Thanga leh Eschatology : Tawpna leh thih hnu piah lam ram

-Lalremruati Ngente

Kamkeuna : A damchhung a mihring rilruin a thlir ber hi a damchhung nun nge ni ang thih hnu piah lam ram tihah hian ngaihdan a insual thei viau ang. Mihringin nikhua a hriat a, ngaihtuahna fim a hman theih aṭanga a um leh sual chhuah a tum ber chu khawvela a dam khaw chhuahna tur ni mah se; mihring rilrua thih hnu piah lam ramin hmun a luah thûkzia chu sakhaw hrang  hrang zirtirna leh khawvel hnam hrang hrang tuan thute hian a tarlang a ni. Chu thih hnu lam ram thlir chuan mihringin a dam chhung nun a hmang a, khawvela chêng chung leh minung ni chunga a va dai chhin emaw, a lo va enlawk chhin phak loh thil mah ni se, chu chu minung rama a thlamuanna leh a thlaphânna inkar hriltu anih chang a awm a, chu chu a chhungril kil khat aṭanga a nun kaihhruaitu ber pakhat a nihna lai a awm tlat a ni.

Eschatology chu eng nge? :

Landes Richard chuan, “Tawpna bul: thlarau thihtheih lohna, piannawnna, thawhlehna, thlarau awmhmun sawnna, hun tawpna” tiin a sawi a(Britannica.com). Routledge Encyclopedia of Philosophy chuan “Eschatology chu thil tawpna zirna…khawvel leh mihring tawpna theory zawng zawng huam thei a ni(rep.routledge.com)” a ti. Gilbert. W. Stafford chuan, “Thuthlung Tharah chuan eschatos hi tawpna ni sawi nan hman a ni a. Isua’n amah insawi nan a hmang bawk(Doctrinal Conference, Anderson)” a ti ve bawk.

Eschatology hi Christian, Juda leh Muslim sakhua a thil pawimawh tak a ni a. Hindu sakhua a Vedanta zirtirna te, Karl Marx leh Plato ngaihdan te thlengin Eschatology chungchangah hian sawi tur a awm. Tun ṭumah erawh hi chuan Kristian sakhaw zirtirna beh chhanin, tawpna leh thih hnu piah lam ram, minung khawvel piah ram leh thlarau khawvel chungchang hi kan sawi ber tur a ni.

Thanga leh Eschatology :

Mizo zinga Matric pass hmasa ber, harhna hmasa ber paw chhuaktute zing ami, hla phuah thiam hmasa ni bawk Thanga (Tun Kum Za Chhunga Mizo Hnam Puipate, 251) hlaah hian mihring nun tawpna leh thlarau khawvel a lang nasa hle a. Thanga’n a hlaa thihna leh vanram a tarlanna te, vanram awm dan leh minung khawvel chhuahsan tawhte a tarlanna te, mihring tawpna leh tawpna mihring nuna a pawimawhna lai a tarlanna te, minung khawvela a chên lai renga thih hnu piah lam ramin a ngaihtuahna a luah ṭhin dan, a hlaa a tarlan te hian Eschatology chungchanga Thanga ngaihdan leh a thlirna an tarlang a. A nuna nunna tawpna, thih hnu piah lam ram leh, thlarau khawvelin hmun a luah dan thlengin a tarlang a ni. Dr. Laltluangliana Khiangte chuan Thanga hla chungchang a sawinaah,

Vânramah chuan Pathian kan fak tawh turzia te, he lei nun hrêhawm chu tuar hrâm hrâm a, vânram thlir tlat turin ringtute a fuih nasa hle a. Vânram chu amah ringtute tana Lalpa buatsaih a nihzia ringtute hriattir a tum hle bawk a ni. Chu hmun chu min thlirtir tlat a tum a ni(Zo-Lungthu-Pathum, 46).

