Mizo Contemporary Queer Literature Zir Chianna

- Lalremruati Ngente

Sawihawnna: Literary Criticism hmasawnna ṭhang zelin a hrin chhuah zinga nghawng nei lian chho tak, ngaih dan inang lo leh inhnialna tam tak kara khawtlang nun (society) nghawng khawpa hmasawnna kawng zawh chho mek si chu queer literature leh queer theory hi a ni. Kristian sakhuaah chuan, Pathianin mihring a siam lai khan, mipaah leh hmeichhiaah siamin, chi tam tak thlaha lo pung a, leilung luah khat turin mal a sawm a (Gen. 1:27-28). Sakhaw dang zirtirna leh khawvel mipui mimir nunphung hrim hrim pawh hemi chungchangah hi chuan, kan ngaih dan a rual khai viauin a lang. Chutih rual chuan mipat mipatna emaw, hmeichhiat hmeichhiatna emaw erawh hi chu mi tam tak rilru hian a la pai dam thei lo a, mihring nun dan phung pangngaiah an thinlungin a la pawm thei chiah lo niin a lang. 

Chutih rual chuan mahni anpui kawp duhtute thawm khawvel pumah a rawn lian telh telh a. Chu chuan thu leh hla khawvel leh film industry lam thlenga nghawngin, print media leh social media thlengin an nihna inpho langin, an au chhuahpui a. Chung mite a changtu pawimawha an telna thawnthu mai ni lovin, an thlavang hauhna thu leh hla thlengin a pung chho ta zel mai.

1. Queer Theory ṭobul: H. Laldinmawia chuan:

‘The Stonewall Riots of 1969’ tia an sawiah khan New York Police-ten ‘Mawngkawhur’ (gay)-ho inhmuh khawmna zu dawr, ‘Stonewall Tavern’ chu an dap thut mai a, chuta ṭang chuan Gay Liberation Movement hi a lo inṭan niin an sawi (Nayar 183). Hemi hnu hian pawl hrang hrang Gay Liberation Movement (GLM), Gay Activitist Alliance (GAA), AIDS Coalition to Unleash Power (ACT UP) te chu a lo piang ta a, heng pawlte hian ‘gay’ leh ‘lesbian’ te tan dan lamah te, hriselna lamah te, khawtlang nunphungah te zalenna leh dikna chanvo an neih theih nan hma an rawn la ta a. He ‘gay rights movement’ aṭang hian ‘Queer Theory’ pawh hi a lo irh chhuak ta nia ngaih a ni. (Ibid) (Laldinmawia 287)

tiin Queer theory ṭobul  a sawi fiah a. Oxford Dictionary of Literary Terms chuan:

Kum 1990 ṭantir chhoa zir chianna pakhat Post-structuralist theory zirna âng leh a bik takin Michael Foucalt kutchhuak La Volonte de savior (1976) influence aṭanga sexuality category hrang hrangte hrilh fiah nawn tumna bakah thliar hran dan thar tihchhuah tumna a ni. A bul ṭhut tak chu 1970 chho a lesbian leh gay phusa pawlho chêtna a ni a. Mahse, gay leh lesbian-te inthlah chhawnna nia ngaih chu nihna tluangtlam emaw, pek chawp emaw niin a ring thung. Gay leh lesbian mi thiam leh phusaho ṭhenkhat chuan sexual orientation leh subcultures hrang hrangte an huamtir. Queer theory hian sexuality zia hrang hrang history-a thil danglam thei te, a nghet lo laite a sawi uar em em a, he lama mi challang Judith Butler-i lehkhabu Gender Trouble (1990) hi an hman lar pawl a ni. A kaihhnawih lehkhabu langsar chu Eve Kosofsky Sedgwick kutchhuak Between Men (1985) leh Epistemology of the Closet (1990) a ni a. English fiction-a mipa leh mipa inkawpte khawtlang nun leh neih inang inkawpte pawngpaw huatna a thil inkawkalh te a zir chiang a ni. (279, 280)

a ti ve thung. Mi tam takin la pawm lo mah se. neih inang inkawpna leh nunphung pangngai pel deuh hleka mipat hmeichhiatna kawnga tlan duhna hian mihring nunah bu a khuar tel ve tlat avangin, chung thilte chu khapbeh emaw, khawvel aṭanga paih chhuah emaw ngawt theih a ni lo a.

