Kum sûl liam hnu leh kan nghah krismas

Sahmulphah thla a lo thleng a, thlasik boruak vawt var karah zing nichhuak leh tlai ni tla tur pawh a thlasik ni raih tawh. Kawngkama tlangsam leh bawngpu par te, khawlai dung vaivutin a bawt pawt chiai te chuan pawltlak thla  leh lal piancham lo inher chhuak thuai tur an rawn hril a. Zan lama van zawla arsi de sep sep leh thlasik kawng zam reih te nen, thlasik boruakin zoram a tuam lai hi mi tam takte lunglen kaithotu pawh a ni fo reng a ni.

Kum 54 kal ta, Mizoramin hun lungchhiatthlak a tawn lai, zalenna sual tura Mizo mipa tam takin mahni inlum chhuahsan an nunna thapa ram chhan tura an inpek lai, khawkhawm leh curfew boruakin Mizo mipui nunphung tam tak a thlak danglam hnu, indona avanga an hmangaih chánta ten hun harsa tak kara lal piancham an hmuah ve mek laiin November ni 8, 1969 zan khan, Chhippui camp-ah C.Lalkhawliana leh a ṭhiante chu lungleng takin an zai tleng tleng a. “Kum lungleng” ti a a lo sawi hial ṭhin, indona leh buaina rapthlak tak avanga nunphung pangngai pawha nung hlei thei tawh lo ten an lusunna, an buaina, Mizo hnam leh an mimal nuna thil thleng tam tak an chhuiletna kumah thlasik boruak vawt var hnuaia Mizo sipaiten krismas hla mawi tak tak sa a,  mittui tla lek leka men pawh men phal mang lo a an han zai chuan, patling kum 32 mi, a nupui fanaute kalsana hnam chhan tura inpe an hotupa C. Lalkhawliana  chhungril a luh ta riau mai. An bula zai ve mai pawh duh tawk lovin a ṭhutna aṭanga tho sawnin pawnah a va chhuak a, van lama arsi sep sep leh thli thaw hek hek te kara a ṭhiante zai lungleng taka a han ngaithlak vang vang hnu chuan,

Kum sûl liam hnu kan nun ngaih lai tho leh ṭhin,

Rem Lal pian hun champha hma tiangah kan thlir;

Sikni êng mawi leh zan boruak thiang lêng vel,

Ngaih lai tizual tur rêngan mâw!

25th October, 2023. He thuziak tur puala inkawmna

tih hla thu hi a rilruah a rawn awm ta a.  Chutiang hun harsa zalenna um vang ni si indona, thihna, buaina leh tuarna chi hrang hrang rapthlak takin zoram a tuam vel laia a lunglenna chuan mihringte chhandam tura lo piang Isua lo pianna hmun Bethlehem lam a han fang zel a, a chhehvela thil thleng a han ngaihtuah leh a, chu hmun khawhar taka an awm chhan Mizo mipuite a mitthla kual zel a, “An chhungte thitate sûna lungngaihnain a bual mek te, buaina avanga in leh lo chân tate khawvelah chuan nau piang chibai buka, hlim taka lal pian hun lawm tur pawh an awm meuh lo ang a” tih te a han ngaihtuah chuan; “Eng pawh ni se, he hunah hian Lalpa, kan thinlungah lal ber ang che” ti a rilru ṭawngṭaina nen,

Aw, thlir zel ila Bethlehem tlangpui,

Ran in tlawma Chhandamtu piang chu;

Hmanah miten lâwm lo mah se la,

Lalpa, kan thinlungah Lal ber ang che.

LPS Ziaktu Choka, 2017. Krismas pual: C. Lalkhawliana biangbiakna

tiin a  ṭhiante bul aṭanga a haw hnu chuan zanlaiah a chhunzawm leh ta a ni. A lungleng suangtuahna leng vel chuan a ti mu thei ta meuh lo va, tlaivar meuha he hla hi phuahin a ngaihtuahna chuan kiltin a dap kual a, pangngai taka invui leh hunserh pawh mumal taka hman rem lo kar,a ramhnuaia an ṭhiante thi tam tak an lo vui liam tawh te leh an kalsan tak an chhungte chu a mitthlaah an lo inlar zut zut a, indona leh thihna avanga an chhungte chân tate tan chuan lunglenga ṭahna hun atan a hman mai a awl turzia a han ngaihtuah kual zel a.

Lêng zawng thinlai damten lawm kim tak ang maw?

Rual duh kal ta suihlung rualpuite zawng kha;

Ngai mah ila koh kir leh tur awm si lo,

Rem Lal piang chuan thinlai hnêm rawh.

Chhung tin lawm lai pâr ang vul ni leh hunte,

Engtin hmang maw kâr hla a lêng rual duhten?

Thinlai damte’n hmang la he hun lawmawm hi,

Hlimin lawm la Lal lo piang chu.

tiin khawvel chhandamtu Isua pian champha chu hlim taka hmang tura a duhsaknain a chhunzawm leh ta a ni. C. Lalkhawliana rilruah chuan thlasik lunglen leh mi tam takin krismas kan hman dan a veina chu a reh thei meuh lo a, “Kum sûl liam hnu” a phuah aṭanga kum 15 lai a liam hnu, kum 1984-ah “Kan nghah krismas”  hla hmanga a vei zawng chu rawn puang chhuak lehin,

Chinlai lenrual nangni chhungkûa lo ngai teh u,

Nau piancham lâwm turin sawm bik kan ni!

