Rev. H. Laldintluanga Novel Baka Ruamah (Jasona leh Tirzai ) Preview

Mizo Theologian/Pastor te kutchhuak thu leh hlaa  kan la hmuh tam loh tak chu Novel hi a ni. H. Laldintluanga ziak Baka Ruamah thawnthu hi phek 83 a chhah, bung 13 a ṭhen a ni a. Novelette leh Novel inkara ding, a lehlam lehlam thle tawn thei dinhmuna ding a ni deuh ber a. Ṭhangtharte hun thu leh hla (Contemporary literature) a thawnthu kalhmang leh tehdan chungchangah pawh ngaihdan a inthlak chhoh mek lai hian literary critic tam takin novel-a an pawm theih chiah loh tur nimah se; a sub-genre azira novel huang chhunga khung theih tur a ni tho a. Plot structure, dialoque, character a din dan engkimah Mizo thawnthu kan lo hriat ṭhin tawhte laka danglam tak, kalhmang hran nei anih avangin chung zawng zawng leh a zirchianna tur lam thlir tel chung chuan Novel  huang chhunga khung a him tho ang.

He thawnthu hi Bible-a Juda culture-a innghat, tunlai khawvel leh Mizo Kristian nunphung nena inhnerem tak tur si a herrem a ni a. Chutiang anih avang chuan a thawnthu innghahna/ a hunlai (time setting) pawh hi chhuidawn thiam a har hle a. He thawnthua hmunhma pawimawh tak lo lang Jerusalem Temple leh a thawnthua a changtuten Kalhlen kut an ngaih pawimawhzia lo langte han ngaihtuah hian Jerusalem Temple an tihchhiat hma, AD 70 bawr vel (a hma lam hret) niin a lang. He lehkhabu hi  Juda tleirawl pahnih Jason-a leh Tirzai te inhmangaihna ṭiaktir duhawm tak chawmlenna kawnga, sakhuana leh Baka Ruam zinkawng hmanga mihring nun chhungril darthlalang fiah zawk hmanga tarlanna a ni deuh ber a, chu chu he thawnthu laimu (main plot) innghahna leh a thawnthu pumpui khaikhawmtu a ni.Chutiang chu a thawnthu kalhmang anih avangin he thawnthua harsatna lo lang pawh hi Mizo novel leh thawnthu tawi lam thleng pawha han thlir kual a, lang tam lo ber pawl khuarel thilin harsatna a siam (Situational Conflict) leh chhungril lam buaina (Inner/Psychological Conflict) insualtirna hmanga duan a ni tlat mai a. A thawnthu kalhmang a remdan (Plot structure) ah pawh Mizo thawnthu tam zawk hi Icarus story arc leh fantasy thawnthu puitling lamah Hero’s Journey te hman lar ber anih laiin he thawnthu kalphung erawh “Double Man in a Hole”  story arc hmanga duan a ni daih mai.

Harsatna (Conflict) lian ber chu a thawnthu hmunhma (setting) pawimawh hmanga rawn siamin, a thawnthu kalhmang (Plot arc) a duan dan rawn nemnghet tura harsatnain a tlûkna ngaiah chiaha a thawnthu a tlûkpui leh laia, chu harsatna thuchah rawn puak chhuah dan erawh chuan a thawnthu chhiartute min barakhaih leh em em lawi a. A thawnthua thil pawimawh lian tak, harsatna (conflict) lo thlen dan nena inzawm tlat a hmunhma a rem danah pawh mumal leh awmze nei tak (Narrative- shaping setting) a din anih laiin; Bible a innghat, a thawnthuin a mamawh dan azira phuahbelh leh her rem ni si a ni. A tak ram (real) leh suangtuahna a din belh (fictional) inkawp anih tlat avangin Juda hnam nunphung a innghat ni si hi, a changtu (character) a din dan leh an inbiakna (dialoque) a siamrem danah Mizo rilru sukthlekin a mil thlap, Mizo Kristian rilru nena lo inngaihbel hmiah theih tur chi a ni tlat lawi si. He lehkhabu ziaktu hian hetiang plot, character leh setting din chhuak tur hian a ngaihtuahna a sêng nasa hle ang tih a hriat theih a, a Mizo ṭawng hman dan chungchangah pawh uluk taka vawi eng emaw zat ennawn a ni ang tih rin theihin, a chhung thu leh a ṭawngkauchheh inlaklawn dan engkim mai hi a felfai thlarh mai.

A ziaktu Rev. H. Laldintluanga

Chutiang thawnthu dangdai leh danglam tak anih avang chuan he thawnthu hian tum loh lam ram min hawipui thut thut chang a awm a, rilru hahdam leh thlamuang taka feel veng veng laiin thawpikna leh hah hluah hluahna ruama min luhpui thut chang a awm a, chu hmunah vek chuan he thawnthu ziaktuin a ro phumruk ni awm tak, mihring nun leh ringtute vanram kawng hlimthla ngaihnawm leh chhungril lama thlifimin min chhem hiau hiau ang maia hahdam veng veng theihna, mihringin a damchhung nuna amah leh amah a inzawh tam ber zawhna chhanna a rawn chhawp chang a awm leh lawi si.

