Emau Dai Reh – Kleopa te ṭhian dun leh Rev.Vanlalzuata

Tlai lam khua chu a dul riai tawh ang a. Fing sawmruk zeta hla, khualzinte tan ke a pan mai remchang zawk chu kalkawng pawh a ramhnuai deuh ruih ang a, chutiang tlai lam khuaah chuan a boruak hrim hrim pawh lunglenna kai chhuak tham a ni ngei ang. Nitla turin kawlkil a pan laiin an kalna kawng velte chu a rawn chhun deuh riai ang a, thingzara sava hram ri chiah chiah leh ramhnuaia chiapcha hram ri te chu rannung chi hrang hrang tualchai velin thingzar an rah tliak ri rek ten a rawn pawlh nawk nawk changte pawh a awm mai thei.

Chutiang hunah chuan Kleopa te ṭhian dun khan zinkawng an zawh rek rek ang a. Tu nge anih an hriat loh, hriatchian tuma ngaihven leh zawh chian pawh hman lo khawpa tui taka an titipui bawrh bawrh nghal theih ni bawk si. An mit tih vara a awm a, a kalsan tak hnua, “An titipui laia an thinlung a harh huai (Luka 24;32)” tih an ngaihtuah chhuah leh hnuhnawh lai, an rilru fimin a ṭhawnharh ruala Kleopa te ṭhian dun lunglen veng veng turzia hi aw. An dam chhunga an tawn phak tur pawha an ngaih loh, Jerusalem aťanga Emmau an panna, an tlailam khualzin kawng mai maiah leh nghal khan an han tawng thut mai a. An tawn laiin eng nge anih an hre lo a, a hlutna hre chhuak hman turin rilru fim an hmang hman lo. Mahse, kum sang tam a ral hnuah pawh mi tam takte awh nun chu, mitkhapkhar leka Emmau khualzin kawnga an tawn,  thawnthu ngaihnawm kha a ni si!.

Mihring tu pawh hian harsatna tawh chang kan nei a, lungngaih chang te, nat chang te kan nei ṭhin. Chutiang hunah chuan a thawidam nghal maina a awm loh pawhin nachhawkna leh a bunruahna tur tal kan mamawh ťhin. Hlimna leh lungngaihna, nuihna leh ṭahna a inlumleh velna nunah chuan mihringin a nun ruak hnawh khahna tur a zawng a, thlamuanna zawngin kil tin a melh a. Mihring mangang leh nunruak khawhar tawpin a mamawh zawng zawng Kleopa te ṭhian dunin tlai lam Emmau zinkawng maia an han tawng bik tur kha…!

Kum 50 chuang a liam ta, kum 1972  kumah khan Thinglian naupang ni ṭhin, rambuai khaw khawm tuartu zinga a tel ve avanga Lungpho khaw tlangval lo ni ta, tlangval hleitling leh inkhaithli nalh tak, Primary school zirtirtu ni bawk, tlangval fel leh kohhrana inhmang tak, naupang Sunday school zirtirtu ni lai mek bawk Vanlalzuata (Tuna Pathian rawngbawltu ropui Rev. Vanlalzuata ti a hriat lo ni ta) chu, tlangval nun hlimawm hmang chho rual leh khawvel hmachhawn phur rual lek la ni chung siin taksa lama damlohna leh bawrhsawmna pawh nei chuang hauh lovin, retheihna leh harsatna a theih tawpa sual let ve fat fattu chu tlangval naupangte chu, nun ninna leh beidawnnain a tuam vel a. Nun a ning mai a ni lo a, thih a chak a, chu kum pumpui chu thih mai inrinna nen thi tura inbuatsaih nan a hmang a ni deuh ber. Tlangval kum 20 bawr lek mi chuan nula, sum leh pai, khawvel mawina leh nawmchenna pawh thlakhlelhna reng reng nei lovin ni a vui liam veleh ṭhin a ni deuh ber.

