Political Satire in Mizo Contemporary Poetry

  - Lalremruati Ngente           

Khuhhawnna: Ṭhangtharte hun thu leh hla (contemporary literature) in Mizo literature kalhmang a her danglam dawrh dawrh laia literary genre hrang hrang zinga boruak nei na berte zing ami, thu leh hla huanga mi inthukru tam tak rawn pholangtu leh ṭhangtharten an vei zawng inpuanchhuah nana an hman nasat em em contemporary poetry-ah hian hla hmasa lama hmuh tur la awm meuh lo thil thar hmuh tur tam tak a awm a. Poet te hla phuah duh dan kalhmangte, an hla thu remkhawm leh chheh duh danahte, an hla hawi zawng, a thu ken leh an puan chhuah duh danah thlengin thil thar hmuh tur a tam hle. Contemporary poet te chungchang hi chungchang hi H.Lalawmpuia chuan, 

…an chen mekna khawvel laka lungawi lohna, leng lo leh chuang riau nia inhriatna, rilru hahna leh nun ipik, nun beidawnna leh rilru buaina rawl te kan hmu ṭhin a. A ṭhen chuan tlanchhiatna tur hmun an dinchawp a, chutah chuan suangtuahnain an chêng a. A ṭhen erawh chuan anih ang anga hmachhawnin, an rilru tawt leh ipik tak chu an hrithla phiar phiar a(Recend Trends of Mizo Literature, 27).

a ti a. R.L. Thanmawia chuan,

…an ngaihtuahna a zalen bawk a, ṭhenkhat chuan sawi hreh em em pawh an nei lo va, midang ngaihdan tur leh sawi dan tur an veng hauh lo tih a hriat a…Ram rorelna a ni emaw, kohhran inrelbawlna lam a ni emaw, khawtlang inkaihhruaina thleng pawhin an rilrem lo deuh leh duh khawp loh deuh thil a awm chuan a ruh langin an sawi bawl bawl ngam a, an huaisen ngawt mai tih zawng pawhin a sawi theih ang(Discourse on Mizo Language & Literature, 49).

a ti a, H.Laldinmawia chuan,

“…Ṭhangtharte hian an chên ngailohna leh an hriat ngai lohna khawvel law law hi an an ngainain an hre duh(Bingbi,19)” a ti ve bawk. Ṭhangtharten an chen ngai lohna, a tak rama awm ngai lo khawvel an ngainat em em chhan leh an chên mekna khawvel tlanchhiatsan an duhnaah hian an chên mekna khawvela an lungawilohna hlimthla a lang a. Poetry hmanga thup pawh nei lem loa an thinrim an inhrikthlak phiar phiarna kara, a chhan a rawn lansarh em emna pakhat chu Political satire poetry hi a ni.

1. Political satire awmzia: Jessica Ellis chuan,

Political satire chu politics huangchhunga thil awm ang lo leh inngaihbel luih tumna chungchang nuihzathlak, hlimawm leh mei nei tak si a tarlanna a ni. Politics zirchianna leh fiamthu lakkawp, political satire hian satirist thupui leh thil tum azirin, fiamthu hlimawm leh activism lam a pho lang nasa ṭhin hle(languagehumanities.org).

a ti a. Study Smarter website chuan, 

“Literature huangchhungah chuan politics khawvel tak tak nihna pholanna, zirchianna, tihelna, nuihzathlak, a tak piah lam hret leh a letlinga tarlanna thlengin a huam thei a ni” a ti thung(studysmarter.us). Lalnunpuia Renthlei chuan, “Politics chungchâng thil phuah elna hi political satire chu a ni deuh mai a… Politics behchhana hmanga fiamthu zângkhai tak phuah chhuah lam hi a kâwk zawk mahin a lang(Poetry: The Basics, 98)” a ti bawk. 

Tichuan, political satire poetry chu politics huangchhunga thil thleng, a nihna ang leh a nihna pel deuh hret thlengin, fiamthu nuihzathlak leh a hlimawm zawk emaw, intihelna, indeusawhna, fiamthu hmanga inkahnate hmanga tarlanna hlate hi a ni, ti ila a fiah mai awm e.