Literature hi mihring nun hlimthla, mihring nuna thil thleng leh mihring ngaihtuahna chhungrila thil awmte tar langtu anih miau avangin mihring leh mihring ṭawngkaa a an inbiak pawhna ringawt piah lama an inlaichinna thûk ber thlengin literature-ah chuan hmuh tur a awm ṭhin. A tak rama mi tam tak ngaih dan a nih miau avangin mipat hmeichhiatna hi hmangaihna vawrtawp tar lan nan hman a ni fo a. Chu thil nena inkungkaih leh inpersan ru tak si, mipa leh mipa inlaichinna leh hmeichhia leh hmeichhe inlaichinna, neih inang inkawpna thlengin thu leh hla huangah an hlimthla hmuh tur a awm ta nual mai.

2. Queer theory awmzia: Mihring nuna thil thleng pangngai tura ngaih theih mipat hmeichiatna bakah, neih inang inkawpna leh mipat hmeichhiatna pangngai piah lama hleihluak taka khawsakna te, awm dan phung pangngai pela khawsakna thu leh hlaa lo langte zir chianna leh chhui chianna chu, heti lam hawi thu leh hla lo chhuak chho zelin a mamawh miau avangin, chung thu leh hlate awmze nei zawka zir chianna pawh a hring chhuak ve zel bawk. Queer theory sawi fiahna hi Literature Lamtluang buah hetiang hian kan hmu a:

Queer theory hi post-structuralist critical theory peng pakhat zinga mi niin kum 1990 chho velah mumal taka hman ṭan a ni (Ibid). Queer theory hian practical leh theory-a ‘neih inang inkawpna’ a huam thei a. Mipat hmeichhiatna (sex) te, hmeichhia leh mipa (gender) leh midang nunphung mil lo (mismatch)-a khawsakna a ni ber. Hei bakah hian ‘queer’ chuan serh nei kawp (bisexual), hmeichhia leh hmeichhe inkawp (lesbian) leh mipa leh mipa inkawp (gay)-te a huam vek a, mahni nihna ang lova inchei (cross dressing), hmeichhia nge a nih mipa tih hriat hleih theih loh (intersex), gender ambiguity leh mahni nihna ang lova insiam danglamtir (gender corrective surgery) pawh a huam bawk (ibid). (Laldinmawia 287)

Mizo Studies-ah hetiang hian kan hmu bawk:

He literary theory hi mipa leh hmeichhia (male/female), neih inang inkawp leh mipat hmeichhiatna pangngai (homosexual/heterosexual), dan pangngaia khawsa leh pangngai lo-a khawsa (normal/abnormal)-te mumal lo tak emaw, letling tak emawa an khawsak dan sawina a ni (Abrams 254).‘Queer’ hian tunah chuan gay/lesbian chungchang chauh ni lovn chetphung dang te, nihna dang te leh tun hmaa langsar ngai lo, heng nei kawp (bisexuality), hur herhna (sado-masochism), mahni nih lohna anga inngai (transsexual/transgender) te pawh a huam. (Nayar 158) (Laldinmawia 597)

Tichuan, Queer theory kan tih chuan mipat hmeichhiatna pangngai piah lama nei inangte khawsakna, hurherhna, nun dan phung pangngai piah lama mahni nihna lo anga letling taka khawsakna leh mahni pianpui nihna inthlak danglam chawpna te rawn lanna thu leh hla zir chianna leh chung thil lo langte chuan thu leh hlaaah eng hnuhma nge an neih tih hai chhuahna tih hian a sawi fiah theih mai awm e.

3. Queer theory-in tun lai khawvela nghawng a neih dan: ‘The Stonewall Riots of 1969’ hian heng ‘mawngkawhur’ an tihhote anmahni chanvo humhalhna kawngah a rawn cho chhuak ta tih theih mai turin, kum 1960 aṭanga 1980 inkar chhoah chuan Gay Liberation din a ni ta der mai. He Gay Liberation hi United States, Canada, Europe, Australia lamah te an inzar pharh a. Kum 1970-ah Gay and lesbian Activists Alliance chu Washington DC-ah din a ni leh a. Kum 1987-ah AIDS Coalition to Unleash Power din a ni leh bawk. 

