Van aw mawi ri

 

Thlasik a lo thleng a, van boruak thiangah arsi a de sep sep a, thli vawt thaw hek hek kara thla engin leilung a chhun eng riai mai te, thlasik kawng zam reih leh vanzawla Chhohreivung leh Siruk de tiar te chuan chhandamtu pian champha a hnaih tawhzia an tarlang a. Chhun lamah bazar a tawt ṭan a, kumtluana an nghah krismas lo thleng mai tur nghak a mi hnathawk che vel reng reng pawh an phur leh zual sarh tawh hun chu ṭhalai lam tan pawh zan lama carol boruak nuam a inṭan chhoh hun chiah a ni. Chutiang pawltlak thla, zan lam boruak thiang vak hnuaiah chuan kum 60 vel kal ta, 1960 kum khan Durtlang carol, veng tin thler tin fang kuala zaia lal lo piang tur hmuaktute chu pavalai kum 25 mi vel, high school zirtirtu Pu V.Thangzama te kawmchhakah an chawl a, hla chi hrang hrang panga vel mawi taka an han sa chuan, a awm hmun aṭanga lo ngaithla veng vengtu patling lunglen a kaitho chiang kher mai. A suangtuahna chu Bethlehem tlang lama thlawk chhuak vawn vawnin, khawvel chhandamtu lo pian zana van zaipawl te zai mawi turzia a han ngaihruat zui a. “Hetiang hian lei zaipawl mahin mawi takin hla an rem thei a” tiin, Bible-in Isua pian thu a tarlanna,

Tin, thawklehkhatah vântirhkoh hnênah chuan vâna miho mipui an lo awm ta chiam a, Pathian an fak a,

Chungnung berah Pathian ropui takin awm rawh se,

Lei chunga a lawm em em mihringte hnenah remthu leng rawh se, an ti a”(Luka 2:13,14) 

tih chuan a rilru a rawn luah zui a. A suangtuahna khawvelah hlimthla dinsakin, rimawi an rem a. “Khata mipui tam takin hla an han sa a mawi turzia kha aw. A sang lam, a hniam lam phak loh kha an nei dawn si lo a, an âw te kha a lai dawn chuang lo a. Solfa thiam leh thiam lo pawh kha an awm hrang chuang lo ang a, an thiam em em vek mai ang a, khatianga hla ropui tak, zaipawl anga awm khawmin lungrual taka an han sa tur kha, a va ropui dawn em!” tiin,

Van âw mawi ri chu ngai ru,

Min tho ve, a thang ri chuan;

Zan mu reng ka chhing thei lo,

Min ṭhâwng e, ka thinlaiah. (KHB, 113)

tih hla mawi leh ropui lutuk chu a rawn chhamchhuak ta. 

Pic: Sikpui Rimawi 2019, V. Thangzama Biangbiakna. 

Mut chhuak tireh ṭhak khawpa a ngaihtuahna muhil kaitho a, hlimna leh lawmna kara Bethlehem hruai thlengtu lunglenna ngaihawm tak, a thinlunga cham zui veng veng chuan amah leh a mihringpuite chhandam tura nausen lo piang hlutzia chu a ngaihtuah chhunzawm tir a,

Boralte zawng turin,

A lo piang Chhandamtu chu,

Amah chibai bûk turin,

Lâwm takin i pan ang u.

tiin he hla phuahtu hian amah maia van lal fapa a chawimawi tur chu tawk a inti lo a, a induhkhawp lo a, amah chawimawipui tur chuan khawvel a sawm ta hial anih chu. A suangtuahna vak vel chu kal thui zelin, Isua pian hma kum tam tak kal ta a, khawvel chhandamtu a lo pian tur thu lo sawi a, nghakhlel taka lo thlir ṭhintute chu a han ngaihtuah kai a. Anni chu he ni ropui hi khawvela lawm ve thei tawh lo turin thihnain a la bo tawh a. Thawnthu ngaihnawm an sawi ṭhin, nghakhlel taka an thlir ṭhin kha keiniin kan tawng ta.

Nghâkhlel taka thlirtute,

An liam ta, kan pi pute;

Thawnthu hlui an hril ṭhin kha,

Kan zingah a lo thleng ta.

tih chang a phuah laia Pu V.Thangzama lunglenna thûk turzia hi aw. Mi ṭhenkhat chu an ngaihzawngte, an ṭhianṭhate ngaiin an lung a leng a, mi ṭhenkhat an hun kal ta, an kohkir theih tawh si loh te ngaiin an lung a leng a, mi ṭhenkhat chu an hmangaih kal ta, thihnain a lakbo tak te ngaiin an lung a leng ṭhin. Pu V.Thangzama erawh chuan khawvel leilung a rah hma hauha Judai rama chhandamtu lo pian laia beram vengtute hmaa van mipuiho zai chuan a lunglen chawk thoin, kum tak tak nausen lo piang tur nghakhlel taka lo thlir ṭhin tute awm ve ta si lo te thleng chuan a hnuk no an kai chhuak anih chu. A lunglenna hi van boruakah a zam a, chatuan a hawlh thleng a ni.

Pic: Sikpui Rimawiah Esther Lalrinhlui-i'n a phuahtupain a zirtir dan ngeiin "Van aw mawi ri chu ngai ru" tih hla a sa a. A phuahtu V. Thangzama'n ṭingṭang a perh sak. 

Pawltlak thla a lo thleng a, thlasik boruakin timurah min ṭham a. Biak In lamah, ṭhalai inkhawm thlengin kan hla sak ṭhin thlakin “Pianna” lam hla kan sa uar chho a, kan tuipui dan inchen vek lo mah se, nghahhlelhnain chhungril lama a tur vek lem loh te thlengin he hunpui hian Kristiante thinlungah chuan danglamna a thlen ṭhin. Tuna KTP member te hi chu naupan laia urlawk zana masi putar nghak ṭhina seilian kan ni deuh vek tawh mai thei a, krismas kawr thar mai pawh ni lo krismas cake tel lo va december ni 25 kim lo riaua hriatna ṭhanhnan tawh, hmasawnna khawvelin chak taka a virpui lawp lawpna karah changkang taka krismas hmuaka hmang liam ṭhin ṭhah kan ni tawh ang.

Krismas vuakveta kan inchhung leh kawtthler thlenga chei belh leh chuan ngaihna pawh awm lo khawpa mawinain a tuam vel lai te, thawmhnaw thar, boruaka rimtui leng vel leh ei tur tuihnai chi tinreng nena nau piang kan lawm lai te, kum tluana min bawh buai ṭhintu mahni hna ṭheuh kalsana chawlh lailawkna kan hman lai te, kum tluana inhmu fo nidanga inkalpel mai mai ṭhin te pawh Biak In tualah mi thar ang maia hlim hmel kan inhmuh lai te, nau piang lawmna thuchah ropui kan ngaihthlak lai leh inkhawm ṭan tura kan innghahkhawmna hla pawh kan nawn tlut tlut lai te, zaikhawmna ina miin thinlung taka Pathian faka ban an phar chhuak hmuhnawm ti taka kan lo thlir lai te, awm tual mei chhem hnungpuak chunga krismas nawmna famkim kan tawn mek lai hian chung zawng zawng kan hman chhan Isua hian kan thinlungah hmun lailum a luah ngai em? Hetih hunah hian “Van aw mawi ri” ngaiin i lung a leng ve ṭhin em?

-Aremruati Ngente