Angelten An Awmpui – Lalrammawia Ngente Sawihawnna

 (A ngai ngaia post tawp😀) 

He lehkhabu hi a soft copy lehkhabu tura rem anih hma chauh ka hmuh avangin a thawnthu kamkeuna ni lo thu hma dang a neih leh neih loh ka hre lo a, hard copy hian phek engzat nge a thlen pawh ka hre chuang lo a, critical deuha preview loa sawi hawng tawp tura vau lawk ka la ni leh zel a, lehkhabu sawi hawng turah chuan a hre tawi ber leh thu lo ber ka la ni hial mai thei a ni.

Eng pawh ni se, he thawnthu hi tunlai tak, contemporary Novel-ah pawh tunlai ngawih ngawih ber pawl a niin ka hria a. A tunlai thei ang bera Mizorama thil thleng mek leh thil thleng thei tarlanna ni si a, a thawnthu laimuin suangtuahna ram min panpui lek lek chang awm lawi si a ni a, Christian allegory novel tih tur chi anih miau avang leh narrator(thawnthu sawitu) hian chu lam pana min hruai tlat avang chuan, a thawnthuin a tum ram a pan chhoh lai a complication (thawnthua harsatna inṭan chhoh lai) a luh chhoh lai vel phei hi chuan John Bunyan-a Kristian Vanram Kawng zawh mitthlaa a lo lan iar iar laite pawh a awm thei hial a ni.

He thawnthua protagonist ( a changtupa ber) Vana, Angelten an awmpuina kara a laina neihchhun a nuin a thihsanin, hun rei tak rauhsan tawh “Lalpa hmun thianghlim” dinthar leh tura a beihna kawnga a paltlang zawng zawng hian Mizoram dinhmun a hawl kimin a tarlang chiang hle a, chu chu a thawnthu kal zelin suangtuahna khawvel min panpui lek lek chang pawha a tak rama min chentir tlattu a ni lawi bawk si a ni.  Thihna leh lungngaihnain a thawnthu a rawn keu hawng a, chu thihna chuan mihring tawn theih thil chhe ber ni lovin thlamuanna famkim awmna lam min han kawhhmuh nghal run bawk a, a nu sulhnu a chhuina lamah a changtupa Vana’n atana lo ruatlawk sa thlap niawm tak, a tihtur/hnathawh tur lo inhunna hmun a chharchhuak a, a tawp thlengin a mawhphurhna hlen tura a beihna kawngin he thawnthu hi a luah khat a ni deuh ber mai.

He thawnthua hming lang hi 15 an niin ka hria a (Ka chhiar sual loh chuan), chung chu a thawnthu laimu nena inzawmna nei mahnia thawnthu hran rawn ken nei an ni deuh vek a, hming tarlan lem loh thawnthu pawimawh tak rawn keng an awm nual bawk a, chung thawnthu tawi zawng zawng chu he Novel a Pathian ropuizia leh thiltihtheihzia tarlanna hmanraw pawimawh tak an ni vek bawk. Zikpuii Pa C.C.CoY no.27 sawi anihna hmun apianga ri tel ve ziah chu nula leh tlangval inhmangaihnain a pawlhnut loh, thawnthu ngaihnawm leh belhchiann dawl tak si a nihna hi a ni a, he Novel-ah pawh hian neih inang inkawpna leh uirena te, ramhuai nula niawm takin mihring(mipa) a thlem velna te a lan laiin nula tlangval inngaihzawnna lam a lang tel hauh lo thung a, chu chu a main-plot kalphung hrim hrim piah lama he Novel danglam riauna hi niin ka hria.

Vana leh Rina te ṭhian dun khawsak dan leh anmahni duhsak em emtu Pu Zaua leh Pi Hmuni te nupa damchhung nun hman ral dan te, Pu Thankhuma duhthlanna mak tak te hian khawvel hausakna leh ropuina um a intlansiak luai luaina leh, mahni khawvel ṭheuha buai em em, inngaihsak tawn hman mang tawh lo chunga mi chi hrang hrang inpelh suau suauna karah mahni tan chauh ni lo ram tana Pathian mamawha tuihal, a zawng zawnga Pathian lalna ram châka tuihal te hmel a tarlang a. Hmingmawia nun aṭang hian rilru fima a tak ram luhchilh ai a a chhehvel buaipuina leh phurthut rawngbawlnain a hrinchhuah Pastor te ei lohna leh an rawngbawlna ngaihnepna te, mihring rilru kalsualin kohhran laka helna a thlen theih dan leh kohhran pawimawhna a lang chiang em em bawk.

He Novel a character (a changtute) hrang hrangte hian mihringin a nunah zawn a nei ṭhin angin, zawn an nei a, um an nei ṭheuh a, an zawn a inang lo a, an thinlungin a zawn an hmuh chhuah dan a inang lo a, an thinlunga zawhna chhanna an hmuh chhuah erawh a rawn inang leh ṭhap si lai hian mihring an nihna a rawn khaikhawm a, he lai ngawt pawh hi chai fe tham a tling dawnin ka hria. He Novel-ah hian tunlai khawvela sualna awm thei zawng zawng chu a lang kim deuh vek mai ang a, tih theih a ni a, chutiang zawnga chhut chuan Sodom leh Gomorra bu niawm takte pawh a nihna lai a awm a. Mahse, chu chu he Novel thawnthu laimuin a ken ber ni lovin, he thawnthu laimuin a ken tifiah tura lantir zawk an nihzia erawh a thawnthu tawpa danglamna lo thleng ta hian a rawn tarlang chiang hle thung. 