Kan vannei hle hun ṭha damin kan chang,

Van mite lâwmna hla i zâi pui ang.

Van Angel hoten zan reh lai takin,

Pungkhawmin rem lemnaa thuchah an rawn puang;

Keini pawhin chu Chanchin lawmawm chu, 

Duhsakna nen kan rawn hlan che. 

Sikpui Rimawiah H. Lalremruati'n " Kan nghah Krismas" a sa a, a phuahtu C. Lalkhawliana'n piano a tumsak. 

tiin nau piang lawm tura kan la dam leh nunna pek kan la ni chu kan vanneihzia hlain a rawn hril hial a ni. Silai mu leng kara nun tam lo hmang tawh, indonain mihring nun a nghawng thûk theihzia hre chiang em em tawh tu, amah ang bawka nupui fanau enkawl tur nei, chhungkaw innghahna tam tak mittui nen ramhnuaia lo vui liam tawhtu chuan nun ralmuang leh remna hlutzia pawh a hre chiang hle. Mihringte chhandam tura nau lo piang hlutzia leh nau pian champha lawm anih chhan te chu a han ngaihtuah a. Mi tam takin chu hun lunglen nan leh lungngaih nan te, an chhungte thi tawh ngaia ṭahna hun atana an hmang fo mai chu a veiin; pawi a ti em em a. Hlimna ni chu khawhar nana hmang lo a, hlim taka nausen chibai bûkna  hun atana hmang ṭheuh tura duhsakna rilru nen,

Engtin hmang ve dâwn che u maw hlimna Mas ruai,

Hlimna niah khua kan tihar fo ṭhin,

A ṭhen mahni hlimhlawp mai bâwl lovin,

Mi dangte hlimna pawh i thlir zel ang.

Sikpui Rimawi, 2019. C. Lalkhawliana biangbiakna, Ignite Studio.

tiin min chah lawm lawm a ni. Thlasik a lo thleng a, Biak In tinah, ṭhalai inkhawm lam thlengin krismas hla kan sa tlut tlut a. Hunpui inher leh kan boruak tawnin azir miau chuan tu tan pawh he hunpui hi, vawikhat tal lungleng lo va paltlang a har viau mai thei. Kristiante tan chuan hunpui hlu leh pawimawh ber anih miau avangin, khawi hmunah pawh awm ila, hna leh hmachhawpin min chim buai berna hunah pawh hun danglam a nihna hian, hai rual lohin chhungril lamah min ṭhawng tho leh nge nge ṭhin.

Kum 1914 kuma Indopui pakhatna avanga mahni inluma krismas hmang thei loa indona muala zan khawhar leh lunglenthlak hmachhawn mektu German leh British sipaite pawh kha, he hun danglam hian anmahni mai ni lo khawvelin a theihnghilh ngai loh tur thawnthu ngaihnawm a ziahsak hial anih kha. Zan khaw vawt vin tuk kara an ralven buk aṭanga ramhnuai reh ruih leh van boruak thianga arsi de sep sep an han thlir chuan; chhungril lamah krismas boruakin a rawn tuam a. German sipaiten thinlung taka Joseph Mohr hla,

Zân thiang reh lai takin,

Ênna a lo thleng ta

Hraitê rawn chawi, chûn nunnêmin,

Nau thianghlim ngilnei leh zaidam,

Remna Lal Fa chu.

tih hla tihtakzeta an sa ri chuan, silai leh indona thuam famkim nen indona muala an hmachhawn mek British sipaite thinlung a deng thleng a. An hmelmate zai chu hlim taka lo zawmin, chu indona mualah chuan zân thiang reh lai takin ênna a lo thleng a; an thinlungah indona leh huatna aiin remna lal piangin hmun a chang lian ta zawk a ni.

Hmana indona avanga ṭapa lo rûm vawng vawng tawh, hmangaihtu leh hmangaihte châna thihna avanga mittui lo seng tawh, harsatna leh manganna nun thlipui hrângin a lo nuai vir nawk nawk tawh. Pathian hruaina leh awmpuina avanga vawiin dam taka thleng a, boruak muanawm tak hnuaia lal piancham hmuak mek tute hian, eng rilru puin nge he hunpui lo thleng tur hi kan hmuah ve le?

Chhungkuain hlim taka krismas kan hman tlan theih nana hmun danga zirna leh hna avanga awm bo te pawh kan haw khawm ruih ruih lai leh, kan inchhung mai pawh ni lo; Biak In leh a chhehvel, khawlai dung leh kawtthler thlengin mawina famkima thuam tuma kan cheimawi lai te, silhfen mawi leh eitur tuihnai chi tinreng nen chhandamtu piancham puala kan intuituah lai te, rimawi hmanraw famkim nena hunpui kan lawm mup mup lai hian German leh British sipai ten an sipai rilru dah ṭhaa nau piang an lawmna rilru kha ṭawmpuiin, indona muala C.Lalkhawliana’n Pathian a auhna “Lalpa kan thinlungah lal ber ang che” tih hi kan zawm ve thei ang em?

-Aremruati