Chung hmalakna hrang hrang chuan thu leh hla lam pawh nghawng chho zelin thuziak chi hrang hrangah a hlimthla hmuh tur a awm ta zel a. Novel lar zual deuhte chu James Baldwin ziah Giovanni’s Room te, Alice Walker ziah The Color Purple te, Patricia Highsmith ziah The Price of Salt te, Virginia Woolf ziah Orlando te, E.M. Forster ziah Maurice te, Jeffrey Eugenides ziah Middlesex te, Alan Hollinghurst ziah The Line of Beauty te, Rita Mae Brown ziah Rubyfruit Jungle te, Audre Lorde ziah Zami te, Isherwood Christopher ziah A Single Man te, Gore Vidal ziah The City and the Pillar te, Oscar Wilde ziah The Picture of Dorian Gray, John Riche ziah City of Night te, Leslie Feinberg ziah Stone Butch te, Armistead Maupin ziah Tales of the City te, Edmund White ziah A Boy’s Own Story te, Radclyffee Hall ziah Well of Loneliness te, Allison Bechdel ziah Fun Home te, Thomas Mann ziah Death in Venice te, Chineko Okparanta ziah Under the Udala Trees te, Jeanette Winterson ziah Oranges are not the only Fruit te, Michael Cunningham ziah The Hours te, Hanya Yanagihara ziah A Little Life te, Sarah Waters ziah Tipping the Velvet te, Larry Kramer ziah Faggots te hi a ni. Alan Hollinghurst ziah The Line of Beauty hian 2004-ah Man Booker Prize for Fiction a dawng nghe nghe a ni.

Poetry lamah pawh mahni anpui kawp ṭhin, gay leh lesbian-te thlavang hauhna te, an nihna leh mihring an nihna anga an chanvo leh an zalenna tlangaupuina te, an harsatna tawh an au chhuahpuina te hmuh tur a awm ta nual mai. Walt Whitman ziah I Sing the Body Electric te, Allen Ginsberg ziah Footnote to Howl te, Audre Lorde ziah Movement Song te, June Jordan ziah Poem about My Rights te, Danez Smith ziah The 17-Year-Old & The Gay Bar te, Frank O’Hara ziah Homosexuality te, Eloise Klein Healy ziah The Lyric in a Time of War te, Brenda Shaughnessy ziah Gay Pride Weekend, S.F, 1992 te, Justice Ameer ziah Body without the d te, Tim Dlugos ziah Ordinary Time te, James Fitzpack ziah A Poem for Pulse te, Robin Becker ziah A History of Sexual Preference leh hla dang tam takah hian mahni anpui kawp ṭhinte aurawl hmuh tur a awm a ni.

Movie/Film lamah pawh hetiang thawnthu tihlanna leh a changtute zalen taka an khawsak velna hi hmuh tur tam tak a awm ta. Queer movies tam tak a chhuah tak mai bakah Oscar Award hial dawng tawh pawh a awm ta nual mai. Bohemian Rhapsody (2018) te, The Favourite (2018) te, Green Book (2018) te, A Fantastic Woman (2017) te, Call Me by Your Name (2017) te, Moonlight (2016) te, The Danish Girl (2015) te, The Imitation Game (2014) te, Dallas Buyers Club (2013) te, Begginers (2011) te, Black Swan (2010) te, Milk (2008) te, Brokeback Mountain (2005) te, Capote (2005) te, Monster (2003) te, The Hours (2002) te, All About My Mother (1999) te, American Beauty (1999) te, Boy’s Don’t Cry (1999) te, God’s and Monster (1998) te, The Adventures of Priscilla, Queen of the Desert (1999) te, Philadelphia (1993) te, The Crying Game (1992) te, Kiss of the Spider Woman (1985) te, The Times of Harvey Milk (1984) te, California Suite (1978) te, Dog Day Afternoon (1975) te, Dog Day Afternoon (1975) te, Cabaret (1972)-ah te hian film editing, sound mixing, screenplay, picture ṭha bera thlan chhuah a awm nual bakah, a theme pawimawh lai tar langtu a changtu langsarten, actor/actress lawmman ṭha ber an dawnpuina a awm nual a ni.

