna hlimthlain a lailum a luah tlatna thawnthu C.C COY. NO. 27 hian engtin nge mihring mihrinna a rawn tarlan i han thlir teh ang.  

Mihring mihrinna (humanity) chu eng nge? : Cambridge Dictionary chuan, “Midang chunga ngilneihna leh hriatthiamna lantir” (Cambridge School Dictionary, 370) tiin a hrilhfiah a. Miriam-Webster-Dictionary chuan, “Mihring, mihring a nihna tur ang taka a awmna” (Humanity, Meriam-Webster.com) tiin a hrilhfiah ve thung. American Humanist Association in Humanism an hrilhfiahnaah chuan,

“Humanism chu hringnun chhuina leh rin dan ṭhang/hmasawn reng, pathian rinna emaw thlarau lam thil rinna tel lo hian nun dik leh ṭha,mimal lungawina leh thil ṭha tih theihna leh mawhphurhna kan nei tih nemnghettu a ni” (American Humanist Association, Definition Of Humanism)

an ti a. Mihring hi amah siamtu (Creator) in a din danah, thilsiam dangte aia nihna sang zawk a pek miau avangin, mihring chuan thilsiam dang nunna nei ve tho, ran leh ramsate, thingkung, thlai leh pangpar ten an neih ve loh thlarau a nei a. Thil nung dangte ang a ei a, in ngawt lo a, nikhua a hriat a, ngaihtuah thiamna a neih ruala intlansiakna khawvel a hmasawnna umtu nun a rawn pianchhuahpui nghal tlat avangin a chenna, a seilenna leilung leh a chhunga thil awm te, a mihringpuite lakah mawhphurhna hlenchhuah tur a nei a, chu chu thilsiam dang ni lo a, mihring a nihna nemnghettu a ni. Tichuan mihring mihrinna (humanity) chu “Mihringin mihring a nihna anga a mihring mihrinna a hlenchhuah a, a damkhaw chhuahna tur emaw, a din chhuahna tur emaw atana a mawhphurhna a va hlenchhuahna hi a ni” ti ila, a chiang mai awm e.

C.C.COY. NO. 27 leh a chhehvel : He thawnthua a changtu (character) langsar ber chu a thawnthu sawitu (Narrator) Ralkapzaua hi a ni. Amah dawtah chuan C.C. COY. NO. 27 neitu Bahadura (Gurkhali putar, Kuli), a Pa, a ṭhianpa J.N. Chawdhuri, an lalpa Dolura, zirtirtu Zakiamlova, Shillong Govt.High School Headmaster leh Thanglawra te hi an ni mai awm e. 

A thawnthu hmunhma (setting) hi Ralkapzaua pianna khua, Mizoram thingtlang khaw pakhat, Aizawl leh Shillong-ah a innghat deuh ber. Heng zingah hian Shillong a lang tam ber a, chu hmun chu Ralkapzaua’n a hlawhtlinna kawng a zawhna hmun pawimawh tak a nih mai bakah, a thawnthu hming putu C.C. COY. NO. 27 nena an intawnna leh nun thawnthu tam tak an ziah dunna hmun a ni. Amah Ralkapzaua ngeiin :

‘…ka nun rawn inṭan chhuahna kawng pawh chu; khi-ah khi-ah, kawlvalenchham, khawchhak Tuipui ralah, mâwlna chhum pui karah khian a zuih ral chho ve a, chu chu ka lo pian chhuah vena ram leh hmun chu a ni…Mawlna leh âtna ram ata lo chhuak tura ka beih dan erawh chu ka han ziak chhuah hian thawnthu a lo chang ta a ni. Chu thawnthu chu mite bengah eng angin nge a rik ka hre lo, kei atan erawh chuan sawi nin theih loh chatuan thawnthu nung a lo ni ta a ni’  (Lungrualna Tlang, 11)

a tih angin, a thawnthu pumpuiah hian a nun thawnthu, retheihna leh harsatna tam tak kara hlawhtlinna a sualchhuah dan a lang tam ber a. Chu hlawhtlinna sang sual chhuak tura a beihna kawnga harsatna tam tak kara chhiartute hnuk tiulh ṭeuh thei khawpa mihring mihrinna (humanity) hlimthla rawn lantirtu erawh he thawnthu hming putu C.C.COY. NO. 27 hi a ni thung.

