Kumhlui Hlaa Mizo Philosophy

-Lalremruati Ngente

Kamkeuna: Matthew Arnold chuan, “Poetry chu mihring nun thlitfimna a ni” a ti a(literaturexpres.com)a ti a. Aristotle chuan, “…rilrua duhthusam ram tarlanna a ni(Thu leh Hla Sukthlek, 24)” a ti ve thung. A nuna thil thleng hrang hrang, a chhe ber aṭanga a ṭha ber thlengin mihring ngaihtuahna chhungril ber thlenga a nghawng theih dan te, a mihringpuite nena an inlaichinna leh nun a thlir dan leh  tehna thlenga a thlak danglamsak theih dan te, ram leh khawtlang inrelbawlna leh sakhuana chungchang thlenga poet te hian an hlaah an tarlan ṭhin avangin Plato pawhin, “History aiin Poetry hian thudik a hnaih zawk(John Kyriazogluo,1)” a lo ti hial reng a ni.

Poetry leh Philosophy: 

Merriam-Webster Dictionary chuan Philosophy chu, “Finna zawnna(merriam-webster-dictionary)” tiin a hrilhfiah a. Cambridge Dictionary chuan, “Mihringin a nuna a thiltihte a ngaihtuah dan(dictionary.cambridge.org) “ a ti. Oxford Learners Dictionary chuan, “Khuarel,leilung leh van thengreng zau leh mihring nun zirchianna(oxfordlearnersdictionaries.com)” tiin a hrilhfiah bawk. World History Encyclopedia chuan, philosophy ṭobul a hrilhfiahnaah “Greek thumal philo-love(hmangaihna) leh sophia-wisdom(finna) aṭanga lo kal a ni a, finna duhna(love of wisdom) a ni(worldhistory.org) tiin a hrilhfiah a.”Hei hi Desh Raj Sirswal chuan, “Philosophy chu finna duhna(love of wisdom) a ni a, finna zawnna(seeking of wisdom) leh finna umna(sought of wisdom) a kengtel  ve ve a ni(wordpress.com)” a ti ve thung. Philosophy hrilhfiahna hi thui tak sawi tur awm mah se, a awlsam zawngin “Mihring nun thlirna” ti a hrilhfiahin, Mizo ṭawng chuan “Finthuril” tiin dah ila a fiah mai awm e.

Ralph Waldo Emerson chuan, “Philosopher dik tak leh poet dik tak chuan inanna an nei a, mawina dik tak leh dikna mawina tarlan hi an tum ve ve a ni(Stanford Encyclopedia of Philosophy)” a ti a. APJ Abdul Kalam-a’n “Hlimna sang ber leh lungngaihna thuk ber aṭangin poetry a lo luangchhuak ṭhin.(hindustantimes.com)” a lo tih ang deuhin poetry hian mihring ngaihtuahna chhungril ber a phawrh chhuak a, mita hmuh theih piahlam a tarlan ṭhin avangin chutah chuan a phuhchhuahtu Philosophy, a mihring nun thlirna fiah takin a lo lang ṭhin a ni.

Kumhlui hla leh Mizo khawtlang nun:

Hun bik nei hla zinga mi nawlpui tuipui leh ngainat hlawh ber pawl anih miau avangin Kumhlui hla hian Mizo khawtlang nun nen inzawmna thuk tak a nei a. Hmasawnna ṭhang zel karah hunpui dangah chuan hnam dang hla leh rimawiin hmun a luah hnem em em tawh laiin, kumhlui hla erawh hi chu hnam dang hlain a la thlak thei meuh lo  thung. Hlimnia rimawi lampui a, lungngaih ni a rimawi ṭahpui ṭhin Mizote thinlungah hmun thuk ber a la luah reng a ni. Hnam dang hlaah hian kumhlui lam hawi hmuh tur a la tam lo em em a, kumhlui hlaa an chhal ve te lakah pawh Mizo kumhlui hla phuahtuten mihring nun an thlirna thuk tak ang hi hmuh tur a la awm meuh lo bawk. 

Photo Credit : Rinnunga Chhakchhuak, Kawrthah, Vengpui aṭanga Jampui tlang, Tripura a nitla tur lan dan. 