2. Mizo literature leh Political satire: 

Mizo poetry-ah hian intukna(satire) lam hawi hrim hrim chu a lang hma hle. Kum 1856 a ṭanga1859 chhim leh hmar indo laia Vuttaia’n Lalpuithanga a phuah elna te, Saikuti’n an khaw tlangvalho tana a phuah leh, Awithangpa leh Diriallova nuthlawi hmelṭha Thangkungi avanga an intukna hla te hi a ngaihnawm tham hle. Mahnia hawrawp nei hranga thu leh hla ziaka vawnṭhatna mumal kalpui anih aṭanga reiloteah sakhaw thar hlain zoram pum a tuam chhuah lai la lain Kaihlek hla(religious satire) a rawn piang leh nghal a. Kum 1946-a Mizo political party hmasa ber Mizo Union a rawn din aṭanga reilote velah political satire a rawn chhuak leh a. Kum 1980 chho vela Congress Party-in Pc Party an phuah elnate, Union phelte inbeihna te, Zalen pawl leh Union pawlte inbeihnate karah social satire phei chu a rawn chhuak chho zut zut reng a ni deuh ber.

Political satire huangchhung bikah chuan hla lam bakah kum 1977 chho velah Lalsangzuala(Laisaizawk) kutchhuak Sudden Muanga comics lamah political satire ṭha tak tak a rawn chhuak a, boruak pawh a nei hle. Hemi hnu hian Cartoonist Zodinsanga chuan Hnehtu chanchinbuah kum 2001 aṭangin “Hnehtoon” tih hming vuahin political satire cartoon a rawn ziak ṭan a, Hnehtu chanchinbu-a ziak reng chung hian, kum 2004 aṭanga 2008 thleng Vanglaini chanchinbuah “Toonlaini” hming vuahin a ziak ṭan leh a, kum 2015 aṭanga kum 2018 The Aizawl Post chanchinbuah“Postoon” tih hming vuahin a chhunzawm leh a, kum 2019 aṭanga vawiin thlengin Vanglainiah “Toonlaini” chu a la ziah chhunzawm zel bawk. Ani hian kum 22 chhung zet chu political satire cartoon hi a lo ziak tawh a (Personal Interview, Zodinsanga), ngaihtuahna thûk tak leh rilru fim tak hmanga ziah ni awm tak a political satire cartoon te hian mipui nawlpui leh ṭhalaite ngaihven pawh a hlawh hle a ni. Kum 2000 hnu lamah hian poetry huangchhungah political satire a rawn pung thar hle a, hun hmasa lama chhuakte nen erawh a kalhmang a danglam deuh hlek thung.

3. Mizo contemporary poetry-a political satire poetry te thu ken: 

Ṭhangthar poet ten politics chungchang an hlaa an rawn au chhuahpuinaah hian fiamthu hlimawm leh nuihzathlak hmanga thu vai kual lam aiin, lungawi lo leh thinrim aurawl, thup nei lem lo a, tlang taka an auchhuahna a tam ber a, party mal beihna lam a awm meuh lo. Mipui chanai eiru tute, rorelna dik lo kalpui tute, dawta mipui laka thutiam, ti hlawhtling leh si lote leh, ram hmangaihtu der ni a an hriatte an phuah elna a ni deuh ber. Thil thleng eng emaw chungchang tarlanna a awm zeuh zeuh bawk. Chung political satire poetry hrang hrang thuken te chu,

3.1. Eirukna(corruption) dona: 

Mizo contemporary poetry-a political satire hnuhma langsar tak chu eirukna chungchang hi a ni. Mipui chanai eirutute, mahni thawhchhuah ni lo leh thawhrimna tel lo va hausate chu ram rawktu anga puha demna au rawl C.Vanhmingliana kutchhuak, A Poem for Politician hlaah hetiang hian a lo lang a,

Aw nang, Zoram rawktu,

Nang, politician inti vetu,

Zoram hmasawnna aiin,

I pum puarna i zawng zawk maw?

Dinhmun sang tak aṭangin,

I rawk mawlh mawlh maw?

Rukru i nihzia an hmu che (Zaikung Thar Vol.5, 28) (1-7)

PC: Zodinsanga, Vanglaini, Toonlaini

tiin an thiltihtheihna leh dinhmun sang an luahna hmang ṭangkai a, ram hmasawnna tur kawng ngaihtuah a, beih ai a mahni hlawkna tur ngawt uma zawngtute chu ‘rawktu’ah a rawn puh a. Chung mite chu ram rukru, ram hausakna leh hmasawnna tur zak miah loa rawk mawlh mawlhtuah a rawn chhuah deuh tawp mai a ni. Chu mai pawh chu la duhtawk lovin,

I rila rahte chuan,

Chaw an khawn mai thei,

Kut an dawh mai thei.