Mihring mihrinna (humanity) mihring nuna a pawimawhna : Duhthusama suangtuahnain a tuam vel, a duhthusam um tura theihna neitu mihring tan chuan hmasawnna khawvel tehnain lallukhum a chhawp chhuahsak hlawhtlinna chu a tana thil pawimawh ber leh a nuna thil hlu ber ni mai awm tak a ni. He thawnthuah pawh hian a thawnthu bul inṭan tirh phat aṭanga hmuh hmaih rual loha thil lo lang chiang nghal em em chu Ralkapzaua rualawhna thinlung hi a ni. Chu a rualawhna thinlung chuan retheihna ruam aṭanga tlangsang tak thlir tirin, a pa pawhin ṭawmpui ngaihna a hriat loh duhthusam ramah a beiseina mit a fuk tir a. “Ka pa chuan…Sap nih ve ngaihna chu a hre lo va, babu nih erawh chu Pathian khawngaihnain a theih a ring a, sap ni tur erawh chuan Pathian khawngaihna pawhin a tlin meuh dawn lo niin a ring ni tur a ni” (Lungrualna Tlang, 17) a han ti te hian beiseina nena duhthusam tlangsang a din laia a dinhmun a tarlang chiang hle.  A tum em avanga a sual chhuah Aizawl ME School-a a result ṭha takin kawng a hawn sak avanga Shillong-a High School a kal laia a thil tawn hrang hrang avanga a zan mu thei loin, 

“Tichuan, zankhuain ka inngaihtuah a, ka khawvel pahnih, khawchhak tuipuiral leh ka lehkha zirna hmun Shillong khawpui inmil lohzia ka rilruah chuan hawn mai ka ngaihtuah ta a. Tuipui ralah khan thangthlêng te kamin tel ta mai mai zawk ila, lo sul hawnah nula tlangval zingah fiamthu nen nuiho ta rawi rawi ila, a nuam zawkin ka ring a” (Lungrualna Tlang, 42)

a han tite hian a duhthusam ram zawng zawng luah ṭhintu nun a dai buak meuh chuan hlimna leh chhungril hahchawlhna a pek lohzia a tarlang lawi si. He thawnthuah hian mihring mihrinna(humanity) hlutzia a lo lan chhuah tirtu mihring nuna thil thleng duhawm lo lam, mihring nun hlimthla vek hmanga tarlan a ni a. Chung te chu :-

Mihringin dinchawp leh belchawp(materialism) tehfung vanga a mihringpui a rahbehna : Ralkapzaua’n Shillong Hostel-a a duh lo chung a senior te laka thei ru tura tirh anih hnuah an Zirtirtute hmaa thudik a sawi avanga vuak leh tihduhdahna tinreng a tawrh laia a ṭawngkam “aw, retheih hi chu a va na tak em! Aizawl milian fate chu ni ila, thei ru tur pawhin min tir dawn si lo” (Lungrualna Tlang, 41) a tih hian khawvel hausakna, sum leh pai, nihna leh dinhmun avanga inthliarhranna nasatzia leh chung thil avanga mihringin a mihringpui a rahbehna a tarlang chiang hle a ni.

Ram inawpbehna(Colonialism) avanga mihringin a mihringpui a rahbehna : Ralkapzaua te pafa Aizawl kal tur kawng laka chaw an lo fakna an then fai dawn lai renga Chawkidarin Babu a lo kal dawn laia chaw an lo ei avanga a hauh hrep hnua, Babu-in a rawn kal pelh laia,

“…kawng thlang lam aṭang chuan ka pa chu thei leh thei lovin a fatumbu hnuai aṭang chuan a lo dak a, “Ka pu chibai” a han ti hram a. Babu chuan a en pawh en lem lo hian, “Chibai” a ti a, min kal pel a” (Lungrualna Tlang, 16) 

a tih hian hetih hun laia Babu leh Sap te Mizo mipui nawlpui laka an inlulinzia leh, anmahni ram chhung ngeia Mizo te dinhmun chhiatzia a tilang thei a ni.

Hnam inthliarhranna(Racism) avanga inrahbehna: Ralkapzaua’n King’s Commission Officer a training laia,

“Min zirtirtu chu sap sergeant hmuihmul ki van mai vek an ni a…kan han thiam thei lo deuh te chu ṭawng na tak tak main min han tiel a…” (Lungrualna Tlang, 66)

“Ka rilru chuan sapho huphurhna chu tlem ka nei a…mi hneh hi an tum ruh tlat a, chu mi ṭum pawh chuan an mitmengah ka hre thei” (…,70)

(…kan Instructor Robert Miller chuan min rawn kan ve a…Heng English misualho hi khum vek turin tlan ang che. Welsh leh Scot-ho chuan kan ṭan che u a nia) (…69,70)

tih ṭawngkamte hian hnam inthliarhranna avanga inrahbeh tumna rilru a tarlang chiang hle. Heng mihring nuna thil thleng hrang hrang te avang hian tuartu chu a chau a. A nun zinkawnga a hliam tawrh chu chawimawina lehkha leh dinchawp leh belchawp thil te hmang maia thawidam theih a ni tawh lo. Chutah chuan mihring mihrinna ngaiin mihring chu a chau a ni tih inhmuthiam turin khawharnain nun darthlalang fiah zawk a chhawp sak ṭhin. 