Chuti khawpa Mizo nun leh kumhlui hla a inzawm bik lai chuan Mizo kumhlui hla hi a pung chak lo em em a, K Rammawia phuah Chulhnu Kumhlui te, LM Chhinga phuah Kumhlui, aw ding rih rawh te, Hrawva phuah Ngaiteh, kumhlui te, Lalsangzuali Sailo phuah Kumhlui, khawiah ṭuan che maw tih hla leh Kumhlui ngaihawm tih hla te hian kum tam tak chhung Mizo mipui an lo awi lungleng tawh a. Ṭhangtharte kutchhuak hla(contemporary song/poetry) lamah Jonathan Hmingthanzuala phuah Krismas leh Kumhlui zun te, Manuna phuah Kumhlui;Nunhlui te, Dr.Reuben phuah Kumhlui liam tur(Rap) te, Nununa Renthlei phuah Kum Hlui(poetry) te a rawn chhuak thar zel bawk. A tam lamah pung viau lo mah se, kumtin a hunbi ngaia a dinhmun ngai a la luah zel thei hian Mizote thinlunga kumhlui hlain hmun a luah thukzia a tarlang a ni.

Kumhlui hlaa Mizo Philosophy: 

Kumhlui hlaah hian hla phuahtute mihring nun thlir dan leh mihring nun thlir nana an tehfung hrang hrang a lang tam hle a, chung mihring nun chik taka zirchianna hrang hrang karah chuan Mizo finthuril(Philosophy) thuk tak tak a hmuh theih a ni.

1. Hunin mihring nun a herpui dan: Kumhlui hla phuahtu ten an tarlan tam ber chu hunin mihring nun a herpui dan hi a ni. Chawl lo va tlan reng hunin mihringin a duhzawng a tih a, nuam a tih zawng taka nun a hman theihna hun ṭha chu, chu hun vek chuan a herliampui vut vut mai ni a an ngaihna, kumhlui hla phuahtute hian an hlaah an tarlang deuh vek a, Hrawva chuan,

Ngai teh kumhlui mual liam tur saw,

A kal mêk auh din rual lohin;

Kan nun dan kawng ze tin rêngte,

Khuarei a chantir tur. (Hrawva leh a Hlate, 69)(1-4)

tiin hun inherin mihring nun a herliampui dan chu mitthla theih(imagery) hial khawpin a rawn tarlang a, K.Rammawia chuan,

Hmanlai an chang dawn ta,

Kan hlimlai hun leh kumte;

Ngai mah ila vanglaini leh kumhlui,

An liam zel aw, pialral panin.(Rammawia, Chulhnu Kumhlui)(0:17-0:43)

tiin Mizo sakhaw vawrtawp Pialral hmangin, mitthi thlarau ang maia hun inherin hun awm tawh lohna hmun a pan dan a rawn tarlang bawk. Lalsangzuali Sailo phei chuan, 

Kum hlui! Kum hlui ngaihawm!

Zaiin kan awi che,

Kan nun hlui leh thil tih zawngte,

Zamual i liampui ta.(Lalsangzuali Sailo hlate, 132)(1-4)

a ti chhuak thlawt mai. Heng hla hrang hrang aṭang hian Mizo ten kumhlui an thlir dan leh hun inherin mihring nun a herliampui ṭhin dan nena an hmehbelna a lang a. Chu hun inherin, mihringin a nun a la ui em em lai laksak a, a tlanliampui tak daih dan chu “Kumhlui” thumalah funkhawmin, chutah chuan hun leh mihring nun inzawmna an rawn tarlang a ni.