Tun hnaiah phei chuan  youtube, facebook, instagram leh thil dangah mahni mimal ngaihdan zalen taka puan chhuahna kawng a lo inhawn tak zel avangin, chungah chuan gay leh lesbian ten an nihna an inpuanchhuahna hmuh tur tam tak a awm a. Tun hmaa lo inthup ṭhin tam tak ten an nihna an puan chhuah ngam phah a. Hetianga zawnga mahni mihringpuite zinga danglam deuh bik nih hi zaha la loin, an zalenna au chhuahpui pawh hriat tur an awm ta nawk mai.Mizo society-ah ngei pawh chutiang mite live video chu mipui tam takin an thlir mek reng a ni.

4. Mizo Contemporary Queer literature: Mizo literature huang chhungah pawh gay leh lesbian te chungchang tar lanna leh an thlavang hauhna hmuh tur a awm ta nual mai. Tun ṭumah hian kum 2000 hnu lama chhuak thu leh hla (Mizo Contemporary Literature)-ah queer literature-in eng ang sulhnu nge a lo neih kan zir chiang dawn a ni. C. Lalawmpuia Vanchiau chuan,

Liandova-te unau thawnthua a naupang zawk Tuaisiala hian, sawi tur tingin “ze danglam tak” a nei awm e. Pastor Vanchhunga pawh khan a hre mak angreng hle. A lehkhabu Lusei leh A Vela Hnam Dangte Chanchin [1994, rpt]-ah chuan, “miten patil ramchhuahpui chu a hlawhtlin theih loh an ti,” tiin a sawi a. Lianlunga leh Rokhawliana-te ṭhian dun ramchhuakin patil an hruai lui a, an hlawhchham a ti nghe nghe (168) 

tiin Mizo nuna patil lo awm tawhte chanchin a rawn tar lang a. H. Laldinmawia chuan:

Mizo Kristian Society hian la pawm thei lo mah se, pehhel awm lova mihring nun thlirna literature huangah erawh a lo ngampa hle tawh. Mizo novel hmasa ber L. Biakliana’n kum 1936-a a ziak, Hawilopari thawnthuah khan character danglam tak ‘Zema’ kan hmu. Hmeithai fapa tlangval a ni chunga Hminga te unau leh Chhana te bula fa lu hloh ṭhaka a leng kha eng nge a chhan ni ang? Khatiang taka mipatpuite tana a inpekna kha in\hian ṭhatna leh tlawmngaihna ringawt chuan a daih dawn em ni? (‘Queer Reading on Lalzuithanga Thlahrang’ 596-597)

tiin Mizo novel hmasa ber Hawilopari thawnthu-a gay hlimthla lo lang a rawn thlir a. Lalzuithanga novel, Thlahrang-ah pawh Tawia nau Chawii, nula kum sawm hnih mi vel chuan a inleng tlangvalte aia Tawia nula chhan chhuah Parmawii chu a ngaihven zawk mai bakah Kawla’n Chawii a fiamna ṭawngkam, “Nangmah te hian i ngaizawng a nih reuh hi, i sawi i sawi mai, hmeichhia leh hmeichhia inngaihzawn chu na deuh a nia an ti asin” a tih aṭang hetih hun laia ‘hmeichhia leh hmeichhe inkawp’ an lo awm tawh ngei  a ni ang tih a rin theih thu a sawi bawk (…600, 601).