C.C. COY. NO. 27 in mihring mihrinna(humanity) a tarlan dan: He thawnthuah hian hmasawnna khawvel leh intlansiakna nun hahthlak tak karah ngaihnawm takin mihring mihrinna(humanity) in he thawnthu hi a a zam chiat a, chung te chu thawnthua a changtu (character) hrang hrang hmanga tarlan an ni :-

Bahadur-a : He thawnthu bu hming putu leh thihnain a lak bo hnu pawha sulhnu ngaihnawm tak hnutchhiah a a thawnthu tawp khartu a ni. Khawvel tehna aṭang chuan pa ropui tak a ni lo a, Kuli, puakphura inhlawh ṭhin ve mai a ni. Mahse, Ralkapzaua’n engmah la ni loa a inhriat laia a mihringpui tute emaw tan chuan eng emaw a nihzia inhriattir tur a, “Babu” ti a koh hmasatu leh a bungraw phurhsaktu a ni a, (Lungrualna Tlang, 32) A ṭhiante zawng zawng hmuhsitna leh tihduhdahna a tuar lai pawha zah taka “Babu” ti a koh chunga ngawi renga a puan suk tur tam tak sukpui a, a harsatna tuarpui tura inpe awm chhun a ni. (...,44)

Khasi zu rui hlaua thlabara a tlanchhiat laiin thih ngamin a thlavang hauhsakin a chhan a, zan reia duhthlan tur pawh hrethiam loa harsatna a tawh laia a harsatna zawt a, a tawp thlenga puitu a ni. (...,48, 49) Shillong-a a kal apianga a bungraw phurhsaktu, a tih tur piah lama a pindan thlenga tihfai sak ṭhintu a ni. (Ll..., 87)

Bahadur-a chu lehkhathiam pa ropui tak ni lo mah se, nun kawng chhuk chho leh hmasawnna khawvela thil thleng ten Ralkapzaua a sawp chauh a, nun khawhar taka a awm laia hriatthiamna leh ngilneihna hlimthla hmuhtirtu a ni a. Tlawm taka nun thawnthu ropui ber duhsakna leh hmangaihna zirtirtu a ni. “Be a light” tih hla a,

“Thlak leh siamṭhat a ngaihna hmunah chuan danglamna thlen la,

Thawm bengchheng an chhuah laiin ngaithlatu ni ang che,

A chhan chu hringnun hi thlifim anga dawn tawpin a mawi ber si (Genius.com, Be a light) (9-11)

Huatnaa khat khawvelah hian eng duhawm chu ni la,

Hliam i siamsak an awm chuan tuamdam rawh,

Thim thlazar hnuaia bibo tur i ni lo,

Eng tura duan i ni si” (…12-15)

tih hla thu ropui tak hi C.C.COY. NO. 27 Bahadur-a nunah kan hmu a ni.

Thanglawra : Lunglei lam mi, Shillong High School-a pawl riat zirlai a ni a. A senior leh a Mizo pui ten Ralkapzaua an tihduhdah a, hmuhsitna tinreng nen an vawm zui lai a, beisei let nei loa Ralkapzaua laka ngineihna leh duhsakna hlimthla rawn lantirtu  ni. A Mizo zirlai pui te zawng zawngin an biak duh loh laia Thanglawra’n chithlum mum a rawn pek avanga Ralkapzaua ṭawngkam, “…mi zawng zawngin min haw lo a ni tih ka hriat chuan ka awm a nuam ta sawng sawng a” (Lungrualna Tlang, 46) a tih hian mihringin a mihringpui a mamawhna thûkzia a tarlang chiang hle. Zara’n 

“…mihring hian rit a phur ṭhin a, harsatnain a hmuak a, nun ram chau ngawih ngawiha ni a vui liam chang a awm ṭhin. Chutiang hunah chuan a ni mihring hi amah maia awm tur ni lo va siam a nihzia a lo lan a, hmangaihtu leh ṭanpuitu kutphar hmuh châka mihring hian a mit a len tak ṭhin ni” (Zing Daifim, 78)

A tih angin lungngaihna ruama a mihringpui chelh tura ban phar a, ngilneihna hlimthla hmuhnawm tak rawn tarlangtu a ni.