2. Hun kal tawh leh mihring nun inlaichinna: Kumhlui hla phuahtu ten an tarlan tam em em pakhat chu mihring nun leh hun kal tawh inlaichinna hi a ni. Kumhluiin a liampui tak hun chhungah chuan an chhungkhat laina, an ṭhianṭhate, an hmangaihte nena hlim taka hun an hman ho lai kha a awm a. Chu hun liam ta chuan minung damlai nen inzawmna thûk tak a la neih reng avangin, chung hlimna mihring ngaihtuahna leh mitthlaa chambangte chuan mihring rilru chhungrilah lunglenna leh nunhlui ngaihna a rawn kaitho ṭhin a ni tih kumhlui hla hrang hrangah hian a lang chiang hle. Nununa Renthlei chuan,

Lungduh sakhmel mitthla an chang,

Kumhlui nang hian par lai i thliak;

Nang tawng ṭapin nun kung an tliak(Hringnun, 61)(19-21)

tiin kumhlui chu mihring nun pangpar anga a vul mawi em em lai thliak a, hun kal tawha chantirtuah a puh hial a. Manuna chuan,

Hmanah chuan e hlimte’n kan nui za ṭhin,

Hun liam tur reng kan dawn ngai lo;

Tunah erawh kumhlui, nunhlui ngaiin,

Kan au ruai che, kir hian i mawi si lo.(Manuna, Kumhlui, Nunhlui)(3:13-3:49)

tiin chu hun inherin a liampui tak nun chu auh kir rual a nih tawh lohzia a rawn tarlang bawk. LM Chhinga chuan,

Chhung kim laini zawng kha,

Lam angin lo kir leh la;

Lenrual kima hlimlaini kha,

A ngaiin kan ṭap a ni.(Chhinga, Kumhlui Aw. Ding Rih Rawh)(0:59-1:21)

tiin kumhluiin a liampui tak nun chu a au vawng vawng a. Lalsangzuali Sailo chuan,

Pan lai hun leh hlimtea kan lenlaini te,

Ngaihlai lungduhte nen lungruala;

Eng dang reng dawn lova sen nau ang nuih ni zawng kha,

Auh ruai ka nuam-i liampui ta si a! (Lalsangzuali Sailo Hlate, 131)(9-12)

tiin thinlung taka a nuihlai hun hlimawm kumhluiin hun kalta ni tawh tura a hruai liam tak, a ngaihtuahna chhungrila la chambang si te chu a rawn tarlang a. Dr.Reuben chuan,

Suihlung a leng ṭhin,

Ka ngai em ṭhian hluite kha;

Dawn ve maw?

Ngai ve maw?

Kumhlui liam tur. (Reuben, Kumhlui Liam Tur)(1:36-1:56)

tiin mihring inlaichinna chu hun hnuaia leng a nih dan a rawn tarlang a. Hrawva chuan, 

Ngaiteh hunin nunhlui a hnawl,

Chatuan hmun thleng turin.(Hrawva leh a Hlate, 69)(11-12)

tiin hunin a mihring lak aṭanga a tel vena nun a hnawlbo sak dan a rawn tarlang bawk. Mizo kumhlui hla phuahtute hian kumhlui leh kumthar ṭhenhrangtu anih vanga kumhlui chu thlah an ni ngawt lo a, a boruaka an chen avanga lunglenna au chhuahpui sathliah an ni hek lo. Fim taka chu hun inherliam tur an thlir rual chuan, chutah chuan hun kal tawh leh mihring inlaichinna an hmu a, chu zirchianna chu mawi takin an hlaah an rawn tarlang zawk a ni.

3.Hun kal tawh leh chatuan inzawmna: Kumhlui hla phuahtute finthuril danglam tak chu kumhlui an thlahliamna kara chatuan an thlir thleng pha tlat mai hi a ni. Hemi chungchang hi Lalsangzuali Sailo chuan,

Ni tin, thla tin, kum tin,

A ral zel-Hun duhawm;

Chatuan hmun mawi ka lal lenna,

Hun Tawp awm lohnaah,

Kum Hlui! I thleng ta maw? (Lalsangzuali Sailo Hlate, 132)(11-15)

tiin Kumhlui chuan hun kal mek a tlansan rualin, chatuan hmun lam a pan nghal niah a ngai a. Hrawva pawhin,

I thiltih zawng zawng saw thlir teh,

Hunin a liampui saw;

Chatuan hmun lo thlen khalh tur che,

Lal hmâa dinpui tur. (Hrawva leh a Hlate, 69)(5-8)