Chuvang chuan he thawnthu hi pindan chhungrilah a thawnthuin a tum ram min luhpui tak tak huna ngaihtuahna seng thei tur leh, a thawnthuin a chhiartu(keimahni) hlimthla fiah taka a lanna darthlalang a rawn chhawpchhuah laia mittui hruk inring sa a chhiar ngai chi lehkhabu a ni a. A lan dan maia lehkhabu chhah lo tak, thawnthu thui tak ni si luhchilh tak tak tur chuan he lehkhabu hi hmanhmawh taka chhiar zawh mai theih tur chi a ni tlat si lo.

Kan chên mekna khawvel aṭanga min hruai chhuakin khawvel thar min dinsak a, mihring nun khualzin kawnga buaina, hahna leh thawpikna, beidawn rum rumnaten zinkawng zawhtu an hrual ṭhin dan atak ram ang maia min daipui karah Jason-a leh Tirzai hmangin nula tlangval kara hmangaihna  meisi de mai pawh thim zinga êng a tlinzia leh inhmangaih tawnnain mihring nuna par a chhuan ṭhin min thlirtir a. Hmangaihtu leh hmangaihte thinlung inhmu taka an khawsak hona khawvelah chuan huatna, inhmelmakna leh indona khawvela chângte tana paltlang zawh loh ruam thim pawh paltlang dan a awm zel ṭhinzia Jasona leh Tirzai te, Misaela leh Ruthi te hmanga a rawn lantir dante hi a ngaihnawm mai a ni lo; a hmuhnawmin a ngaihawm tel tlat a ni.

He thawnthu ziaktu hian mihring nun hi a thlir a, a theihtawpin a chik a, tarmit hrang hrang hmanga thlir kualin mihringin a nun zinkawng a zawhna a harsatna a tawh ngei ngei ṭhin leh, chu harsatnain mihring chhungril a luh ṭhin dante, a nuna thil thlengin amah a khawih danglam ṭhin dan leh a pawn lam landan, a mize lan chhuah dan leh nun a hmachhawn chhunzawm zelna thlenga a khawih ṭhin dan a hmu chiang hle. He thawnthua harsatna vawrtawp (Climax/double hole-structure) rawn siam nan pawh, pawn lam buaina (external conflict) leh mihring chhungril lam buaina (Internal conflict) rawn hmang kawpin; mi tam takin a hun hmaa minung khawvel an chhuahsan ṭhin chhan, mi tam takin an tum ram um thleng peih lo a beidawnga an kirsan tak nun a rawn hmang chat reng a ni. Chu harsatna thlentir nan pawh chuan mihring nun leh thih hnu piah lam ram thlenga thil pawimawh ber; mihring rilru kaihruai sual nasa bertu a ngaih theih ni bawk si Sakhuana hmangin mihring ngaihtuahna chhungrila zawhna leh chhanna hlimthla a rawn tarlang daih bawk. 

Nawmna chauh thlahlela zinkawng zawh ṭhin (hedonistic purpose) leh nawmna chauh um lo a thlarau lam âw ngaichang chunga zinkawng zawh ṭhin (pilgrim) te nun chu he thawnthua  a changtu pawimawh (main character) ber berte hmangin a rawn tarlang a. Mihringin a nunkawnga fiahna hautak a hmachhawn ṭhin chu Plots of Character lamah Testing Plot hmanga rawn tarlangin, chu thil thleng vêk chu Kristian vanram kawngzawhna chi hnih, a nuam lam chauh zawng ru reng chunga, nawmna uma zinkawng zawhna – Christian Hedonism leh tisa nawmsakna umna leh thlakhlelhna zawng zawng pawh paihthla ngam khawpa thlarau damna zawnga sakhuana kawng zawhna -Asceticism khaikhin nan a rawn hmang a. Ṭawngka a sawi emaw, thu tluanga ziah chhuah mai ai pawhin; thawnthua a changtu pawimawhin chhungril lama harsatna a tawh (Internal/Psychological Conflict) hmanga a rawn tarlang hian; a chhiartu chhungril a tarlang a, a fiah bik riau a ni.