Chawdhury : Ralkapzaua classmate, mi hausa fapa a ni a. Lehkhathiam thei leh nungchang mawi tak, Ralkapzaua pawhin a tluk hleih theih loh a ni. (Lungrualna Tlang, 51) Ralkapzaua’n a leh pelha lungawi lohna leh thikna rilru pu miah lo a, thinlung taka lawmpui theitu a ni. An chhungkuain Ralkapzaua chungah ṭhat an chhuahin an ngilnei em em a. (..., 58-60). A pa thla khat hlawh pawh tling pha lo, Ralkapzaua pain a sumdawnna aṭanga a hlawh chhuah a, hmuhsitna tel hauh lo a, thinlung taka lawmpui theitu leh Ralkapzaua pawhin engkim a hrilh ngamna, lemchan ngai loa zalen taka a nihna ang anga a lan ngamna a ni. (..., 62)

Shillong High School Headmaster : Zirtirtu a nihna ang a zirtirna peka lungawi mai lo a, a zirlaite harsatna hriatpui tum tlat mi. Zirlai taima leh thuawih, sum leh pai lama harsatna nei te tan chuan ama mimal sum sen ral pawh ui hauh lo mi a ni. (Lungrualna tlamg, 52) A zirlai naupang te tana pa nih tling tak, a zirtirna hmun an chhuahsan hnu pawha an mamawh huna an tana hun inpe hram hram thei mi a ni. (..., 73)

Lal Dolura leh a khawtlang mipuite : Ralkapzaua pianna khaw lal Dolura hi Mizo pa mawlmang tak ang a lang thiam, a khua leh tuite pawhin nel taka an titipui a, an fiam bawrh bawrh ngam (Lungrualna Tlang, 15) mi a ni. Ralkapzaua te khua hi khaw inlungrual leh induhsak tawn thiam tak, midang chunga ṭhatchhuah hreh lo leh ṭhenawm khawvengte vanneihna thinlung taka inlawmpui thei mi an ni tih an khawtlang mipuiten Ralkapzaua hlawhtlinna an lawmpui danah a chiang hle. (..., 26)

Ralkapzaua : Retheihna leh harsatna tam tak kara seilian, hlawhtling tura  beihna kawnga hmuhsitna leh tihduhdahna tam tak tawk a nihna chuan phuba lak châkna lam aiin a paltlang tawh tuarna chu tih tawp vek châkna a neihtir ta zawk a. 

“Rei lo teah Pawl kua te pawl sawm te ka lo ni ve ang a, chutih hunah chuan tuman min tiduhdah tawh lo ang a, ka engthawl ve tawh ang tih ka ngaihtuah a. Chutih lai la la chuan heti ang naupang chinchang hre lo nghaisak vak vak chu ka ti taw pang tih beiseina a lo lut a… ” (Lungrualna Tlang, 42). 

Lungngaihna leh harsatna karah, a beisei loh lama a chhehvela awm te aṭanga mihring mihrinna(humanity) mawizia leh duhawmzia lo tawng fo tawhtu chuan, hlawhtlinna sang tak chang a, mi zawng zawng chung en Sap/Officer anih hnuah pawh chhungril tlawmna nun pein, nun sang leh ropui taka ai a, nun mawlmang te te ngainatuah a la chhuah ta hlauh a. (...,l79, 80). Lori McKena-in,

“I duhthusam zawng zawngin a tak ram a chan a,

I thawhrimnain rah a chhuah hunah,

Lawmna hla sain zai la,

Tlawmna leh ngilneihna nun erawh vawng tlat ang che.” (Genius.com) (13-16)

a tih kha Ralkapzaua hlawhtlin hnu nunah hian kan hmu a ni.

C.C.COY.NO. 27 leh mihring mihrinna(humanity) : Ralkapzaua’n harsatna tam tak a paltlang hnuah a han officer tak luah hnu chuan a thawnthu chhiartute rilruah C.C.COY. NO.27 pawh a bo hman lek lek tawh. Mahse, a thawnthu inher dan chuan remchang takin Shillong khawpui a rawn her thleng vut a.  Mittui nena a sual chhuah nunhlui chhuilet tura Ralkapzaua’n shillong khawpui a thlen leh meuh chuan lungngaihna kara mihring inlaichinna duhawm tak rawn lantir ṭhintu Bahadur-a, C.C.COY. NO. 27 chu khawvelah lo awm tawh lo mah se, a aiah a fapa a lo awm a.