Ngaiteh hunin nunhlui  hnawl,

Chatuan hmun thleng turin.(…,69)(11-12)

tiin hun kal liamtaa a nun te chuan mihring chu chatuan hmun lo thlen khalh daih tura a ngaihna a tarlang bawk. Heng hla aṭanga kan hmuh chu hla phuahtute hian kumhluiin a her liampui tak hunte chu boruaka thamral mai tur emaw, her liam sathliah mai tur emawa ngai lovin chu hun liam ta chuan mitthi thlarau ang deuhin chatuan hmun a lo va pan nghal turah an ngai a. Chu hmunah chuan kha hun chhunga awm mihring nun hrang hrang, hlimna leh lungngaihna thawnthu te khan a thawnthu neitu chu chatuan hmunah an lo nghak dawn ni a an ngaihna a hmuh theih a ni. He ngaihdan nena inhne rem tak hian K.Rammawia chuan,

Dam takin aw kumhlui, 

Ngaihlai hrui ang ka vuan che;

Kum leh hun nghaka intawh leh hma zawng,

Dam takin, chibai, mangha le. (Rammawia, Chulhnu, Kumhlui)(3:16-3:42) 

tiin  ui taka a thlahliam tak kumhlui chu, engtikah emaw, khawi hmunah emaw la hmuh leh ngei inbeiseina nen chibai a buk a ni.

4. Hun leh mihring inṭhenna: Thu ziakmi leh hla phuahtu ten mihring inṭhenna an tarlang fo a. Awmna hmun sawn avanga inṭhenna te, ngaihdan leh duhdan inang lo leh thil thleng dang avanga inṭhenna te, thihna avanga inṭhenna thlengin inṭhenna hian thu leh hlaah hmun a luah hnem hle. Kumhlui hlaa inṭhenna lo lang erawh thu leh hla dang tam taka lang ngai lo hun leh mihring inṭhenna a ni leh tlat thung.

Mizo kumhlui hla phuahtu te hian hunbi chhiarna hnuaia mihringin a nun thawnthu a ziahte chu hun chuan a kalna lam apiangah a keng tel zel a. Ama nuna thil thleng leh ama tih ngei pawh hun lak aṭanga chelh tlat turin mihring chuan theihna a nei lo niah an ngai a. Chu finthuril chuan Mizo kumhlui hla hrang hrang hi a tuam deuh chiat a ni ber mai. Hrawva chuan,

Tuipui lianin phairûang a hnawl,

Kawrvai a thleng ang mai hianin;

Ngaiteh hunin nunhlui a hnawl,

Chatuan hmun thleng turin. (Hrawva leh a Hlate, 69)(9-12)

tiin hunin mihring nun a hnawl liam dan leh hun leh mihring inṭhenna chu a rawn tarlang a. Lalsangzuali Sailo chuan, 

Par ang vul laini leh,

Lungngaih, lawm leh hlim ni zawng pawh;

Ngaih zual!-A liam mek e,

Kum hlui an chang zo ta! (Lalsangzuali Sailo leh a Hlate, 132)(17-20) 

tiin hun leh mihring nun inṭhenna leh hunin mihring lak a ta a nun chhuhsak a, a liampui dan a rawn tarlang bawk. Nununa Renthlei chuan,

Hlim zai rel hian ka mawi lo ve,

Hlim lai nite’n tuanthu an chang.(Hringnun, 61)(17,18)

tiin chung mihring nun duhawm tak, hun leh mihring inṭhenna avanga a ch^n tak te chuan thawnthu mai an chan tak thu a rawn tarlang ve bawk.

5. Hun kal mek aṭanga hun kal tawh leh hun lo la kal tur thlirna:  Mizo kumhlui hlaa mihring nun thlirna lo lang leh pakhat chu mihring a dinna leilung, hun kal mek khawvel aṭanga hun kal tawh leh hun lo la kal tur a thlirna hi a ni. Lalsangzuali Sailo chuan chu a dinna khawvela thil thleng mek chu,

Van hnuai ram zau khawvela kan len chhung hi zawngin,

Kumhlui ngai lo reng an awm lo. (Lalsangzuali Sailo leh a Hlate, 131)(13, 14)

tiin hun kal mek leh hun kal tawh inlaichinna thuk tak a rawn tarlang a. Chu khawvelah chuan mihring chuan a hun kal tawh ngaia lungleng taka nunhlui a thlir rualin, beiseina nena hmalam thlir telin,