An fahrah thei a,

Hmun lo ram an chan mai thei(…,30)(44-48)

tiin chung rukru ni a a sawiten ram leh mipui chunga an thiltih chu anmahni chunga la let leh thei a nihzia a rawn tarlang tel bawk.

3.2. Dikna leh rinawmna ngiat au râwl:

Dikna leh rinawmna a bo tawh ni a hriatna leh, dikna leh rinawmna ngaia mangang aurawlin ṭhangtharte political satire poetry hi a luah hnem hle. Ramlawt Dinpuia poem Thlalera Mi Aurawl tihah chuan,

Dikna aia a mawm lam kan pan tlan ṭhinna khawvelah hian,

Thawkrim an hausa kher lo va,

Rethei fa kan damna ai chuan hausate nawmna a pawimawh a,

Thiamna ai chuan tangka a hlu zawk!

Kan thawhrim pawh mi tlemte te hlawkna a ni a,

Theihtawp chhuah ve ṭhin mah ila, rethei kan rethei zual a.

Hausa an hausa thur thur thung(Rawlthar Awrawl,21)(3-11)

tih kan hmu. Ṭhangtharte hian an chên mekna khawvelah chuan dikna rahbehin a awm niin an hria a. Dikna leh leh rinawmnain hlutna a neih lo va, rahbeh a nihna hmunah chuan an thawhrimna leh theihtawpa an beih venate pawhin rah a chhuah zo lo niin an hria a. Chu hmunah chuan ṭhahnemngai taka beihin awmzia a nei lo va. A taima leh thawkrim apiangte dinchhuahna khawvel(survival of the fittest) ni lo vin, thiltihtheihna nei apiangte dinchhuahna(survival of the mightiest) khawvel niin an hre ta deuh ber niin a lang. 

Chung thil an khawvela thlentirtute leh rinawmna leh dikna rapbettute chu Triau Tracx hla Hnawl I Ni tihah chuan,

Hmangaihna hmel tibaltu,

Rinawmna timualphotu i ni,

Ka pawi i sawi,

Kan pawi i sawi,

Chung lam pawi i sawi,

I sawi pawi lo a awm lo,

Pen khat pawn min rawn hnaih tawh suh(Ramenga, 0:37-0:53 )

tiin chung mite chu hmangaihna hmeltibaltu leh rinawmna timualphotu, mipui pawisawitu leh ṭhalaite pawisawitu mai pawh ni lo, Pathian pawisawitu an nihzia an rawn au chhuahpui riap mai. Chutih laiin Anita VL Nunmawii chuan Ṭantu Dikna tih poem-ah,

Dikna tukdawl anih a,

Hlemhletnain ro a rel a.

Ei rukna chauh ei tur a awm hunah,

Chak takin awm la,

I ṭamchhawl lo ang tih inring rawh(Ni hawi,36)(1-5)

Dik lo taka titute an dinchan a

Dikna ṭantute an kiam zel hunah,

Dotu che an pun a, phatsan i nih hunah,

Dikna i lamah a ṭang tlat,

Tih theihnghilh ngai reng reng suh(…,36)(17-21)

tiin dikna leh rinawmna rapbettute chu dingchang rih mah se, rahbeha awm mekte tan chuan beisei tur a la awm a ni tiin, chung mite chu eiruknain a hual vel vek hunah pawh, an ṭamchhawl dawn lo a ni tih inhria a, chak taka awm turin a fuih thung. Rilru Rethei tih poem-ah,

Dikna a fam e,

Dikna reng reng a awm lo,

Rinawmna a fam e,

Rinawmna reng reng a awm lo,

Tiin tlangau a au a, (Ni Hawi, 37)(1-7)

Minung khuavel kan chuan a,

Mak tiin mit ka len a,

Hmui dawn ngai lo ka dawng a,

Sum thunun theih loh mihring,

Mi dang chanpual chhuh ngai lo mi nen.

Awptu verther hnuaia hmuingil tlatte chu(…,38)(24-29) 

tiin C.Vanhmingliana’n midang chanpual tur chhuhsaka mipui chanai an eiruksak nasat lutuk avanga an thlahte chungah a la let mai ang tih a hlauhthawnpui rum rumte awpna hnuaiah Anita-i chuan dikna leh rinawmna chelh tlat avanga hmuingil a la hmuh thu sawiin,

Dikna mei chu a la alh teng teng a,

Rinawmna lui pawh a la luang ker ker e(…,38)(35,36)

a rawn ti ve thung. Mahse, he hlaa mi dik leh rinawm hmu intitu ṭawngkam meuh pawh hian dikna mei chu alh hlup hlup emaw alh zuai zuai ni lovin, alh teng teng ang chauhin a tarlang a. Rinawmna lui luang hum hum tham pawh awm tawh lo; luang ker ker chauh karah ṭhangtharten dikna leh rinawmna hmu zo tawh meuh lo ang maia an mangan thu an rawn au chhuahpui hi, thiltih awm tak a nih thozia a rawn nemnghet ve leh tho mai.