Tun hnaiah phei chuan a ngial a ngan hetiang lam hawi tarlanna thu leh hla hi hmuh tur a awm ta nual mai. Chungte chu a mal te tein han phelh pharh ila,

Thawnthu lamah: Contemporary Novel leh thawnthu tawi (short story) lamah hetiang lam hawi hi hmuh tur a awm ta nual mai a. A rawn lan dan pawh a inang lo nawk hlawm mai. Thawnthu tawi leh short story-a Queer literature lo lannate chu:

4.1.2. Nukawki fanu: Lalhmingliana Saiawi ziak Nukawi fanu tih thawnthuah Nukawi nau Nuhliri ṭhiannu Lalfeli, ṭhian nei ngai lo, hlauhawm thei tak ni a miin an sawi, patil ni a hriat a awm a. (Saiawi, 200). Nukawi phei chuan patil ni awma a hriat avangin, patil ber kher kawp duh nula chu mi pangngai lo deuh ni turah a ngai a, ama nau ngeiin a han kawm tlat mai pawh chu a hrethiam lo hle a ni. (…, 200). Lalfeli birthday an lawm zanin nula pasarih leh tlangval pasarih an awm khawm a, zan rei lamahArmy Officer zu ruiin Nuhliri l^m pui a tum a, a niin a lo duh si lo a. Midang tam tak kara huaisen taka Nuhliri chhantu leh a thlavang hauhtu chu Lalfeli a ni. (…, 205). Amah Lalfeli hian nula pangngai tak niin inhre mah se,(…,204) miin a chanchin an sawi dan leh an hmuh danah te, a khawsazia reng rengah pawh hmeichhia ni chunga mipa mize pawl zawk chu niin a lang. 

4.1.3 : Ruamrai Thuruk: C. Lalnunchanga ziak Ruamrai Thuruk-ah Saia’n a bialnu Maṭhuami leh patil Chali, Maṭhuami pindan-a an lo khawsa dun vel lai a va phawk a, (236) he thawnthuah zet hi chuan a lang tam lem lo nangin, neih inang inkawpte khawsak dan leh mipa leh hmeichhe kawp thei ve ve (bisexual) leh mahni anpui kawp ṭhin (homosexual) te nihna a lang chiang hle.

4.1.4. Thawnthu hlui: JH Lalrinzuala ziak Thawnthu hlui (Short story) ah chuan Maria Rosangliani, a hmeichhe pui ngaizawng ṭhin a lo lang a. (Mualzam Hmun, 116). A unaupa ngaihzawng kher a lo kawp fuh avangin, a u chuan a nau leh a bialnuin an hriatchhuah loh nan an pathum inkar boruak chu nghawng nei thui thei lo ang bera vuak daih a tum a(…, 110). A u-in a nau chu a nu leh pa ten fahrah in aṭanga an lak a ni tih leh, thisenah inzawmna an nei lo tih a hriat hnu chuan (…,108) Maria-i hmeichhe pangngaia a chhuah theih nan nupuiah a nei ta a. (…, 126). Mahse, hmeichhia tur mipa pumraw neia rawn piang chhuak Maria-i chuan hmeichhe nun tak tak paltlang zo lovin, nau chungah a thih phah ta a ni (…, 129). He thawnthuah pawh hian hmeichhia leh mipa kawp thei (homosexual) Chhingpuii a lo lang a. (…, 110). Hmeichhe pumraw neia piang chhuak, mipa rilru leh mize nei tlat si Maria Rosangpuii a lo lang bawk. (…, 129). 

4.1.5. Phuhra Tian: JH Lalrinzuala thawnthu, Phuhra Tian-ah Mizo thawnthua la lang ngai meuh lo character danglam tak, hmeichhia leh mipa serh nei kawp (hermaphrodite/unisexual) hmeichhe kum 19 mi lek Jolie a lo lang a (Mualzam Hmun, 168). Mipa leh hmeichhe serh nei kawp a ni chungin, a pumrua leh a landana hmeichhe duhawm tak a nihna mil chiahin, chhungril lamah pawh a hmeichhiatna a sang zawk a ni. (…, 170). A piansualna avang chuan a nun kawngah harsatna tam tak a tawh phah a, a mihringpuite bulah a nihna dik tak a inpholang ngam lo a. Ngaihzawng a nei ngam lo a, pasal neih lam phei chu ngaihtuah pawh a ngaihtuah ngam loh thil anih avangin mipa inzuar ṭhin panin, a hmeichhiatna kawnga pui turin a ngen phah ta tawp mai a ni (…,172).