 tiin Thanga’n thih hnu piah lam ram(vanram) a ngaih pawimawhzia a sawi a, he ngaihdan hi a dikzia Thanga hla te hian a tarlang chiang hle. Chutihrual chuan Thanga kuchhuakte hi ama phuah leh lehlin hriathran hleih theih loh a awm nual a, a phuah hai chhuah loh te pawh a awm nual thei ang. Chuvang chuan he paper-a ama phuah anga tarlante hi lehlin a lo awm palh anih pawhin, a hunlaia hmuh chhuah hman loh a ni tih min lo hriatsak dawn nia. Thanga’n mihring tawpna leh thih hnu piah lam ram a hlaa a tarlanna hrang hrangte chu:

1. Thih hnu piah lam ram awm dan: Thanga’n a hlaa thih hnu piah lam ram a tarlan hian Kristian sakhaw behchhanin hmun pakhat a kawk vek a, a hla ṭhenkhatah ‘vanram’ ti a  a tarlan laiin, a hla ṭhenkhatah erawh a hmun hming sawi lem lovin a tarlang tam hle bawk. Thih hnu piah lam ram a sawinaah, hremhmun tarlan zeuh chang a nei a. Mahse, Thanga’n a hla tam zawka a tarlan leh a hla aṭanga thlirin, thih hnu piah lam a ngaihtuah chang a, Thanga rilru luah tamtu ber chu Vanram tho hi niin a lang. “Pialral chawlhna ṭha tak a awm” tih hlaah chuan chu hmun chu, lui rala awm ram mawi tak, ni tlak ngai lohna hmun, khawpui êng mawi tak niin a tarlang a. He hlaa vanram a tarlan dan sawh ngheh leh zualna tur niawm tak hian, “Ka van in khi, a mawi, a êng” tih hlaah chuan, a hla thupuiah meuh chu hmun ênna mawizia chu rawn tarlangin, chu van in Pathianin atana a buatsaih chu ni ai a êng zawk, arsiin a bawm vel hmun anih thu a tarlang leh bawk. “Van Jerusalem thar mawi tak” tih hlaah chuan,

Lung man tam kulhpui mawi tak chu,

I rângkachak kawtkai tle tak chu,

Nghet tak leh mawi taka rem chu(Zo-Lungthu Pathum, 66)(6-8)

tiin chu hmun chu rangkachak leh lungmawiin uluk taka din anih thu a tarlang bawk.

2. Tawpna leh khawvel lehlam danglamna : “Van Jerusalem thar mawi tak” tih hlaah thihna chu hnung lama thlipui hlauhawm, tiin a tarlang a. “Ka khawvel nun tawp buaina tuifawn ka kanin” tih hlaah minung khawvela mihring tawpna chu tuifawn ngainatawm loh tak ang a tarlangin, buaina anih thu a tarlang bawk. Thanga hian a hlaah thih hnu piah lam ram a tarlan tam hle laiin, minung tawpna lai tak hi a tarlang tlem hle a. A tarlan chhunah erawh thil ngainatawm loh leh thlakhlelhawm loh tak a nihzia a tarlang chiang hle thung.

Tawpna hun ngainatawm lohzia a tarlan ruala minung tawpna khawvel leh thihnu piah lam ram daidangtu thihna kawngkhar lehlam lehlama thil awmte inan lohzia a tarlannaah, “Ka khawvel nun tawp hunin, buaina tuifawn ka kanin” tih hlaah chuan,

Ka khawvel nun tawp hunin buaina tuifawn ka kânin,

Zing êng tak leh ropui chu ka hmu ang;

Ka tlantu ka hrechiang ang a lui râla ka thlen hunin,

A hmel duhawm min lo lawmtu a ni ang(…,59)(1-4)

tiin buaina leh lungngaihnan ral lehlam chiahah chuan hmun nuam tak a awm thu sawiin, “Van Jerusalem thar mawi tak” tih hlaah phei chuan,

Chutah chuan engthawlna a awm,

Edena mi ai a nuam kha, (…,66) (13-14)

Engthawl tawpna ber a awm . (…,66)(30 )

a ti hial a ni.

