Lalmama Duhthusam Khawvel

-Lalremruati Ngente

Kamkeuna : Chhia leh ṭha hriatna nei mihring zingah duhthusam nei lo emaw duhthu sam ve ngai reng reng lo kan awm lo ang. Mihring tu pawhin kan suangtuahna khawvela duhthusam ram kan din hian kan nun chhungril nen inzawmna thuk tak a nei ṭhin, kan duhthusam khawvelah chuan a taka kan tawn phak chiah loh, tawn kan châk em em si te, a taka kan tawn ve phak ngai reng reng loh tura kan ngaih te, a tak rama thleng thei chiah lo, chhungrila kan hahdam pui riau si te, a tak rama chantir kan duh, a hlawhtlinna kan la hmuh nghal vut theih si loh te kan din tlangpui avangin.

Lalmama leh a Hlate : Lalmama hi a hming tak chu Lalhmingthanga a ni a, April ni 7, 1901 khan Sena Ralte Kawlni leh Dochhingi te inkarah Pûkzing khuaah a lo piang a. A pain a nausen laiin a boralsan a, a pa nau Sena te bela Zotlangah eng emaw chen a awm hnuah, Zosap Missionary Pu B uanga (RevJ.H.Lorrain) leh Sap Upa (Rev. F.W.Savidge)  te belin a khawsa zui ta a, kum 1918 aṭangin Serkawn Middle English School-ah a thawk ṭan a, kum 1938 aṭanga a hun tawp thlengin he School-ah hian Headmaster hna a chelh zui nghe nghe a ni. (Serkawn Lalmama, 47, 49) April, 1925 khan Lungmawi nula hmelṭha Rochhingi Renthlei nen an innei a, fa sawm (10) an nei a (Serkawn Lalmama, 55, 56). Kum 1959 December ni 8 khan, kum 58 mi niin he khawvel hi a lo chhuahsan ta a ni (Mizo Hla leh a Phuahtute, 335). Lalmama hian hla 20 chuang a phuah a, 13 vel ngawt a letling bawk, zirlaibu eng emaw zat a siam bawk, thu tluang eng emaw zat a ziak a, tuna hmuhchhuah theih chin chu 8 vel a ni.

Lalmama Duhthusam Khawvel : Lalmama hla te hi hlawm lian deuh chi hnih “Pathian Fakna Hla” leh “Hla lenglawng” huang chhungah a ṭhen deuh phawk theih a, chu hla ṭhuang hnih huang chhungah chuan hla chi hrang hrang, hawi zawng leh kawh zawng inang lo tak tak a inbawkkhawm a, Serkawn Concert hun laia mipui chawh hlim nana a phuah fiamthu hla leh hla ṭhenkhat hla tak leh run tak phena a phuahtu khawharna leh lunglenna, a ngaihtuahnain thla a zar pharh dan leh, a ngaihtuahna luahtu thil chi hrang hrang kara fiah lo riaia a beiseina leh a duhthusam khawvel lo lang hi a ni. A lunglenna leh a ngaihtuahna luahtu thil chi hrang hrang karah Lalmama hian duhthusam lian tak pahnih a rawn tarlang a, chu a duhthusam ramah chuan eng nge a din a? A tak ram a thlenpui theih nan engtin nge a bawhzui tih han thlirzui teh ang.

1.     Kristian Chhungkua : Fahrah retheihnain dimlo baksaka a duhtawka a nuai tawh, chhungkaw hlutna leh a hlutna tem phak loa seilenna nun khawharthlakzia thlenga lo tawng hre tawh, nu leh pa hmangaihna leh thlamuanna hlutna hre fiah bik hliah hliah tura, pa thlamuanna awh ngawih ngawihna nun lo paltlang tawh Lalmama duhthusam nun ropui leh rilru khawih tak pakhat chu, a hla lar ber te zing ami, “Lo chêng ve la, kan rûn chhungah” tih hlaa kan hmuh “Kristian Chhungkaw nun” hi a ni.