4.1.6. Nice Acote d’Azur Firmin Hall: JH Lalrinzuala ktchhuak bawk Nice Acote d’Azur Firmin Hall-ah chuan Miguel-a, Dermatologist/Plastic surgeon-in a fanu Bellerose-I pawngsual a thattu Correttine-a chunga phuba lak nan a serh chu hmeichhe serh a thlaksak a, a nihna a thlak danglamsak dan a lo lang a (Thimhmul Ânchhia, 158). He thawnthua gender corrective surgery lo lang hi duhthlanna vang ni lovin phuba lakna atana tihluihna hmanga inthlak danglamna a ni. Miguel-a hi a thil tumah hian a hlawhtling hle a, Corettine-a chu a serh a thlaksak hnuah hmeichhe hming Arabelle phuah sakin, kum eng emaw zat chhung pindan chhungah tlanbo thei lo tura khung bet a, a han enkawl tak tak chuan hmeichhe rilru pawh a rawn pu chho ta reng a ni (…, 166). Miguel chuan Anabelle pawgsual tura Italian pa ruaiin, a fanu phuba chu a la chho zel a (…,169). Mahse, a phuba lakna chuan hlimna leh chhungril damna a pek chuan loh avangin nawrhchizawrhna hmuna hralh a tumna pawh sutin, a ngaidam ta zawk a ni (…, 175).

4.1.7. Hlimthla: H. Lalremruati ziak Hlimthla-ah chuan, mipa pianphung nei si a hmeichhe rilru pu tlat, a mipatpui ngaina zawk Arina a lo lang a. (Hlimthla, 53). A naupan laiin vawi hnih pawngsual a tawk a (…,10, 15). College kal rual a han nih ve hnu chuan a mipa duh zawng tak Robert-a tawngin, ngaihzawng neih nun hlimawm a han tawng ve a (…,101). Mahse, Mizo khawtlang nun leh a rilru put hmang chu a inmil loh avangin chu chuan a nunah harsatna tam tak a siam sak si. A ṭhian, amah hmangaih em emtu Melo-i chuan a mipatna hai chhuahsak tumin theihtawpa beiin nula tlangval inlaichinna thuk zawk te pawh han siampui mah se (…,165), Arina nihna tak tak chu a bo theih miau loh avangin, a chhungril mila nung turin nun khawhar zawkah bawk a luh leh a ngai ṭhin (…,169) He novel-ah hian homosexual pahnih Arina leh Robert-a an lo lang a  (…,101). Arina, Papari leh Tetei tleirawl khawvel hmang chho mek te nun hmachhawn dan hrang hrang tarlan nan complex plot hmangin a rawn phuarkhawm a ni. 

K. Vanlalruati chuan, Arina, eng ang mi nge anih pawh inhre chiang lo chu, a mizia leh chetze hrang hrang aṭangin a mipatpui kawp chi zawk niin a ngai a. Chu chu a nu ṭawngkam, “…Ani hi chu a zia chhoh mai pawh lo e, hmeichhe naupang hi a ni mai, pawnfen ka la leisak ang. A ṭhian kawm duh zawngte pawh Barbie khal chi vek an ni a, a ngaihna hi a awm lo” tih ṭawngkam chuan a tarlan thu sawiin, chu chuan Arina nun chhungril tak tak a rawn tarlang niin a ngai. (A Study of Queer Theory with reference to H. Lalremruati’s Hlimthla,  418, 419).

Mizo Novel-a homosexual character lo lang zinga protagonist role play pha awm chhun chu Hlimthla-a “Arina” hi a la ni deuh mai a, complex plot a ziah anih avangin simple plot-a protagonist dinhmun erawh a pha chiah chuang lo a ni. Thawnthu tawi lamah Phuhra Tian thawnthua unisexual lo lang Jolie leh Thawnthu Hlui a Maria Rosangliani hi protagonist character-a din an ni bawk. Nice Acote d’Azur Firmin Hall thawnthu a transgerder lo lang Colletine/Anabelle erawh Antagonist character a din a ni ve thung a. He thawnthua chhiatna rapthlak thlentirtu leh hrehawmna nasa tak tuar zuitu, a thawnthu tawp lamah erawh chuan amah nghaisa mektu Miguel-a tana Pathian ngaihdamna a dilsak avang a Miguel-a rilru sak tak hneh a, ngaihdamna changtu a ni ta thung.