3.3. Thutiam leh bumna: 

Ṭhangtharten politics chungchanga an lungawilohna hlaa an au chhuahpui langsar leh tak dang pakhat chu thutiam leh bumna chungchang hi a ni. Inthlan dawna mipui tana an hnathawh tur leh an tihsak tur thu intiam a, ti hlawhtling leh ngai si lote chu Triau Tracx hla Hnawl I Ni tihah chuan, 

Khat, hnih, thum,

Dawt dang sawi leh a tum,

Ka hre vek,

Min bumna ngaiah min tluk nawntir a tum,

Ka hmu lawk vek,

Min tlawn, min thlem,

Min tham min vau,

Min tiam, a ngai bawk,

Mahse, kei chu ka danglam tawh.(Ramenga, 0.7-0:28)

tiin he hla phuahtu Ramenga hian, a hmaa a lo rin em em, a rin ang ni leh si lote thutiam chu engahmah a ngaih tawh loh thu a tarlang a. He hlaah hian chung mite chuan an lakah thu rawn tiam leh mah se, bumna maia an ngaih tawhzia leh an thu sawi leh tur thlenga dawt maia an ngaih tawhzia a tarlang chiang hle.

PC : Zodinsanga, Toonlaini, Vanglaini

Thutiam kawrawng nen min han thlem leh la, 

Ka awih duh lo châk tawh,

I châk dawn lo,

I awmdan hi kan ten,

Pen khat pawn min rawn hnaih tawh suh(…,1:10-1:30)

tih hla thu phenah hian bumna thutiamin a hliam thinlung na rumri a ri tel a. Bumtute thutiamin pawi a sawi thuizia a lang chiang hle a ni. Bumna leh thutiam chungchang hi C.Vanhmingliana hlaah,

An thlang chhuak che a,

An ruat che a, hruaitu atan,

Mahse, an rinna che chu,

Duhamna vangin bumnaah,

I chantir a, zah bosalin (Zaikung Thar Vol.V, 28)

tiin a tarlang a. Ramlawt Dinpuia chuan,

Kumsûl nga a vei leh ang a,

Bumna thang hlui kâwr cheiin,

‘Hmangaihna tirhkohho’ an lo inlar leh ang;

Ruahmanna thar leh tumna tak tak awm si lo,

Lal duhna thinlung ngaite bawk nen,

He ram hi an suartluan leh ang a(Rawlthar Awrawl, 30,31)

PC : Zodinsanga, Toonlaini, Vanglaini

a ti ve bawk. Ṭhangthar poet te hian bumna thutiam ngai bawk rawn dinchhuahpui leh tur ni a an hriat mite rawn lan leh hun tur chu, mipuiin huphurh leh hnena rilru nena an lo thlir ṭhup tawh thu leh, anmahnia chuan insiamṭhatna leh danglamna hmel hmuh an inbeisei tawh lem lohzia an hlaah an tarlang deuh bawl bawl mai.

3.4. Democracy rama zalenna ngen âu râwl:

India ram hi Democracy-mipui zalenna ram a ni a, Mizoram chhunga ram hruaitu leh enkawltu turte pawh mipuiin an thlan a ni. Democracy ramah chuan mipuiin an aiawh tura an thlanten ro an relna anih avangin, mipui ngaihdan pawh a zalenna leh awmzia a neihna, media pawh politics khalh ngiltu tur anih laiin Ṭhangthar poet te kutchhuakah erawh democracy ramah zalen lo ni a an inhriatna a rawn lang ta tlat thung. Anita VL Nunmawii  chuan a poem Infiamna tihah,

Lalte lalna ram,

Hruaitu hruai kawina ram,

Din a ni ta zawk a,

Lal chakna tha, a kut ke,

Mipuite chu phuar beh an ni a,

An ka hupsak an ni(Zaikung Thar Vol.V, 8)

PC : Zodinsanga,Toonlai

tiin democracy rama mipuite zalenna rah behsak an nih dante, zalen taka ṭawng chhuak thei lo tura an ka hupsak an nih dan a rawn tarlang a. Ramlawt Dinpuia poem Zalenna tihah pawh,

Duh sawi thei lo tura kâ hupsak kan ni a,

Kan nihna thlak an tum bawk(thihna thahrui,50)(5-8)

Zalenna hi awpbehna lak ata,

Tlan chhuahna a ni ngawt lo a.