Kristian ram, chhungkaw tam tak chenna ramah hian “Kristian Chhungkaw” nun chu awh hranpa vak ngai lo tura ngaih ni mai awm tak a nih laiin, chu damchhung nun nawmna leh hrehawmna hril vek thei nun hlutna chu, a seilenna kawnga a lo paltlang tawh fahrah nun mai piah lamah a thil hmuh leh hriat dang hrilhfiahtu a lo tawng hre tel bawk a ni mahna, a fiamthu hla zinga mi “Thai Bawih Hla” ah chuan nupa buaina chungchang run tak mai kan hmu a,

Thlunglu vau anga vul tawh khan,

A thai a hau an tih chu!!

Chhâm ang i zal ṭuan rel lovin,

I thawh let thum ka thawk e,

A thai a hrâng diau bil lovin

Tukram ka vât ang e, khai

Zing sum su la, bawng lo sâwr la,

Kawltu kei ka chawi nang e (Serkawn Lalmama, 72) (1-8)

He hla hlimawmna phenah hian thu tak run tak mai a inphum a, a taka tawng ve lo leh a tawng te dinhmun ngaihtuahpui lem lo tute tan chuan hla nuihtiza, mitthla hmuhnawm tak min dinsaktu anih theih rualin, atak rama chenchilltute tan chuan tuktin zantina mittui ko thlatu, damlai hrem hmun dintu a ni thei hial awm asin.

Pa berin a mawhphurhna a ni tih hre hauh loa a thiltihthat ân hlaa a hman fona, nupui fanaute thlamuantu a nihna theihnghilh ṭhaka nupui fanaute tithlabartu zawk a nih fona mai pawh ni lo, chhungkaw nu berin a innghahna, a lu a ni tih ngaihtuah tum hauh loa a pasal a tiatpui cho ur urna chhungkuaah chuan Lalmama duhthusam khawvel, lei pialral nun hi a thleng thei ngai dawn lo a. An fate rilru hriselna a nghawng thei dawn a ni tih ngaihtuah chang leklo a chhungkaw nu leh pain, nupa thuruk pawh nei tawh lêm chuang loa ṭhenawm khawveng te tana hmuhnawm an chhuah fo maina chhungkuaa seilian tan chuan, mahni inchhung lum ngaihna pawh a bo ṭhak thei hialin a rinawm.

Thawhrimna zawng zawngin tlan luh tuma an pan vek, thlamuanna leh chawlhna mihringin a damchhunga a tawn theih hlu ber chu, khawiah nge a awm? tih Lalmama hian a hre chiang hle. Mi tam takin ropuina, hmingthanna, hausakna sum leh paiah hlimna leh buaina chinfelna hmuh an la inbeisei tlat laiin Lalmama chuan, sum leh paiin a pek theih loh hlimna leh lungawina, a mihringpuite zinga hlu ber a kianga nitin hun hmang ṭhinte nena an inkar chinfelna kawng awm chhun chu, ‘Pathian a lal berna chhungkua’ a din chauhin a ni tih a hria a. Sum leh pai tam tak sênga din ni lo mah se, nitin eichawp dap hram hram a nihna chhungkua pawh, Pathian chenchilh chhungkuaah chuan inlaichinna ṭhain remna a thlen ṭhin tho a ni tih hriain,

Tu in pawh nang i chênna chu,

Râp in, chhâlbuk ni se,

Hlimna leh remna a tel ve,

Van mâlsawmna hlu nên,

Nang nghilh lovin zing, chhûn zâna,

Auva sâwm ṭhintute,

Rilru leh theihna zawng hlântu,

Chu ngei chu i chhûngte. (Kristian Hla Bu, 592) (5-12)

 tiin Pathian uapna thlamuanthlakzia a rawn au chhuahpui hial a ni.

 

2.     Lungrualna Khawvel : Midang ngaihdan ṭawmpuia, an hnungzui zel mai thei ai a mahnia ngaihdan, hmuh dan leh duh dan nei hrang ve thlap thlap ten ngaihsan leh zah an hlawh tawh zawkna khawvel, mi pahnih lek pawh lungrual taka inthurual a har tawh em emna khawvela “Lungrualna Khawvel” din lo duh tlat mai chu, ngaihtuahna mak leh dangdai tak anih theihna lai pawh a awm ngei ang.  Chawlh hlenna a awm lo tih hre renga, beisei tlat ṭhin, chhungrila a nunruak hnawhkhah vekna a awm lo tih hre reng chunga a tha leh zung, a ngaihtuahna, sum leh pai senga nun ruak hnawhkhahna zawng ngat ngat ṭhin mihring nun nen erawh he duhthusam aia inzawmna thuk zawk nei duhthusam dang hi a tam kher lo ang.