4.2. Hla lamah: Ṭhangthar te kut chhuak hlahril leh hla thlûk nei lamah hian neih inang te inhmangaihna thu puanchhuahna hmuh tur a awm nual a. Hla hmasa lama kan la hmuh ngai loh a ngial a ngana an thlavang hauhna thlengin hmuh tur a awm ta.

4.2.1. Chhimbal: Ramlawt Dinpuia hlahril chhimbal tihah chuan,

Dan chêp leh phuar beh i ni a,

Inthup a, inhup tura beisei i ni.

I nihna i nih ve an phal lo a,

Mi pangngai zingah chanvo i nei hek lo. (thihna thahrui, 57) (1-4)

tih kan hmu a. ‘chhimbal’ rawng flag hi lesbian, gay, bisexual, transgender (LGBTQ+) ten an nihna leh zalenna tarlanna atana an hman, an symbol ang a hriat a ni ṭhhin a (Borge, There’s Special Meaning Behind Every Color in the Rainbow Pride) (n.pag). Chung te nena han ngaihtuah chuan,  Ramlawt Dinpuia’n

I nihna i nih ngam tak avangin,

Nihna ni loah an ngai che a,

Siam anga i awm tak avangin,  

Siam loh dana awmah an puh che a (thihna thahrui, 57) (13-16)

a tih hi tuai leh patil emaw, mahni anpui ngaizawng a kawp ṭhinte thlavang hauhna niin a lang a ni. He hla phuahtu hian mahni anpui kawp ṭhin te nun dan chu an duhthusam anih bik lohzia tarlangin,

Siam i nih chhan Siamtu i zawt a,

Siam i nih dan hriat fiah i duh a.

Chhanna nghaka i ṭhut laiin,

Zawhna bawk i dawng leh si. (thihna thahrui, 57) (5-8)

tiin, heng mite hian an rilru put hmang leh an miziaah zawhna tam tak an neih ṭhin thu a rawn tarlang a ni.

4.2.2. Kolasib: Loretta Khawlhring poem, ‘Kolasib’ tihah chuan, kolasib tleirawl chungchang a sawina,

Châm hlen tura an vangkhua belin,

An diakkawn chhir dun ka va châk êm.

Saidan thingbuk hnuaia’n,

Hnahthel ro nen biahthu hlan ka nuam. (chicks magnet, 184) (9-12)

tiin hmeichhe kutchhuakah a hmeichhe pui a ngaihzawnna leh a laka ṭhian piah lam rilru a put dan kan hmu a ni.

4.2.3. Lenghermawi: Folina Chongthu hla Lenghermawi tihah chuan,

Ka thlir ṭhin a, ka chung thangvan,

Lung min lentu siar zawng nen,

I êng a mawi, i sakhmel zawng nen,

Leng zawng zinga ka leng hermawi. (Chongthu Lenghermawi 0:13-0:40)

tiin hmeichhiain hmeichhia a ngaihzawng ang a a phuah chhanna bawk a lo lang a. A thunawnah,

Khuavel ka tan vul lo mah se,

Chhimbal ka tan i zam chhung chuan,

Ka zam lo’ng e, sel tam karah. (Chongthu Lenghermawi 0:59-1:20)

tiin LGBTQ+ zalenna symbol ‘chhimbal’ chu a innghahna anih thu a rawn tarlang bawk a ni.

4.2.4. Tu Sel Phak Nge?: Amos M.S. Dawngzuala poem, ‘Tu Sel Phak Nge?’ tihah chuan a ngial a ngana mahni anpui kawpte thlavang hauhna a lo lang a.

Tu sel phak nge hmangaihtu chu?