Thlungtu hrêng talchah ngawt a ni hek lo;

Zalenna chu mite ber pawhin

Duhthlanna fim a thlan theih hunah,

Vau leh khap a ral a,

Rikrap leh hnungkhirh a bo hunah,

|iauchhum leh romei thliar hrangtu,

Kan nih hunah chauh kan chang ang.

Zalenna dik tak chu chhandamna a ni si(…,)(13-22)

tiin vautu leh khaptu an awm loh huna, mite berte duhthlanna thlenga a zalen hunah he ram hian zalenna tak tak a hmuh ve chauh a beisei thu kan hmu bawk. Heng poetry-ah hian zalenna ram hmingpua a chhunga chêng mipuite tana hlauh tur leh invenna tur a tamzia leh mipuiin zalenna pum hlum an chan tawk lohzia a lang thei a ni.

 3.5. Ramri humhalhna chungchang:

F.Sangvuana poem Pi Pu Val Hrang Zawngte Ka Ngai Mang E tihah chuan, 

Pi pu chena, kan tawna tui ang nem,

An sahzau sa, kan ram zawng zawng,

An tawna, hawk tui ianga luangral tur,

Ka ngai ngam lo, ka dawn ngam lo a ni()(34-37)

A ngurpui aiawh mipui thlan ten,

Naufa dawntuai thlavang meuh pawh,

An hauh thei lo, kan chek vawng vawng(…,)(65-67)

PC : Zodinsanga, Toonlaini, Vanglaini

tiin mipui aiawh ram hruaituten ramri an humhalh zo lo ni a hriatna leh chung thil thleng avanga mipuite rilru natzia a rawn tarlang a.

A ngurpui thlan lal zawngte,

Biahthuah zawng duai lem hlah e,

“Mi-lu-la hnam zo val kan ni ngai,

Thlangkawr cho rual kan ni nem le”

Sai ngal deng tliak hial awma mawi,

An huk dur dur khua lianah,

Pheisen dar feng za-ral runa chenin,

Naunawnin tuahsak ngai leh si()(120-127)

han tihte hian ramri venhimna kawnga ram hruaitute hmalakna rintawk lohna leh an laka thlamuan zawh lohna a tarlang a ni.

 3.6. Thlei bik neihna(Nepotism):

A hma lama la lang ngai meuh lo, Contemporary political satire poetry a thil langsar tak pakhat chu hna lak chungchanga thil dik lo leh fair vak lo awma hriatna hi a ni. Unemployment leh Entrepreneurship thumalte pawh Mizo ṭawng ang maia a rik hnem tawhna, ṭhalai lehkhathiam, degree nei an pun thur thur laia, an degree tharin lehkhathiam hna nei lo khawvelah a hruai lut nghal ni a an inhriatna karah ṭhangthar poet te hian, hna awm chhun an inchuhna leh chung hna thawk tlak ni tura thiamna nei tura an beihna thlantui luang tam tak chu awmze nei lo a thamral leh mai ṭhin niin an hria a. He mi chungchang hi P.C.Lalngaihzuala chuan,

Thiam tin a zir,

Thaikawi ziak ṭial a seng, 

Hun leh tha, sumpai zawng nen.(Khurpui Zawlaidi, Mizo Poetry Society Whatsapp Group)(1-3)

Than tum val tan,

Bhavan leh Hnamrun kulh bang a sang lua,(…,)(6-7)

Thiamna thiltithei,

Titheiloa siamtu,

Lehkhamawi thiltithei (…,)(12-15)

tiin theihtawpa hlawhtlin tuma lehkha zira bei ṭhin, lehkhamawi thiltithei nei ve si lote tana hlawhtlinna dai buak a har sizia a rawn au chhhuahpui a. Zauva Says poem Pahniha Pakhat tihah chuan,

Tlinna chu thiamna hmanga teh anih a,

Thiamna chu din chanpui tur anih a,

Dikna lal tiang lek anih dawn chuan,

Atan engmah huphurhawm a awm bik lo.