3. Vanram-hmangaihna ram: Thanga’n a hla hrang hranga hun tawp leh thih hnu piah lam ram a tarlannah hian, vanram nun a tarlanna a tam ber a. Chung zinga langsar tak chu vanram chu huatnate pawh a awm tawh lohna hmun, mi chi hrang hrang inngeih taka an len dial dialna hmun ni a a sawina hi a ni.”Chhandamtu tak a hnai ta e” tih hlaah chuan,

Tin, he khawvel aṭang hianin,

Lalpa hnenah kan kal ang,

Hmangaih lalṭhuthleng din hualin

A hming kan fak leh zual ang(…,50)(25-28)

tiin chu hmun chu inhmangaihna ram, hmangaihnain ro a relna hmun anih thu a tarlang a. “Engah kan lainat ang?” tih hlaah chuan vanram a sawinaah,

Chung pik a awm tawh lo,

Nat leh inhauh te nen,

Chatuanin an awmho,

An chhandamtu tak nen(…,65)(19-22).

 tiin chu hmunah inngeihlohna leh inhuatna ten hmun an chan ve tawh loh thu leh , chu hmuna chêng te chu inhmangaih leh induhsak tawn taka an lenho dial dial thu a tarlang bawk.

4. Thihna a thihna hmun : Thanga hlaa Eschatology hnuhma kan hmuhah hian thihna chungchang chaina a lang tam lo hle a. Thih hnu piah lam ram a tarlanna hlaah erawh minung khawvel nena a danglamna a tehkhin nasa hle thung. Chung zingah chuan thih theihna leh thihtheih lohna (mortality & immortality) chungchang tlem azawng a lang ve a. “Ka van in khi a mawi, a êng” tih hlaah chuan, chu hmunah chuan thihna a awm tawh loh thu a chang khatnaah a tarlang a, a hla tlar tawp berah,

Lal kiang taka awm ka duh fo,

Engmahin a tiral thei lo (…, 33)(15-16).

tiin chu hmun chu engmahin a tihral theih loh, thihna leh tawpna ten an tihbuai phak loh hmun anih thuin, tlang a kawm leh bawk.“Van Jerusalem thar mawi tak” tih hla chang thumnaah,

Khawpui mawi nuam tak leh engthawlna,

Chu mi thlen chu ka nghakhlel hle;

Hnung lama thlipui hlauhawm te,

Thihna te, nate leh hrehawmin,

Engtin nge min tihbuai theih ang? (…,66)(17-21).

tiin chu hmunah chuan thihna ten a tihbuai phak tawh dawn loh thu a tarlang bawk. A hlaa thih theihlohna lo lanna te hi vanram nawm turzia nen chawmpawlh anih zel avangin, thih theihna nena tehkhin zeuh chang te pawh han nei ve bawk mah se; heti lam hian a ngaihtuahnaah hmun a chang tam hman meuh lo niin a lang.

5. Mihringin a zawn chawlhna awmna hmun: Philosopher leh theologian ni bawk St.Augustine chuan, “Mihring hian Pathiana chawlhna a hmuh hma chuan, a thinlung a chawl thei lo(Augustinian Vocations of North America)” niin a ngai a. Man Search for Meaning ziaktu Victor Frankl leh Plato te pawn mihringin chawlhna a zawnna chungchang hi an lo chai nual tawh bawk, The Myth of Sysyphus, Albert Camus ziak leh In Praise of Idleness, Bertrand Russell kutchhuakah te pawh mihring nun an zirchiannaah philosopher ten he ngaihdan hi an neih fo thu a lang a ni.

Thanga hian a hlaa thih hnu piah lam ram(vanram) a sawina reng rengah, lungngaihna leh ṭahna, buaina leh manganna, rilṭam leh tuihal, thlaphanna leh hrehawmnate an awm tawh lohna hmun a nihzia a tarlang uar ṭhin hle a. Chatuana hlimna hmun tur anih thute, a nawmna sawifiah hleih theih loh khawpa ngainatawm anih thu te, nuam zawng zawng awmna hmun a nih thu te pawh te pawh a sawi lang fo a. “Van Jerusalem thar mawi tak” tih hlaah phei chuan,

Van Jerusalem thar duh tak,

Ka thinlungin hmuh ka duh hle;

Tah chuan lungngaih a awm tawh lo vang,

Engthawl tawpna ber a awm e (…,66)(28-31)

tiin, chu hmun chu engthawlna sang ber, hahdamna, chawlhna hmun anih thu a tarlang a ni.