Dam lai par ang chuaia Chatuan Ram thlen hunah zawng,

Kum Hlui ngaih lunglen a awm tawh lo’ng. (…,131)(15, 16)

tiin hun lo la kal tur chuan hun kal tawhin hun kal meka a hnutchhiah lunglenna leh lungngaihna chu a vai kian a beiseina a tarlang bawk. Jonathan Hmingthantluanga chuan,

Aw le, kumhlui dam ten mual liam ta la,

Nunhlui ngaia suihlunglen hruai ve la;

Hun leh kum lo thar tur hringmi tan malsawm la,

Min hlan ta che duhsak chibai bukna;

I zun ngaih zawng suihlung a leng em mai.(Hmingthantluanga, Krismas leh Kumhlui Zun)(2:31-3:8)

tiin hun kal mek khawvel aṭangin hun kal liam tur chu hun lo la kal tur atana duhsakna hlan tura a ngenna a rawn tarlang bawk. 

6. Hunbi chhiartu leh mihring inlaichinna: Kumhlui hlaa Mizo finthuril(Philosophy) lo lang hrang hrangte khaikhawmtu ber ni a lang chu, hunbi chhiartu leh mihring inlaichinna hi a ni. Hun inherin mihring nun a her liampui dan teh, hun kal tawhin mihring ngaihtuahna chhungrila nghawng thûk tak a neih dan te, hun kal tawhin chhungril lama a la chenchilh tlat mihringin hun lo la kal tur a thlirna zawng zawng chu hunbi chhiartu kuta innghat leh amah inphuarkhawm ni a ngaihna kumhlui hlaah hian a lang lian hle a. LM Chhinga chuan,

Chung Pathian malsawmna zarah,

Kan hlimlaini zawng kha;

Hmanlai an chang zel mai si. (Chhinga, Kumhlui Aw, Ding Rih Rawh)(1:22-1:38)

tiin lunglennain a bawm khah chiai nunah chuan malsawmna a hmu a, chu chu Pathian avanga lo awm leh a remruatna hnuaia lo thleng mai a nihzia a tarlang nghal bawk.. Lalsangzuali Sailo chuan,

Chatuan Hmun mawi ka Lal lenna,

Hun Tawp awm lohnaah,

Kum Hlui! I thleng ta maw? (Lalsangzuali Sailo leh a Hlate, 132)(13-15)

tiin hun liam ta te chuan an tihtur an hlen chhuah hnuah hunbi chhiartu hnen an pan thu a tarlang a. Hrawva Ngaiteh Kumhlui Mual Liam Tur Saw tih hla chang tawpnaah,

Aw Lalpa, kan thiltih zawngte,

I hnenah kan rawn thlen e;

Kan tihsualte min ngaidam la,

Kan tihṭhat malsawm rawh.(Hrawva leh a Hlate, 69)(13-16)

tiin kum hlui a thlahna tlangkawm nan hunbi chhiartu leh engkim neitu hnenah ngaihdam dila, a malsawmna dil chungin chu kumhlui liam tur a thlah mek chu a hlan a ni. Hemi chungchang hi Vanlalṭana Khiangte chuan, “Hrawva hian hun hman ṭhat pawimawhzia a tarlang chiang hle a. Kan hun hman apiang mai siam ṭhat theih a nih tawh dawn loh avangin uluk tak zela hmang turin min fuh bawk(Khuanu Leng Chawi Hrawva, 92)” tiin Hrawva ṭawngṭaina phenah hian fuihna a hmu tel a ni.

Tlangkawmna : Mizo literary critic hriathlawh ber te zing ami Siamkima Khawlhringin,