Mahse, duhsaknain thla a zar a,

Hleih neihnain kua a hreuh a,

Thiamna thehthang a ni a,

Thawhrimna ngaihthah a ni a,

Dikna lal tiang a tliak a,

A tling leh tlakte aiin,

Sawipuitu nei ṭha an langsar a! (Zauva, Mizo Literary Forum Whatsapp Group)(4-13).

 tiin dikna hnawl zawnga induhsaknain a tling leh tlakte ai a taimakna hmanga hlawhtlinna um peih lo, sawipuitu nei ṭhate a chawisan dan kan hmu a. Ramlawt Dinpuia chuan,

Kan tum ram thleng tura kan beih laiin,

Kan duh chan ve tuma kan thawh laiin,

Thiamna chauh a tawk loh chin a lo thleng a,

Thawhrimna hmanga hneh rual loh kan hmu ta(Beiseina Khawpui, Mizo Poetry Society Whatsapp Group)(19-22)

Hriatnain a lei phak loh chin a awm a,

Hmelhriat leh chhungkhat ṭha tel loin,

Thawhrimna a thlawn mai a ni leh si,

Duhsakna uchuak vanga hnawl kan ni a,

Tling reng chunga tling lo kan ni leh ṭhin(…,)(23-26)

tiin hlawhtlinna chan ngei tuma thiamna hmanga inel ṭhalaite inelna kawngah a pawimawh ber tura lang thiamna ai a pawimawh zawk a lo awm leh ṭhin si dan sawiin, thiamna hmanga teha tling reng site chu duhsakna avanga inthliarhranna hmanga hnawl an ni a, an ṭhuthleng luah tur lak sak an nih ṭhin thu fiah takin a tarlang bawk. Duhsakna uchuak vanga hnawl ni tate chanai laksak tute chungchang pawh,

Malsawmna dawng intiin an lawm em em a.

An malsawmna dawn erawh kan hak si,

An lawmna siperah chuan inhnangfak ve kan tum a,

An tana thlum kha kan tan a lo kha si(…,)(29-32)

tihte 

A tawpah chuan,

Mi pahniha pakhat,

Thiamna tak nei ai a;

Mi pahniha pakhat,

Sawipuitu nei ṭha,

A dinchan zawkin,

Tuartu an awm a(…,Zauva)(14-20)

tihte hian, hna lak kawnga tehfung dik hman anih loh changa, hnehna changtu tur zawkin a tuar ṭhin dan leh, mihring malsawmna dawngtute vanneihna chu, dikna, rinawmna leh thawhrimna hmachhuan tute tana a khakzia heng hla thuah hian a chiang hle a ni. 

3.7. Pawl leh pawl(political party) inthliarhranna dona: 

Triau Tracx hla Hnih leh Li-ah chuan,

MNF e, ek e bale,

Sawi sawi a ngai lo lam la a tawk,

Lalthanhawl e. hawl lo e,

Sawi sawi a ngai lo, lam la a tawk(Ramenga,1:27-1:34)

tih kan hmu a. He hla phuahtu hian lamna hmun chu a duhthusam khawvel(Ideal state) angin a din a, chu hmun chu mihring tu pawh mihring a nihna anga a zalenna hmun a ni. Chu hmunah chuan political party inthliarhranna chu hnawl a ni a.

Thu bik awm lo kan kal khawm,

Minister lehkha a pawimawh lo,

I neih pawn phawrh lan a ṭul kher lo,

Hmelhriat neih ṭhat a pwimawh lo(…,)(1:44-1:50)

tih te hian political party-in mipui nawlpui nuna a nghawng ṭha lo. mi thiltithei deuhte hmelhriat neih ṭhat leh ṭhat loh inkarin danglamna a thlen ṭhin duh lohna a lantir a. Chung thil leh chung mite chu he hla phuahtu hian a duhthusam khawvelah a hnawl a ni tih a tarlang.

3.8. A ngaihna hria ram hruaitu ngiatna:

Ṭhangthar poet te hian an hlaa politics leh ram rorelna chungchang an tarlannaah an lungawi lohna leh an duhkhawp lohna chauh an au chhuahpui lo a. Heng political satire poetry hrang hrangte hian a phenah, ram hruai dan leh politics khelh dan ṭha zawk rawn tarlangin, kawng an rawn kawhhmuh a, chung thilte khaikhawm theitu hla langsar tak pakhat chu Vincy Chhangte hla Zofate Tan tih hlaa,

Thik vang ni lovin,

Sports lama tui ten tuipuitu an nei ang hian,

Music lama tui minister kan mamawh(Vincy, 2:53-2:58)

PC : Zodinsanga, Toonlaini, Vanglaini

tih hi a ni a ni. He hla thu tlar thum lek phenah hian ram ṭha zawk din tur leh ram hmasawnna kawng zawh tur chuan ram rawngbawlna peng hrang hrang chelh turin, a hna chelh tuipuitu leh a ngaihna hria ramin a mamawhzia a tarlang a ni.