Chutianga nun nin reng renga hunbi a chhiar lai chuan kum 1972, Ramtuk thla a lo inher chhuak a.  Ṭo a lo haw a, khawpui a ri dur dur a, thli a thaw vuk vuk a, tualzawla hnahthel tla ro a chhem leh tap tap lai chuan dai aṭangin an ran vulh Vawk leh Kel te pawhin tawm hulna tur hmun him zawngin khawchhungah an tlan haw sup sup a. Ruahmal lian pui pui tla fuap fuap karah amah chauha ṭingṭang nena zai tleng tleng lai Vanlalzuata chu tukverh khar ṭha turin a han tho a. An ran vulh ten inhnuain hmun hul leh him lai an inchuh sup sup karah chuan van lam a han hawi a, van thiang vuk maiah chuan “Luka 24;28” tih inziak a hmu ta tlat mai a. Tukverh a khar a, inchhung lam a pan rual chuan,

Emau kawng dai reh leh khawhar taka,

Khualzin pahnihte khawhara an kal laiin;

Tlaikhua lo ngui, zanthimin a nang dawn a,

Isua an sawm, tlaikhua varpui turin.

Kan hnenah awm ta che, khua a tlai dawn ta e,

Tlaini kawlah a liam dawn hi,

Tlaikhua i var za ang, Emau dai rehah hian;

Chhunni a liam, zan thimin mi nang si.

tih hla hi a rilruah a rawn lut nghal zut zut a, a bula ṭingṭang chu lain a sa a, a ziak chhuak ta nghal a ni. Zirna lamah theihtawp a chhuah ve chung pawha retheihna leh chhungkaw harsatna avanga zirna ṭha hmu pha lo. Dawrpuiah coaching class kal a pawl 9 a zir aṭanga kum 6 lai a liam leh hnu, Primary school-a a inhlawh ve leh lawp lawp hnuah, nikhat mah class kal lo va, ram hna thawk chunga class-10(Matric) exam veleh tawp. Tlangval nun hlimawm pawh nei hman lo leka harsatnain a hrual tlangval chuan a hla thar chu mittui nen tak meuh a sa chhuak a ni.

Mizo Bible letlingtu ten, “Kalkawnga min biak laia Pathian lehkha thute min hrilhfiah lai khân, kan thinlung a harh huai rêng lâwm ni kha?(Luka 24;29) an tih leh Rev. Vanlalzuata’n “Emau Dai Reh” hla chang thumna a, Kleopa te ṭhian dunin Isua an hnena awm tura an sawm lai a tarlanna, “Thlamuanna reh thei tawh lo chu hnutchhiahin…” tih ṭawngkam han inchawbe fuhzia hi aw. Thlamuantu leh hnemtu mamawh ngawih ngawiha nun hmang ṭhin chuan, Isua kianga tlailam khualzin nun hmang Kleopa te ṭhian dun thlamuanna tur kha a ṭawmpui pha tlat a ni. Chu hla ropui tak leh thlamuanna sawifiah hleih theih loh a dawn lai pawh chuan, khawvela hmalam hun thlir ngaihna a la hre chuang lo. A thihna hla tur, a van kai hla tur niin a la ngai cheu a,

Kei pawh tunah ka sawm che Lal Isu,

Ka khawvel damlai ni a tlak hma ngei hianin,

Min awmpuiin tlaikhua min varpui ve la,

Ka thlarau lo nghak rawh i Lal Isu.

tiin a hun tawp ni a a ngaihah chuan, a hnenah awma chelh turin Isua chu a sawm a ni. He hla chang a phuah laia Rev. Vanlalzuata lunglenna thûk turzia hi aw. Mihringin Pathian chauh beisei tur a nei tawh tih a inhriatna hmuna Pathian thlamuanna a chan lai ai a nun beidawnthlak leh thlamuanthlak si hi a awm kher lo mai thei. Chu nun chu he hla chang tawpah hian kan hmu a ni. 

Khawvel hmasawnna a inher vut vut laite, mi tam takin an zawn hlimna an hmuh loh avanga an nun beidawnna paihthawlna tur zawnga nawmchenna khawvel an um laite, mi ṭhenkhat awh nei tawh lo khawpa khawvel hausakna chenchilhtu ni chunga an nun an nin luat vanga an nun tih tawp dan zawnga an mit an len ruai laite, chung thil thleng hrang hrang kara khawvelin amah siamtu leh dintu mamawh tawh lo tur ang hrima hmasawnna a um mup mup laia a duhthusam vawr tawpa Isua nena lendun châka lungleng ṭhin, a leh pek a awm thei tawh lo ang a tihtur hial khawpa harsatnain a hrual ṭhin kha, vawiinah chuan mi tlo, nun awhawm neitu a lo ni ta. Khawhar leh nun ruak ngawih ngawiha a a awm lai a, a khawharna hnem tura Isua a auhna hla kha, thinlung hliam leh chau te tuamdamtu a lo ni zawk ta si.

080423