“Nun hlui puan ang hlip rawh” tih hlaah chuan, he khawvel hi lungngaihna leh ṭahna ram mai nia a hriat tawh thu ka hmu a, chu ṭahna mittui hrufai a, lungngaihna puan hlip theitu chu hnam tin leh chi tin te lungrual taka kan lenna hmun chauh nia a hriat thu kan hmu bawk,

Hringfa thim zinga ṭhu te chu thovin,

He lungngaihna leh ṭahna ram hi,

Lo din thar leh thei se aw, zaleng zawng hian,

Hnam tin, chi tin lawmin kan leng ngei ang (Serkawn Lalmama, 75) (6-9)

tia duhthu a sam rualin, chu a duhthusam puitlin chu thil awlsam tak a ni lo tih a rilru pangkhing lehlamin a thlir tel tho si. Intlansiakna khawvela mahni hmasialna a khat rilru pu chunga, inelrelna leh indemtawnna tur zawng reng renga indo a, inbei ṭhin , pawmna thinlung nena inhriatthiam tawnna kawng zawn aia, mahni mihringpuite tihsual leh tlinlohna lai kher ngar ngar ṭhinte thinlunga ‘remna’ siam tur chuan, paih ṭhena chhunluh belh ngai thil tam tak a awm tih a hmuh hmaih lo. Mi pakhat thinlung kawngkhar hawng tur pawha ‘vanneihna’ leh ‘remchannna’ in an tha an thawh ve a ngaihna mihring nuna, mi tam tak rilru hneh tumna neih a manganthlakzia thlir tel ran chungin,

 

Chhak, thlang, chhim leh hmar, lei mi zawng zawngte,

Lalpa Pathian duhzawnga nung tawhin,

Tun ang hian kan dâwn lungruk sual zawng te,

Simin, bânin paih bo vek thei i la,

Hnam tin, chi tin, lungrual kan leng ngei ang. (Serkawn Lalmama, 75) (10-14)

 

tiin a suangtuahnah a duhthusam inlungrualna khawvel chu a han din a, a duhthusam khawvel atak rama chantir tur erawh chuan mi pakhat duhna mai a tawk zo lo a, thlawptu tam tak a mamawh si.

A duhthusam khawvel dinsak turin Pathian a au : Chu a duhthusam, Kristian chhungkua aṭanga bulṭana, mi tinte inhmangaih leh inlungrual taka an lenna khawvel din thei tur chuan amah a inen a, theihna a neih tlemzia a inhmu a. Famkimna nunah ni lovin, famkim lo mamawh nei nun aṭanga duhthusam leh beiseina hlutzia a lo lan chhuah chauh ṭhinna nun kawng zawh mektu a ni ve tho si a. Mahse, a beiseina thinlung chuan thim zingah khawnvar eng a hmu a. BC 1080 aṭanga BC 970 inkar vel daiha mipa naupangte Samuela’n Pathian kohna aw a hriat lai (Mizo Study Bible, 370) a han chhuikir a, chu Pathian aw hriat ve chakna chuan a tuihal a,

 

Aw LALPA, ka Pathian,

Hmanah Samuela ang khan,

Ka bengte tivar la,

Inpeih turin min pui rawh,

I kohna aw nem zawi te pawh,

Hriaa ka zawm, zel theihna turin,

Samuela thinlung ang,

LALPA min puttir la,

Chhun emaw zan emaw,

Khawiah pawh ram tinah,

I thu ang ka zawm fo theih nan,

Thinlung thianghlim min neihtir rawh. (Serkawn Lalmama) (13-24)

                      

tiin a duhthusam khawvel a tihpuitlin theih nana amah inhlana Pathian auh mai pawh duhtawk lovin, a awh em em Kristian chhungkua a din theih nan Pathian ṭanpuina a han ngen  leh a,

 