Chhuihthangvala’n val ṭang bel se;

Lengi thinlung pawh lanu’n nei se,

Hriatthiam hi zawng a har ngei e;

A tawng vetu nih loh chuan e,

Diriam mai zawng a zia lo e. (Hringnun Keh Them, 99) (19-24) 

tiin mahni neih anpui kawp ṭhin te chu dem ngawt chi an nih loh thu a rawn tarlang a.He hla zet hi chuan Mizo poetry huangah hawn ngai loh kawngkhar rawn su hawngin, bung thar a rawn kaitir a ni a tih theih hial awm e.

Mizo contemporary queer literature genre hrang hrang zingah hian, poetry hi a khawvel chenchilh tute inpuanchhuah nasatna ber niin a lang a, chutiang miten rawl an chhuahna hmuh tur pawh a tam ber a ni

4.3. Lemchan thawnthu lamah: Lemchan thawnthu lamah hian hmuh tur a la tam lo hle a. Mipat hmeichhiatna lam hawi lang fo mah se, mipat hmeichhiatna pangngai piah lama uchuak deuh taka chetna erawh hmuh tur a la awm meuh lo a ni. 

4.3.1 Hriat Loh Au Rawl: Henry Zodinliana Pachuau ziah “Hriat Loh Au Rawl” tih lemchan thawnthuah chuan, mipa naupang Zodina a pahrawnin a khuaikhem a, a zahmawh a hmuam luihtur a lo lang a. (Hriat Loh Au Rawl, 71). He lemchanah hian awmze nei takin, naupang khuaikhem chungchangah dan hmanga hmalak theih dan tarlan a ni bawk. He lemchan thawnthuah pawh hian naupang khuaikhemna hrang hrang leh Social Worker te hmalakna kara lo lang ve zeuh chauh a ni a, homosexual lo lang ber pawh chiang taka lantir a ni chuang lo a ni.

Tlangkawmna: Mizo Contemporary literature-ah hian thu leh hla hmasa lama kan la hmuh ngai loh, thil thar tam tak hmuh tur a awm a, chung zingah chuan queer literature lam punna leh hmasawnna hi hmuh hmaih rual loha rawn ṭhang chho mek a ni. Mihring nun hlimthla tarlanna literature-a mi nawlpui tawn loh nun, mihring ze chhungril lo lan chhuahna anih avangin, thu leh hla ṭhang chho mek kara a sulhnu hian khawvel hmasawnna ṭhang mek kara mihring ze chhungril leh Mizo society hlimthla tarlangtu a la ni chho zel ang tih a rinawm.

Hetah hian pdf download theih. 

• DOI: 
• 10.13140/RG.2.2.24337.92006

Works Cited :-

Baldick, Chris. The Oxford Dictionary Of Literary Terms. Oxford UP.2008

Borge, Jonathan.“There’s Special Meaning Behind Every Color in the Rainbow Pride”.  Oprah Daily,2 Nov, 2021, https://www.oprahdaily.com/rainbow-pride-flag-meaning.

Chongthu, Folina. Lenghermawi.You Tube, 30th August, 2021, https:/youtu.be/ckmq3UqOhJs. Accessed 1 may 2022.

Dawngzuala, Amos M.S,Hringnun Keh Them.2021

Dinpuia, Ramlawta. thihna thahrui. 2021.

Khawlhring, Loretta. Chicks Magnet.. 2020.

Lalnunchanga, C. Ruamrai thuruk.. 2008.

Laldinmawia, H. Literature Lamtluang, , 2020.

---,“Queer reading on Lalzuithanga ‘Thlahrang’.” Mizo Studies, Vol.VI, No.2, April-June,2017,595-605.

Lalremruati, H. Hlimthla. 2014

Lalrinzuala, JH. Mualzam Hmun. 2021.

---, Thimhmul Ânchhia, Zahau Family, 2017.

Pachuau, Henry Zodinliana, Hriat Loh Au Rawl.

Saiawi, Lalhmingliana. Nukawi leh Nukawki Fanu. 2015.

The Bible Society of India, Mizo Bible, 2017.

Vanchiau, Lalawmpuia, C. Tapchhak Theory (Essays & Criticism). 2011.

Vanlalruati, K. “A Study of Queer Theory with reference to H. Lalremruati’s Hlimthla”. Mizo Studies, Vol IV, No 4, October-December, 2015. 412-420.