3.9. Ram hruaitute duhkhawp lohna:

Point hmasa lam zawng zawngte khaikhawm theitu leh contemporary poetry-a political satire hnuhma langsar ber chu, ram hruaitute duhkhawp lohna hi a ni. C.Vanhmingliana chuan chung ram hruaitute chu,

Nang chuan nuam tawl nan politics i hmang a,

Ram danga mi changkang chuan an hmang a,

Ram chawikanna turin,

Ram hmasawnna turin,

Mipui nawlpui an din chhuahna’n,(Zaikung Thar, Vol V,29)(27-31)

Nang erawh chuan i pum puar nan,

I vua vangte hai vurna’n,

I mi leh sa duhsak nan,

I hmang si, kan zak e(…,29)(35-38)

tiin ram hruaitute hnathawh dan duhkhawp lohna leh anmahni leh an vua leh vangte inhaivurna tur chauh ngaihtuah a, ram siamṭhat nan ni lo, eizawnna leh hausak nana politics hmangtute mipuiin an demzia a rawn tarlang a. Mizoram hruaitute leh ramdang hruaitute khaikhinin, Mizoram hruai hna chelhtute chu mipuite tizaktu mai an nihzia a tarlang bawk.

PC: Zodinsanga, Postoon, The Aizawl Post

Vincy Chhangte chuan,

Khel lo va inthlan dawn apianga hot zawh chiaha reh zui ziah,

Mipui min theihnghilh zui ṭhintu,

Dawt sawi hreh map lo(Vincy, 0:50-1:01)

tiin ram hruaitu tam tak chu, vote chauh duh, mipui ṭanghma ngai tak tak lo niin a ngai a. K.Hminga chuan,

Ram leh kohhrana hruaitu mi rawn kaite,

Zahawmna dawhsana ding a, felna hmaikawr vuah a,

Biakbuk thianghlimah leh pisa ropuia,

A fawng vuantu chan chang,

Thiltitheitu nih vanga dik lohna thup chingte,

Rawngbawlna sang chelh vanga dik bera inngai(K.Hminga, 0:14-0:42)

tiin ram hruaitute chuan an thiltihtheihna hmanga an dik lohna an thup ṭhin thu leh felna hmaikawr vuah a lem an chan ṭhin thu rawn au chhuah puiin, Rochharzela pawhin ram hruaitute chu, 

Ram rawngbawltu ngei pawhin,

Sual rawng bawl an bang lo va(Thinlung Chawlh Hmun,41)(8-9) 

tiin sual lama an fihlim tawk lohzia a rawn tarlang bawk. Ram hruaitute laka lungawilohna leh anmahni duhkhawp lohna hian, ṭhangtharte kutchhuak political satire poetry a tuam chhuak deuh vek a ni tih theih khawpin he lam hawi tarlanna hla hi a tam a. Hei hian ṭhangthar poet te rilru luahtu leh an rilru puthmang a tarlang a ni.

3.10. Danglamna thlen tura mipui auhna: 

Mizo contemporary poetry-a political satire thuken danglam tak pakhat chu hla phuahtuten an rilru put hmang thlak tur leh danglam ngam tura mipui an auhna hi a ni.Vincy Chhangte chuan Politics Thangnang hlaah,

Dawt sawi hreh map lo,

Candidate i vote ang maw?(Vincy, 0:59-1:06)

tiin mipuite chu an vote thlakna kawnga fimkhur turin a au a. Pu Zova chuan,

Dikna leh rinawmna en kanin vote kan thlak,

Thlengtlawr zuan hrat ten an ngaihsan an thlak(Hnehna Kawnghren,20)(1-2)

Kan nghak dawn em ni Roreltu inhrikthlak,

Hnam ropui hruaitu kan thlan dan hi a atthlak(…,20)(9-10)

tiin mipuite ngei pawh politics hman dan dik lo laka kan fihlim tawk lohzia leh ram hruaitu thlanna kawnga mipuiten kan thuneihna kan hman thiam lohzia a rawn au chhuahpui bawk. Ramlawt Dinpuia chuan,

Aw Zoram harh la,

Aw Zofa tho ta che mawle!