Mihringin a chhuilet phak theih tawp aṭang leh, thu leh hla hi mihringin a lo siam ṭan aṭang tawhin, vawiin thleng hian ‘hun’ hian mihring rilrua ngaihtuahna thuk ber hi a luah fo va. Chuvangin hun awmzia leh mihring nun hi a inlaichin dan chhuina leh ngaihtuahna aṭang hian mi tam tak chu mi thil chik mi leh mi fing tia sawi turin an lo awm phah a ni.(Zalenna Ram, 116)

a tih ang deuhin, Mizo kumhlui hlaa hun leh mihring nun inlaichinna thuk taka khel leh chaina te hian Mizo finthuril(Philosophy) a pai a. Chutah chuan mihring nun darthlalang a inphum a, mihring leh hun inlaichinna leh, hunbi chhiartu nihna thlenga zirchianna a inphum a. Mihringin a paltlang leh a nuna thil thleng(experience) a tarlanna anih rualin, mihring nun zirchianna leh finna hla(wisdom poetry/literature) huang chhunga dah theih ṭhiau a ni. Mizo Kumhlui thlahna hla te hi a tam lamah la pung viau lo mah se, a awm chhunte hian thutak, finna, zirchianna leh zirtirna a pai a. A lo chhuahna hnam philosophy nep lohzia tarlangtu a ni.

Hetah hian PDF a download theih

• DOI: 
• 10.13140/RG.2.2.24918.32322/1

Works Cited:

Chhinga, LM. Kumhlui Aw, Ding Rih Rawh. You Tube, 25th December, 2020. https://youtu.be/9SaHh4wOexA.  Accessed 9th December, 2022.

Department of Mizo, Mizoram University. Thu leh Hla Sukthlek. 2022

Hmingthantluanga, Jonathan. Krismas leh Kumhlui Zun. You Tube, 28th November, 2019.  https://youtu.be/lbqyxHnZRvQ.  Accessed 9th December, 2022.

Khawlhring, Siamkim. Zalenna Ram. M.C.Lalrinthanga, 1992.

Kyriazoglou, John. The Importance of poetry and qoutations in your life. Researchgate, November 2021, https://www.researchgate.net/publication/355875033_The_importance_of_poetry_and_qoutations_in_your_life_John_Kyriazoglou, . Accessed 9th December, 2022.

Lalramliana & Khiangte, Lalrinfeli. Hrawva(Father of Mizo Poetry) Leh A Hlate. TM Offset Printing Press, 2019.

Laldinliana. Lalsangzuali Sailo Hla-Te. 2007.

Manuna. Kumhlui, Nunhlui. You Tube, 26th March, 2019. https://youtu.be/Xwm4X6-dzqE.  Accessed 9th December, 2022.

“Philosophy” Cambridge-Dictionary.org, Dictionary, Cambridge, https://dictionary.cambridge.org/dictionary/learner-english/philosophy, . Accessed 9th December, 2022.

“Philosophy” Oxford-Learners Dictionary.com, Dictionary, Oxford-Learners, https://www.oxfordlearnersdictionaries.com/definition/english/philosophy,  Accessed 9th December, 2022.

“Philosophy”. Merriam-Webster.com, Dictionary, Merriam-Webster, https://www.merriam-webster.com/dictionary/philosophy. Accessed 9th December, 2022.

Rammawia, K. Chulhnu Kumhlui. You Tube, 27th December 2017, https://youtu.be/vbpuEc9b6F1. Accessed 9th December, 2022.

“Ralph Waldo Emerson”, Stanford Encyclopedia of Philosophy, 21 October, 2022, https://plato.stanford.edu/entries/emerson/, . Accessed 9th December, 2022.

Renthlei, Nununa. Hringnun. K.L.Offset Printers, 2018.

Reuben.Dr. Kumhlui Liam Tur. You Tube, 26th November, 2015. https://youtu.be/pbi6MEpkOjw.  Accessed 9th December, 2022.

Sirswal, Desh Raj. “Elements of Philosophy”. 2014, https://philgcg11chd.wordpress.com/category/meaning-and-definition-of-philosophy/, . Accessed 9th December, 2022.

“Theory or Definition of Poetry by Matthew Arnold.” LiteratureXpress. 2022. https://literaturexpress.com/theory-or-definition-of-poetry-by-matthew-arnold/, . Accessed 9th December, 2022.

“World Poetry Day”, Hindustan Times, 21 March, 2022, https://www.hindustantimes.com/cities/delhi-news/worldpoetryday/, . Accessed 9th December, 2022.

Zonunsanga, H. et.al. Khuanu Leng Chawi Hrawva(A Study of The Poetical Works of Hrawva). Mizo Department, Govt.Aizawl North College, Aizawl, 2020.