 An hun kal tawha la inhre ngai reng reng lo mi pahnih chuan, tlawm taka a damchhung nun hmang ral ta, an nuna mi pawimawh em em mi pakhat avangin mittui nen duhsakna an inhlan tawn a. An vawikhat intawnnaa, nun thawnthu tam tak a pian belh kher ngai lo a, inngaina thuk tak piantir a, mihring mihrinna(humanity) mawizia lantir lo thei loa siamtu chu, a chanchin tlawm tak hmanga he thawnthu tawp khartu midang hnuaia kun reng renga a damchhung nun hmangraltu kha a ni.

 Zara “Muṭia leh lunglen”ah chuan ama nihna theihnghilh ṭhaka nitin a hnam hrui nena midang bungrua lungawi taka phur chunga, nun hnuaihnung ber aṭanga ropuina leh changkanna hnutchhiahtu kan hmu a. (Zing Daifim, 112) C.C.COY. No. 27 –ah chuan, a dam chhung hun ṭhatlai ber ram tana hlana, sipai nun a chhuahsan hnuah pawh a hun dang zawng zawng midang puakphurh nana hmanga, inngaitlawm leh inkiltawih tak chunga a damchhung ni hmang liam ta chanchin kan hmu thung. Tlawm taka a nun hmang liamin, tlawm takin khawvel chhuahsan ta mah se, Dolly Parton-i’n

“Rit phurh inchhhawk tawn chung chuan tlangsang ber pawh lawn chhuakin,

Kan chênna khawvel hi chawlhna ram nuamah kan siam thei ang” (Genius.com) (20-22)

a lo tih kha Ralkapzaua nuna a taka thlentirtu a ni lawi si. Chu chu Army Officer pakhat, Mizoram khawchhak Tuipui ral aṭanga lo chhuak kuli(puakphur), Gurkhali putar pakhat mai vanga Shillong tuallaia a hmelhriat loh hmaa mi zawng zawng ngaihsan rawn Officer meuhin pawh a hnukulh insum tir  hlei thei loa, a rilru nem kai chhuak theitu a ni tlat si.

Tlangkawmna : Mizo Novel-a thil vang tak, nula leh tlangval inngaihzawnna nunin a pawlh nut hauh loh, mihring inhmangaih tawnna leh inhriatthiam tawnnain hmun chungnung ber a luah tlat si na, C.C.COY. NO. 27 thawnthu ziaktu Zikpuii Pa hian  character pahnih hmanga thil tam tak thlentir chunga a thawnthu a her kual thiam em vangin, he thawnthu hian eng nge sawi a tum a, a ziaktu hian eng nge tarlan a tum ber, tih pawh hriatthiam mai a harsa hle. 

Mizo Literary critic ṭha berte zing ami Siamkima Khawlhring chuan a duhsakna thuhmaah,

“Ka thingrem leh mut bu chu a la a, a kawr âwm hnuaia a a dâr phêk chu min hmuhtir a, tah chuan C.C.Coy. No. 27 chu a chuang a…He thawnthu ka chhiar chuan CC. Coy. No. 27 tih a lo nihna chhan hi mi pakhat chanchin, a chunga kan tarlan aṭang khian a ni tih ka hre nghal thei” (Lungrualna Tlang, 3)

a ti a. Zikpuii Pain a tarlan tum ni a a sawi Mizo zirlai leh zirtur te fuihna (..., x) piah lama Ralkapzaua’n a harsa taka nun a sualchhuahna thawnthu ngaihnawm tak phena C.C.COY. NO. 27 ti C.C.COY. NO. 27 tu chu hmasawnna leh intlansiakna nun thawnthu kara tlawm taka he thawnthu lo tuam chiat a, ngaihnawm taka a thawnthu hmawr bawktu mihring mihrinna(humanity) hian a rawn tarlang ta a ni, a tih theih awm e.

Hetah hian pdf download theih. 

• DOI: 
• 10.13140/RG.2.2.12356.71047

Works Cited :

Zikpuii Pa, Lungrualna Tlang, MCL Publications, Lengchhawn Press, 2012.

Department Of Mizo, Mizoram University, Theory Of Literature, Lois Bet Print & Publication, 2017

Laldinmawia. H, Literature Lamtluang, KL Offset Printers, 2020

Zara, Zing Daifim, LV Art, 2008

American Humanist Association, Definition Of Humanism, https://americanhumanist.org Accessed 1 May.2021

Cambridge school Dictionary, Cambridge University Press, 2011

Merriam-Webster.com Dictionary, Merriam-Webster, https://www.merriam-webster.com/dictionary. Accessed 1 May.2021

AZ lyrics.com https://www.azlyrics.com . Accessed 1 May.2021

Genius Media Group Inc, https://genius.com/amp Accessed 1 May.2021.