Danglam ngam si lo hian,

Danglamna kan lam liam leh ringawt dawn em ni?(Rawlthar Awrawl, 31)(25-28)

tiin ram hruaina kawnga danglamna thlen turin, ram hruaitu an thlanna kawnga danglamna thlen hmasa turin Mizo mipui a au lawm lawm a ni. Heng poetry hrang hrang aṭanga lang chiang em em chu, ṭhangthar poet te hian ram inrelbawl dan dik lohnaah ram hruaitute leh an hnathawh dan chauh chauh an dem lo va, ram mipui, mal tinte chuan danglamna thlen turin tih theih an nei a, inenfiaha siamṭhat ngai an nei niin an hria, tih hi a ni.

Tlangkawmna: Ṭhangtharte thu leh hla khawvela lungawilohna leh thinrimna inhrikthlakna langsar berte zing ami, political satire poetry te hian ram siamṭhatna kawnga hmalakna tur leh ram rorelna felfai tawk lo chi hrang hrang an tarlang ṭha hle a. Lalnunpuia Renthlei-in,

Satire hian thil nihphung va sawi bawrhban emaw fiamthu thawh nana va hmana a chhiartute chawh hlim emaw ringawt kha a tum ber a ni lo va. A tumram tak zawk chu chutiang kalhmanga siam ṭhat hna va thawh emaw va thawhtir emaw kha a tum zawk ṭhin(Poetry:The Basics, 98).

a tih angin ṭhangthar hla phuahthiamte kutchhuak a political satire poetry te pawh hian sawiselna leh hmuhsitna emaw demna leh hnualsuatna lam ngawr ngawr emaw ni lovin; ram siam ṭhatna kawngah an theihna zawna ṭhahnemngai taka siamrem ngai lai au chhuahpuiin, an hla chhiartute zawng zawng kawng min kawhhmuh an tum tih an hlaah hian a lang a. Hei hian ram siam ṭhatna leh hmasawnna kawngah pawh rah ṭha leh duhawm tak a chhuah ngei a rinawm.

Hetah hian pdf a download theih:

• DOI : 
• 10.13140/RG.2.2.26492.00643

Works Cited:

Chhangte, Vincy. Politics Thangnang. You Tube, 11 October, 2018,.

https://youtu.be/b1zYbFcuQ1k

---,Zofate Tan. You Tube, 9th September, 2013.

https://youtu.be/7M_ZmpVnP0

Department of Mizo, Govt.Khawzawl College. Bingbi(A Study of Mizo Fiction). 2021. 

Dinpuia, Ramlawt. Rawlthar Awrawl. John Laltluangliana Chhakchhuak, 2018.

---,thihna thahrui. 2021

---.Beiseina Khawpui. Mizo Poetry Society Whatsapp Group. 20th march, 2023.

Ellis, Jessica. “Political Satire”. Languagehumanities.org, Accessed 19th March, 2023.

Hminga.K. Tunge Inthlei Thei. You Tube, 13th November, 2018.

https://youtu.be/dYixP7P7wKY

Laldinmawia, H. Literature Lamtluang. 2020. 

Lalngaihzuala, PC. Khurpui Zawlaidi. Mizo Poetry Society Whatsapp Group, 17th February, 2023.

Laltlanmawia edt. Mizo Thu leh Hlaa |hangtharte Khawvel. Literature Club, Govt.Hrangbana College, 2020.

Mizo Poetry Society. Zaikung Thar Vol.V. Mizo Poetry Society, 2023. 

“Political Satire”. Study Smarter. Studysmarter.us, Accessed 19th March, 2023.

Pu Zova(Zothanmawia). Hnehna Kawnghren. In lehkha, 2023

Ramenga(Triau Tracx). Hnawl I Ni. You Tube, 22nd November, 2018.

https://youtu.be/3End_CtoWiY

Renthlei, Lalnunpuia. Poetry: The Basics. Lengchhawn Press, 201

Rochharzela, Thinlung Chawlhhmun. Mizoram Images, 2020.

Says, Zauva. Pahniha Pakhat. Mizo Literary Forum Whatsapp Group, 19th October, 2022.

Sangvuana, F. Pi Pu Val Hrang Zawngte Ka Ngai Mang E. Whatsapp. 16th March, 2023. 

Thanmawia, R.L. Thu leh Hla Ruaipui(Discourse on Mizo Literature & Language). Mizoram University, 4th October, 2022.

VL Nunmawii, Anita. Ni Hawi. In lehkha, 2021.

Zodinsanga. Personal Interview. 19th March, 2023.