He thawnthuin mihring leh amah dintu inkar a tarlan dante, mihringin a nun kawng a zawh dan tur leh, mihring nun a thlirna tarmit a chhawpchhuahte hian, mihringin Pathian a rinna kawnga leia dawn tur lawmman a beiseina (Prosperity Gospel) hi hnawl viau anga a lan theih rualin; a ziaktuin a thuhma a, “Hebron aṭanga Jerusalema an zin dân hi Kristian nun kawng nên tehkhin a ni a, chu chu kan ziah chhan ber pawh a ni (4)” a tih angin Baka Ruam an paltlang vawihnihna a Pu Gersona thusawi hian zirtirna chi khat paihthlak tumna lam ngawt ai a mihring leh Pathian inkar hmuhfiah leh zualna tarmit chhawp a tum zawkzia a tarlang chiang hle. Isaia 40: 29-31 thua “Lalpa nghaktuten an chakna an siamṭhat a, mupuite anga thla a an thlawh chhoh tur thu” a sawifiahna, mupuiin a chakna vawihnihna hlawh chhuak tura ni 150 ngawt harsatna  leh hrehawm nasa tak a paltlang dan a rawn tarlan te hian buaina leh harsatnain a chim vel ni a inhre ṭhin tuartu thinlungah, he lehkhabu chhiartute hnenah hian - hriatthiamna hmangin pawmna leh damna tuifim a la luanluh nawn tir fovin a rinawm. 

H. Laldintluanga hian thawnthua hmunhma (setting) din a thiam hle a. Chu chu he novel pumpui hmunhma Narrative-Shaping-Setting hmanga felfai tak leh mitthla zat zat theih, a ruangam pawh din nghal mai theih tura a rawn tarlan thiam dan hian a tifiah hle. Hebron, Sunagog, Aigupta leh Hebron la dai ngai reng reng lote pawh, tuk tin tlai tina kan chet tlatna tual ang maiin a chhiartute min fantir thiam a. A thawnthu sawi chhuah dan lamah pawh awmtual meichhem a thawnthu sawi a ngaithla ṭhin Mizote rilrem zawng takin a form lamah Third person narration (er-form) hmangin, a type lamah Direct narration tluangtlam takah pawh Omniscient narrator (Thawnthua thilthleng zawng zawng hre vek) tluangtlam leh hriatthiam awl tak si hmanga a rawn sawi chhuahna hian a thawnthu khawvelah min hruailut nghal mai thei a. Bible-a Judate nunphung pawh Mizo tleirawl/ nula leh tlangval nunphung nena inhne rem tak; a tak ram bo chuang hauh si lovin he thawnthua a changtu ber Jasona leh Tirzai te inhmangaihna zinkawng hmanga a rawn tarlang thiam riau hi, he thawnthu tihlutu leh ti ngaihnawm zual em emtu a ni.

Mizo Novelist hmasa Lalzuithanga te, kum 1970 chhoa Wayne Cole-a thawnthu larpui em emtu Joe Ngurdawla te kha miin lehlin emaw an tihsak hial khawpa thawnthu ziak ngaihnawm thiam an ni a. Rev. H. Laldintluanga pawh hi chutiang mi chu a ni, he thawnthu hi han chhiar thuak chuan hnampui zawkte kutchhuak lehlin emaw tih mai theih tur a ni a. A thawnthu khawvela han luh chiah erawh chuan Mizo nula leh tlangvalte khawvelah min hruailut a. Chu thawnthu ngaihnawm tak khawvela min chenpui chung chuan Bible zirtirna thutakah min hruailut a, Duhsakna thu hma ziaktu Rev.Dr.F.H. Liansangzuala’n “He lehkhabu ti hlutu leh ti manhla em emtu chu a thawnthu ngaihnawmna te, a changtute nun mawi leh duhawmna piah lamah Bible ram leh a mi chângte nun phung leh zia tam tak hriatna belh chhahtu a nihna hi a ni(5)” a tih angin, he thawnthu ziaktu hian a ngaihnawmna phenah Bible zirtirna mi tam takin kan ngaihtuah thlen phak loh tur; mi nawlpuiin kan hriatthiam theih tur zawng ni si a a rawn zep tluan zak hian lehkhabu hlu leh tlo takah a chhuah ngeiin a rinawm. 

Khawvel literature thûk ber ber, a zir mite pawhin mihring nun tarlang fiah ber bera an ngaihte hi sakhuana leh a kaihhnawih thu leh hla nena chhunfin a ni fo a. Chutiang zir mi Pastor/ Theologian te chuan thu leh hla tuala an thiamna an sawr chhuah tak tak chuan, novelist leh writer thawh hlawk ber ber tur an nih laiin; he lama kal Mizo Theologian hi an la tam lo hle. Doma (A Tibetan Girl) ziaktu C.Vanlalmalsawma kutchhuak leh Pastor Zonunsanga Novel Azuali te hnungzuitu tur Rev. H. Laldintluanga kutchhuak Baka Ruamah (Jasona leh Tirzai) rawn chhuak hi Theologian dangte cho chhuaktu ni se la, a ziaktu Novel dang hring chhuak zeltu ni tur leh Mizo literature khawvela hmasawnna kawngkhar thar hawngtu ni ngei turin duhsakna ka hlan e.

-Aremruati Ngente

2402024