Lo chêng ve la, kan run chhûngan,

Hmangaihtu Lal Pathian,

Chhungkaw puipa ber lo ni la,

Keini i hmangaih fa, (Kristian Hla Bu 592) (1-4)

Chhungkaw lungrual Kristian chhûngkua,

Kan nih theih nân Lalpa,

Lo chêng ang che Krista, Nang ngei,

Kan in, kan thinlungan. (Kristian Hla Bu 592) (13-16)

 

tia a ngen chuan a dilna chhansakin, kum 20 vel zet fahrah nun hmang chunga a lo awh em em ṭhin “Kristian Chhungkaw” din pui turin, April, 1925 khan Lungmawi nula hmelṭha Rochhingi Renthlei chu Kohhran dan thianghlimin a nei ta a, fa sawm neiin, fa puitling leh lehkhathiam tak tak an chherchhuak a. (Serkawn Lalmama, 55, 56). Zoram mipui hriat phak meuha ṭawngṭainaa Kristian chhungkaw din ngentu chuan, chhuan lo la kal leh zel te tana entawn tur Kristian chhungkaw nun hmuhnawm tak a hnutchhiah hnuah,  kum 1959 December ni 8 khan, a mihringpuite nen inlungrual taka chenho dial dialna atana a awh em em, he khawvel hi a lo chhuahsan ta a ni. (Mizo Hla leh a Phuahtute, 335)

Tlangkawmna : Thu ziak mi leh hla phuah thiam te hian an kutchhuakah an duhthusam ram an tarlang fo a. A tak rama thleng thei lo, a tak rama an lungngaihna leh an thawpikna tlanchhiatsan nan an hmang fo bawk. Lalmama erawh hi chuan kutchhuak a ngah ang huin chutianga khawvel lungngaihna leh buaina ram tlanchhiatsan châkna lam chu a hlaah a tarlang tam lem lo hle a. A hla zawng zawng zinga a duhthusam hmuh theih lian ber “Kristian Chhungkaw” nun a din theih tak avang leh, harsatna leh retheihna tam tak paltlanga seilian ni mah se, nun ruak famkim lo paitu ni ve tho si a pawmthiamna thinlung nei tur leh, mihring nun thlir thiamna nei tura finna zawng zawng kawltu engkim tithei Pathian a belh tlat vang a ni ngei ang. A thu leh hla te belchiangtu apiangin a phena Lalmama nun awhawm leh entawntlak tak hi an hmu nawn leh fo ang a, mihring nun bel chiang a, chik peih apiangin ‘Lalmama duhthusam khawvel’ ropuina leh rilna thuruk hi an chhiar nawn leh ṭhin ang.

                                                    Work Cited :-

Lalzuithanga. F & Lalhmingthanga Colney, Serkawn Lalmama, Aizawl,  K.L. Offset Printers, 2018

Kristian Hla Bu,  Raja Ram Mohan Sarani, Kolkatta Swapna Printing Works Pvt. Ltd. 52: Synod Literature & Publication Board, August, 2013.

Hrangbana College, Mizo Hla Leh A Phuahtute,  Aizawl, RTM Press & Computer, 1999

Mizo Study Bible, The Bible Society Of India, Kolkatta, Swapna Printing Works

                                                Bibliography ;-

Lalzuithanga. F & Lalhmingthanga Colney, Serkawn Lalmama, Aizawl,  K.L. Offset Printers, 2018

Kristian Hla Bu,  Raja Ram Mohan Sarani, Kolkatta Swapna Printing Works Pvt. Ltd. 52: Synod Literature & Publication Board, August, 2013.

Hrangbana College, Mizo Hla Leh A Phuahtute,  Aizawl, RTM Press & Computer, 1999

Mizo Study Bible, The Bible Society Of India, Kolkatta, Swapna Printing Works

Department Of Mizo, Pachhunga University College, Hla Mawi Kutpui Serkawn Concert, TM Offset Printers, Aizawl, KL Offset Printers, 2017

Khawlhring Siamkima, Zalenna Ram, M.C.Lalrinthanga, Aizawl, Lengchhawn Press, 1992

Hauhnar Mafaa. Hringnun Hrualhrui, Samaritan Printer, 2018  

TPI Companion To The Bible, Luke. K, Bangalore, Theological Publications In India,2005