Thanga leh vanram: Mizo pi leh pute khan an sakhuaah thih hnu piah lam khawvel atan ‘pialral’ leh ‘mitthi khua’ an lo din a. Pialrala faisa ring a awmte nun dan turte, mitthi khua ami ten minung khawvel ami te ang thoa rim taka hna an thawh dan tur an mitthla dan te(Pi Pu Zûnleng, 215, 216) han thlir hian, thih hnu piah lam ram an thlirnaah khawvel nunphung pel lutukin mitthla an din thiam lo niin a lang. Thanga hla leh Mizo Christian hla hmasa dangah hian vanram a lang tam hle a. Thanga’n vanram chu lui kamah a lan dan pawh ropui tham taka, nghet taka din, hmun nuam leh ngainatawm, minung khawvela hrehawmna bo vek tawhna tura a thlirna ang hi hla phuahtu dangte kutchhuakah pawh a ni deuh vek a, daidanna lehlam lehlamah vanram nawmna leh khawvel hrehawmna inṭhenhrang nghal deuh phak anga an ngaihna a lang bawk.

Chutiang chuan, Thanga hlaah pawh hian thih hnu piah lam ram a thlirna leh, vanram a ngaihzia leh thlen hlan a nghahhlelh tawhzia a tarlanna hla apianga a awm mekna hmun lan dan chu hmun hrehawm, buaina, lungngaihna, ṭahna leh manganna ten an hual velna hmun anih ṭhin avangin, chu chuan a thlarau awm hmun sawnna tura a thlirna lamah pawh hmunhma bawk a dintir ṭhin niin a lang.

Tlangkawmna: Tun thlenga chuai thei lo Mizo Kristian hla mawi tak tak phuahtu Thanga kutchhuak hla hrang hrangah hian, hla phuah thiam, lungleng mi a nihna piah lamah mihring ngaihtuahna thûk tak leh thil thlir thiam mi tak a nihzia a lang thei a. Khawvel hrehawm a tihna a lanna hla apiangah Pathian leh vanram a ngaihzia a lang zel bawk. Chu chuan inngaihtuah beidawng lo va, harsat manganah pawh Pathian hnena tlulut ṭhin mi a ni tih a tarlang a. A hla hrang hrangah hian Pathian a beiseina a lang a, chu chu a hla luah tamtu ber pawh a ni. Mi thil chik mi leh ngaihtuahna hmang mi a nihna a hlaah hian a lang a, a hlate hi zirchian tham a tlingin, zir zau leh belhchian pawh a la hlawh zui zel ngei ang.

PDF : 

10.13140/RG.2.2.18381.41442

Works Cited:

“Augustine’s Restless Heart”. Augustinians Vocations of North America. Access 1st July, 2023.

https://www.beafriar.org/augustines-restless-heart

“Eschatology”. Routledge Encyclopedia of Philosophy. Access 1st July, 2023.

https://www.rep.routledge.com/articles/thematic/eschatology/v-1

Khiangte, Dr.Laltluangliana. Zo-Lungthu-Pathum. Lengchhawn Offset, 2021.

Landes, Richard. Eschatology:religion. Encyclopedia of Britannica, Access 1st July, 2023.

https://www.britannica.com/topic/eschatology

Lalthangliana, B. Pi Pu Zûnleng.2007.

Stafford, Gilbert. W. “ESCHATOLOGY” A paper prepared for the Doctrinal Conference. Anderson, Indiana, 2004.

Vanlallawma, C. Tun Kum Za Chhunga Mizo Hnam Puipate (1894-1994). 1994.