Ruihhlo avanga buaina te, hripui leng avanga buaina nasa tak leh Biak In hial khar a nihdan te, hripui avang chauh ni lo, a chhung luahlum ṭhin tute thinlunga a hlutna a tlakhniam taka vanga Biak In rauhsan a nihdan te, Kohhran rawngbawlna leh dar rik lohna lam rawngbawlna te, khawvel thiamna leh finna umna avanga sakhuana ngaihnepna te, mimal nun zalenna(independent) duhna leh nula lengrei leh nuthlawi nun chungchang te, sakhaw pakhat vuan chung si a kohhran hrang hrang inthliarna (denomination) chungchang te, neih inang inkawpna leh mahni taksa zawrhna chungchang te, mihring kaltlanga sual leh ṭha inbeihna te, a hring a hrana ramhuai leh mihring inbeihna te, tualthihna leh tualthahna nena inhnaih tak anga lang thihna phena sual thununna te, politics leh sakhuana chungchang te, Theocracy leh democracy chungchang te, zoram kristiante nena inhmeh tak kraws phun leh put chungchanga ngaihdan insual te, Bible leh science, atheism leh apologetics debate ten he thawnthu hi a luah khat a, chung buaina hrang hrang hmang chuan he Novel-ah hian tunlai khawvel chhawpchhuah a ni a, ngun taka ngaihtuah chuan dinchawp khawvel ni lovin, a chhiartu khawvel hi a kawk ta tlat a ni. 

Kum 1894 aṭanga kumin 2023 inkarah hian, kum 129 chhungin Mizo Christian Literature hi a pung chak mawlh mawlh hle a, literary genre hrang hrang zingah pawh a thawm nei ber Novel-ah phei chuan a lang deuh mawlh mawlh a ni ber  mai. Chutih rual chuan kristianna a sir lehlam aṭanga thlirna leh Kristian sakhaw lungphum, a tuam mawina tel lem lo va an insual bap bapna vawiina kan release tur Novel ang tak hi chu kan la nei lovin ka hria a, kan ṭhenawm ramah ram inchuhna leh hnam inkar buaina niawm tak anga lang, tuipuiral lam aṭanga lo thlirtuten kristiante tihduhdahna ni a an rawn puh nghal chat leh ṭhalaiten politics an la ngaihven nasat ber ṭum inthlan kan hmachhawn lai meka he Novel rawn chhuak thut mai hian ngaihtuah te pawh a tithui ang reng hle.

Ka chhiar a, ka chhiar nawn a, kan keu let leh ṭhin a, critic rilru pu taka chhiar luih pawha he Novel chhunga Pathian thlarau thawhna phekin rilru a khawih dan a danglam tlat ṭhin hi a mak ang reng hle. A tak ram behchhana ziak thawnthu hi  a nung a, a mi khawih dan a danglam tih a ni ṭhin a, chutiang deuh chuan he Novel hi a nung riaua hriatna ka nei a ni. A thawnthu tawp lam ami hi tlemte tarlan chak deuh ka nei a( a bu pangngai ka hmuh tak loh avangin, a phek no pawh ka hre chuang lo😀) 

Biak In dar ri chuah chuah mai chuan lung lam a tichhia. Rei tak khawnrik mumal tawh loh chu Pathian mite koh khawm nan a ri leh ta…kohhran hrang leh kalphung thar ai mahin an inzawmna leh an inpumkhatna Isua Krista avang chuan pâwl inerna emaw a awm tawh lo.Veng ṭhenkhatah phei chuan biak in lian leh lawilen rem berah an inkhawm mai a.Thinlung hmun khat, thlarau hmun khata an awm avangin engmah innghirnghona leh inenhranna a awm reng reng lo. Van ram nun chu leia kohhran hote chuan an tem ṭan ta a ni.

Ram hruaitu rualte takte chu a ni, hmuhnawm ni. Pawn lam aṭanga hmuh theih piah lamah chhungril lamah inhmangaihna leh in pum khatna an nei thûk a. An rorelna engkimah ‘Pathian Engkimtitheia’ chu hma theh leh hmahruaituah neiin ram rawng an bawl ta tak tak a. Eptu pawl lamte lah chuti tho. Roreltute sawichhiat leh hêk chhiat hrim hrim tum aiin ramin hma a sawn theihna tur anih chuan tiin roreltute hmalakna an ṭawiawm ṭha a. Sawrkar fawng vuantu lam pawhin an rawtna leh ngaihdan ṭha taka dawngsawngin hna  an thawk ho ṭha em em mai a. Rorelna hmuna an khawsak dante chu ram danga rorêltute tan entawntlak a tling a, Pathian a ropui takzet a ni.

Zoramthar au thawm kan hre ṭhin a, chu thuvawn aupuitute kalpui dan kan pawmpui leh pawmpui loh chu thuhran ni se, heti taka ṭhalai, a tuipui ngai lo ber thlengin politics kan tuipui ta hian kan thinlungin Zoram thar a thlir dan chu a tarlang chiang viau thoin a lang. He Novel hi a chhiartu tam tak chuan Zoramthar tih hming an vuahsak em loh pawhin, chumi chungchanga duhthusam ram tarlanna a nihna lai chu a zir mite pawhin an la rawn hai chhuak hlawm ngeiin a rinawm a. Literature-in ram kalphung leh mihring rilru sukthlek a her danglam bawih bawih dan history-ah kan hre fo a, he lehkhabu tawpnain a tak rama thawnthu thar a ziah hun tur hi  a nghahhlelhawm a ni tih hian kan titawp deuh thut ang e. 

 -Aremruati

150623